Ñi qota'a sqaica ca ỹit quiyim nimit na nasauaxaset
1Vichiguiño' qaica quet cá'maq 'neeta quiyim sqaica quet ca rasauaxashichi', qami' quiyim ra'iisapigui ca lasauaxaset ca liỹa, 'eno'm canchaqai 'ñiite'. Ma' quiyim ra'iisapigui ca nasauaxaset, ca vi'saque cá'maq chi nouaxanaxashichi', ma' dá'maq ra'iisapigui chaqaida dá'maq qami' 'viichi'sac. 2Ma' qomi' sa'deenqata quiyim ñi qota'olec sqai ỹit quiyim nimit ca nasauaxaset, ca ỹovire'ta quiyim ỹo'uet ca nouaxanaxaset cá'maq ỹo'ueetetac cá'maq se no'uen. 3Ca qami' quiyim ra'iisapigui ca lasauaxaset ca liỹa, qam qami' qai'neeta 'viichi'sac, loqo'm ¿'neetapigui qavilli' quiyim ñi qota'a ỹit aqami' quiyim ỹa'ue ca nouaxanaxashichi'? 4Ca ¿peeta'a liỹoqoira'piguit da sqaica lqodoc lqouagaxa chaqai da leualaxavic ñi qota'a, qam se retañi' quiyim chaqaida dajo nqouagaxa ỹahotaque quiyim netogochigui na qavilli'? 5Qam qami' 'ñaaxai le'taxanata, ca se netogochigui na qavilli'. Vichiguiño' ca chi niỹoqoiseguelta' quena rasauaxashichi', ma' ỹovita ca na'xa'a ma' ñi qota'olec ichoxot ná'ogue na nasauaxaset, ca' quiñi 'óna qaỹa'ue ca nouaxanaxaset, 6ma' ñi'maxare ỹa'ue ca laseue' cá'maq lo'ueenatec quiñi 'óna. 7Ca ñi'maxare ỹaanem da lca'laxa sqaica lqodoc ná'maq idaantaque da lquesaxanaxa chaqai qaimaqachin quená'maq sqaica lqodoc chicqo'ot ñi qota'a quiyim se neme ỹo'ueetetac na ỹa'maqachiguiñi. 8Qam ỹaatqajam ro'o quiyim ỹa'ue ca nouaxanaxaset ná'maq chaqai ỹoiquentac dá'maq 'neeta'pegue, ca' se na'xaỹaxana dá'maq ỹaatqajam lliqueta na'qaatec, qainaata na se no'uen queeta'uegue. 9'Ue ma'le ca le'xoric chaqai ca lachitachic ná'ogue ná'maq ỹo'ueetetac na se no'uen, 'au ma'le na judioipi chaqai qai'neeta na sqai judioipi. 10Qam ñi qota'olec ỹaanem ma'le da lemaqachic, lecaic chaqai la'maxa ná'ogue ná'maq ỹo'ueetetac ca ỹa'maqachiguiñi, 'au nqai'en na judioipi chaqai qai'neeta ná'maq sqai judioipi.
11Ma' ñi qota'a nalo'ojta' nqai'en, qaica ca ỹapacqajnauec quena qomyipi. 12Ma' ná'ogue ná'maq 'ue na lasauaxaset quená'maq saqa' icoñiguit da naqataxac chicqo'ot so Moisés, 'eno'm sqaica dajo naqataxac, qam qaiyiita na'laañi. Chaqai quená'maq 'ue na ỹasauaxat, 'eno'm hueeto'ot na naqataxaquipi, ca' qaimit na'le na lasauaxaset, qam quiichigui nqohin so naqataxaquipi. 13Ma' se qaỹa'maxarenta quiñi qota'a cá'maq chi na'xaỹaxantapega na naqataxaquipi, ta'ta'a cá'maq ỹaatqajam ỹo'uet dá'maq 'naac na naqataxaquipi. 14Qam ná'maq sqai judioipi chaqai mesqai hueeto'ot na naqataxaquipi, qam chi ỹo'uet dá'maq reloqo'tegue na naqataxaquipi, ca na'maxare chi ỹachaxan cá'maq ỹa'den quiyim ishit qaỹo'uet. 15Ma' chi ichoxot da no'ueenataxac quiyim da naqataxaquipi naneretalec añi le'taxanata. Ma' quedá'maq chi la'deenataxanaxac, ca re'oq nqai'en dajo, ca dá'maq chi la'deenataxanaxac ichoxot ma'le quiyim pataxañi, loqo'm ro'ootaxanlec 16quecajo pa'aatec na'xa'a, ma' ỹovita quiyim ñi qota'olec imite' naua se re'xoguilo no'ueenataxaco ná'ogue na qomyipi chicqochigui nqai'en so Jesucristo. Ca' ipaquichigui ma'le dajo sa'xatetac na'qaatec chicqaugui da nca'laxa.
