So Pablo ỹo'uet aso lelaata ilata só'maq mashic icoñiguit da na'qaatec na'ñi yi Roma
1Aỹim Pablo, ỹim la'ac so Jesucristo. Ñi qota'olec roỹaxañiua' chaqai yoỹootec quiyim ỹauaaque aỹim lelaatec, qaiyi sa'xat da la'qaatec chicqaugui da nca'laxa.
2Ñi qota'olec shi'co' ỹa'xateta'guit najo na'qaatec quenauá'maq co'teete' naneresañi la'qaatqa ñi'maxare, chicqochiguilo nqai'ne' saua 'au letaxaỹaxanqajanqa. 3Dá'maq dajo na'qaatec ỹaatqajam ỹa'xat só'maq qara'gaxala' Jesucristo, só'maq llaalec ñi qota'a. Ca' quedá'maq re'qoochigui ne'xaỹoqsoxoc so'maxare chigoxouguit so nashi leenaxat David. 4Qam chicqochigui so Espíritu Santo co'na' ỹa'xat quiyim so'maxare llaalec ñi qota'a chaqai ỹaatqajam 'ue da lquesaxanaxa co'na' nca'le'guesop so nelauaxa. 5Ca' ñi qota'a nqouagueguelo qomi', chicqochigui nqai'en so Jesucristo, ca' qarela' quiyim so'ueenataxanot so'maxare, qaiyi quená'ogue ná'maq ỹoreta'oguit qomyipi 'ue ca huelec chaqai na'xaỹaxana. 6Ca quena'maxare, ca' lliguitaho qamiri, ma' qai'neeta qamiri loỹaxanqate' ñi qota'a, quiyim qamiri lalamaxarete' nqai'en so Jesucristo.
7Shiriñi dajo, tai'alo nqaishine' qamiá'ogue qamiri ñiita'ñi na na'a' lodegaxat Roma. Ma' nqo'talo qamiri ñi qota'a chaqai roỹaxanalo qamiri quiyim machii'ot da nachaalataxaguii. Ca' coñiguit da lqouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.
So Pablo ỹahotaque ra'piicha yi na'ñi yi Roma
8'Au sachigoxochichigui so Jesucristo quiyim saanot da ña'aachic ñi qota'a caqamiá'ogue, ma' quenaua'que naua lahil qana'xatetapigui da rpi'ỹaxaguii. 9Ca' ñi qota'a, ñí'maq somato'ot añi i'taxanata quiyim sa'xatetac da na'qaataxac so llaalec, ñi'maxare ỹa'deenta quiyim se scoua'ahi qamiri quena' ñqouagaxain. 10Ca' se yime quiyim sashiilatac ñi qota'a, sha'apiguito' quiyim 'ue ca na'xa'a, ca' seshit quiyim sovitalo qamiri. 11Ma' sahotaque ñauanto qamiri, ca' sa'ue ca ỹotaanaxanaxac quena chicqo'ot so Espíritu Santo, qaiyi qaica ishite' qamiri. 12Qaiyi quiñi 'óna ỹa'ñaxat ca liỹa quiyim ña'ñaxataxalec da npi'ỹaxac hueeto'ot aỹim chaqai qamiri qai'neeta.
13Qamiri ỹaqaỹa', sahotaque quiyim 'yiiñita, quiyim aỹim 'xoic sahotaque quiyim sovitalo qamiri, qam saqa' seshit. Sahotaque quiyim sovitalo qamiri, qaiyi 'xoic ca dalaxaic ỹaueguec ỹacoñiguit da na'qaatec caqamiri, 'nejem dá'maq shinta'gue quenaua liỹa' lahil na 'laua. 14Ma' ỹim 'ue da ña'qaatec quiyim sepacqajanchigui dajo quiyim sa'xatem ná'ogue na qomyipi, 'eno'm 'maxataxaraic, loqo'm ca se na'maxat, chaqai ná'maq ỹa'den ana lere, loqo'm ná'maq se ỹa'den ana lere. 15Ca' vichiguiño' aỹim ỹaatqajam 'ue da ishoxo quiyim sa'xatema qamiri qai'neeta da nca'laxa qamiá'ogue ñiỹa'ñi na Roma.
Da lquesaxanaxa dá'maq na'qaataxac so Jesús
16Ca' ỹim se ñayiloxonlec da na'qaataxac so Jesús, ma' da'maxare lquesaxanaxa ñi qota'a, ma' ishit nca'laxatec ná'ogue ná'maq huelec. 'Aueta nqai'en na judioipi, qam qai'neeta ná'maq sqai judioipi. 17Ma' dajo na'qaatec ichoxotema qomi' dá'maq 'neeta quiyim icoñi'chiguita qomi' ñi qota'a. Queda npi'ỹaxac, chaqai qaidaata da npi'ỹaxac. Ma' 'nerac naua naneresañi la'qaatqa ñi qota'a: “Cá'maq ỹa'maxarenta ñi qota'olec, dá'maq no'uen nachaalataxac chicqochigui da lpi'ỹaxac.”
Da lasauaxaset na qomyipi
18Ca' nagui qomi' ñi'pelaxanqa'a da lichic dá'maq chalego lecaic lonogoxonaxac ñi qota'a, chicqo'ot na piguim, taỹalec nqai'en ná'ogue na qomyipi quená'maq mashic ca'e ñi'maxare chaqai na hualoxonyipi. Ca ỹa'ue da nouaxanaxaset, ma' se no'uen dá'maq 'neetari', ca' chaqaida dá'maq 'em quiyim se qaỹa'den dá'maq ỹaatqajam lliqueta. 19Ỹaatqajam ỹa'deente' dá'maq leloxoỹaxac quiyim qaỹa'den ñi qota'a, ma' chaqaiñi ñi'maxare ỹachaxanema. 20Ma' dá'maq se re'xogui quiñi qota'a ishit qaỹa'den chicqochigui ná'maq re'qoochigui lo'ueenatqaipi ñi'maxare, ma' re'qoochigui shi'gue na' chi qaỹo'ueeteta na 'laua quiyim chaqaiñi ñi'maxare ñí'maq qota'olec, chaqai quiyim da lquesaxanaxa sqaica lqodoc. Ca vichiguiño' na'maxare sqaica quet cá'maq 'neeta quiyim sqaica quet cá'maq lasauaxaset. 21Ma' na'maxare mashic ỹa'den ñi qota'a, qam sqai 'neeta'gue quiyim chaqaiñi ñi qota'olec, chaqai sqai ỹaantacot da na'aachicyaxac. Ta'ta'a quiyim ỹa'deentapega ná'maq sqaica ca 'negue, chaqai añi le'taxanata ỹo'meetam, hueetagui na 'eco' napalaxa. 22'Eno'm 'naac 'deenaxanqachaqaiquipi, qam qaica quet cá'maq ỹa'den. 23Ma' na'maxare ỹaxanñi quiyim nqouagaxainot ñí'maq sqaica lqodoc qota'a. Ta'ta'a quiyim nqouagaxainot na lqui'i ná'maq ishit ileu qomyipi, chaqai vire'ta na lqui'i na ỹoipi, chaqai na nanaiquipi, chaqai na iseripi.
24Ca vichiguiño' ñi qota'olec ỹaxanegue na'maxare quiyim que'ueguelo nauá'maq chi la'deenataxanaxaco rapio'qotaxane'. Ca' quiñi 'óna quecá'maq ỹo'uet queca liỹa ishit ỹo'uet ca nayiloxo. 25Ma' sqai huelec dá'maq lliqueta chicqo'ot ñi qota'a, ta'ta'a dá'maq na'maachic. Ca' quiyi, ca hua'ñi quiyim qaimaqachin chaqai qanqouagaxainot ná'maq qota'a lo'ueenatec, qam ñi'maxare se qanqouagaxainot ñí'maq ỹaatqajam 'chichiguiñi quiyim qaimaqachintac quet, ma' sqaica lqodoc. Ajá'a, ca' chaqaida 'neeta.
26Ca' vichiguiño' ñi qota'olec ỹaxanegue na'maxare quiyim ỹo'uet dá'maq 'neeta'pegue, ma' vire'ta na 'aallipi ỹoỹoota'a da chi no'ueenataxac, ca' se nachiñiguit dá'maq no'ueenataxaiquet. 27Chaqai qaican ỹapaguec quená'maq ỹalliripi ỹalat da no'ueenataxac quiyim o'ñiguit aca 'aalo, ca' queetagui dá'maq chi lqo'itaxanqachic. Ná'maq ỹalliripi nodaachiguiñi ná'maq ỹo'uet na nayiloxo ná'maq ỹo'ueetetac queca liỹa. Ca ỹo'ueetetac dá'maq chi le'xoric ná'maq loshicmaxa quedá'maq chi nouaxanaxaset da leualoxonqaishic.
28Ma' mashic tot ỹa'deenapega ñi qota'a, ca' ñi'maxare ca'e na'maxare quedá'maq se no'uen la'deenataxanaxac, qaiyi ỹo'uet ná'ogue ná'maq se no'uen. 29No'qaachiguilo quená'maq se no'uen na'deenataxanaxac, dequenaxac, nqa'viic, nemitete'e ana plata chaqai na se no'uen, pa'guenaxanaxaiquipi, lauataxanaxaiquipi, petaxanaxaiquipi, 'maatqaiquipi, qa'uaic chaqai la'axaqa lo'o'. 30Se no'uen na ỹa'xat queca liỹa, se nqo'ta ñi qota'a, chaqai qaica ca ỹa'maxata'gue, chaqai napacqajnaxai, chaqai nemaqajnaxai. No'ueetegueshiguim na se no'uen, chaqai se na'xaỹaxanalo caua leta'al, 31ỹaatqajam se na'xaỹaxan, se ipacqajñigui quena' 'ue da ỹa'xat, se neneequesen, ná'ogue caapeguem, qaica ca i'xoren. 32Na'maxare ỹaatqajam ỹa'deenta ná'maq relaataxanlec ñi qota'a, chaqai ỹa'den quiyim ná'maq ỹo'ueetetac dajo tai'a yi nelauaxa. Qam qaiyiita ỹo'ueetetac, chaqai vire'ta nqo'ta quiyim 'ue ca iuane'ta ỹo'ueetetac da'maxare.