Dá'maq 'naac na naqataxaquipi chicqo'ot so Moisés quena judioipi
17Qam qami' 'ñirac quiyim qami' judío le'ec, ca' 'quiisapega na naqataxaquipi chicqo'ot so Moisés, chaqai nemaqajñisac quiyim vi'relec ñi qota'olec. 18Chaqai 'yiiñite' dá'maq ỹahotaque ñi'maxare, chaqai na naqataxaquipi ỹapaxaguinegue qami' dá'maq ỹa'maqachiguiñi. 19Ca 'ñiisapega quiyim ỹaatqajam 'eco' 'yiiñi' quiyim qami' la'gaxala' ca qai'laq, chaqai quiyim coỹachirelec na hueetaugui na napalaxa. 20'Ñiisapega quiyim 'yiiñi' quiyim paxaguiñi' ca sqaica ca ỹa'den chaqai na dalaxaiquipi, ma' na naqataxaquipi ỹomata'ta' da na'deenaxanaxa chaqai da lliqueta. 21Ca ma' qami' paxaguiñisac ca liỹa, qam ¿chi'negue ma' se napaxaguiñiralta'? Ma' quiyim 'ñirac quiyim qaica rocachi, ¿chi'negue ma' cuachi'sac? 22Chaqai qami' 'ñirac quiyim se qanocachita'guit aca se noua, qam ¿chi'negue ma' 'viichisac dajo? Chaqai qami' sqai huojñi' na nashiilec nqolaquipi, qam ¿chi'neco' ma' cuachisapega da lesallaxa ná'maq 'imec hueetaugui na'maxare? 23Ca nemaqajñiseguelec na naqataxaquipi, qam chicqochigui qami' quiyim se no'uen da qaỹa'xat quiñi qota'a, ma' se na'xaỹaxañitalo naua naqataxaco. 24Chaxaso' naua naneresañi la'qaatqa ñi qota'a 'neracsa': “Na sqai judioipi se no'uen da ỹa'xat quiñi qota'olec, sauaxate' qamiri.”
25Ỹaatqajam llic 'ue ca 'ñitegue no'm 'ue ca netanec na roshicmaxa'e', no'm 'viichi' dá'maq 'naac na naqataxaquipi chicqo'ot so Moisés; qam no'm se na'xaỹaxañita, ca 'ec sqaica ca netanec na roshicmaxa'e'. 26Chaqai cá'maq sqaica ca netanec na loshicmaxa, no'm ỹo'uet dá'maq 'naac na naqataxaquipi, ca ñi qota'a 'ec nqai'en quiyim 'ue ca netanaxaset na loshicmaxa, 'eno'm saqa'leca ca netanec. 27Cá'maq sqaica ca netanec na loshicmaxa, qam ỹo'ueetetac da 'naac na naqataxaquipi, ca'maxare chicqochigui quiyim qaỹa'ue ma'le ca nouaxanaxashichi' quiyim se na'xaỹaxañita na naqataxaquipi, 'eno'm vi'saxauot naneretañi chaqai quiyim 'ue ca netanec na roshicmaxa'e'. 28Ma' quiyim qami' judío le'ec, qam mesqainaata na pa'aauec. Chaqai quiyim qaỹa'ue ca netanaxaset, mesqainaata na pa'aauec quena loshicmaxa. 29Ta'ta'a quiyim cá'maq ỹaatqajam judío le'ec, qam quená'maq pa'aauo; chaqai quiyim 'ue ca netanec, qam cañi le'taxanata. Qam sqa chicqaugui na naqataxac naneretañi, chicqaugui da se re'xogui 'ueenataxac. Cá'maq 'neetari' dajo, ca qaỹa'maxarenta; qam mesqai quena qomyipi, ta'ta'a quiñi qota'olec.
