So Pablo hueete'e ada delec leenaxat Malta
1Ca na' mashic qomá'ogue qarca'leuec, ca sa'deenaq da leenaxat ada delec soviraqta'a, leenaxat Malta. 2Ca ná'maq chi la'a'yi qomyipi ỹaatqajam ỹa'maxate'teguelo chaqai quelolalo qomi'. Qam ma' 'xoic ca no'oomaxa chaqai ca ỹaxat naquetañi, ca qaỹo'uet ca norec lodegaxat, ca qohinapogoxoua' quiyim ñqo'naxauo, ñitonaxauaq. 3Ca' so Pablo lapoontecta' na qo'paq laso, ca inaxañigui so norec. Ca 'uo' so nanaic hueetauguilo saua qo'pa'. Ca co'na' nauata'guit so norec lauaq, ca i'guenec, ca inocaho, ỹa'queetaho queda lqai'laxat so Pablo. 4Ca' so qomyipi na'ñi yi Malta ỹauanchigui so nanaic ỹa'queetaho queda lqai'laxat so Pablo, ca sá'ogue retaxaỹata', 'naaco':
—Da ỹale peeta'a ỹaatqajam lauataxanaxai. Vichiguiño' qaỹa'caañi. Ma' 'eno'm nca'leuec cana huaaxai, qam ñí'maq se re'xogui ñí'maq ỹa'ue laseue' na nasauaxaset sqai ỹaxanegue quiyim nca'leetauec.
5Qam so Pablo ỹochigoxoñigui ca norec so nanaic, qam queso'maxare qaica nqai 'negue da na'gaxac. 6Ca sá'ogue so qomyipi nauaanta'a quiyim na'uat, loqo'm nouaxanaxanto quiyim ileu. Qam co'na' shi'gom qanauaanta'a, co'na' qaretan quiyim qaica ca 'negue, ca ỹoỹootera'a ca la'deenataxanaxague', ca 'nerac:
—Dajo peeta'a ỹaatqajam qota'olec nemaañi.
7Ca' quiyi seuqate'e sqoỹoqapigui saua la'aate' so nashi leenaxat Publio, só'maq idaaneguelec ada delec. Ca na' soviraxau'a yi la'a', ỹaatqajam quelolalo qomi' quesaua'que saua tres na'xata' senqata'anyi. 8Ca ralolo' so leta'a so Publio, se ne'laxashiguim, chaqai 'xoic da lpa'ỹaaxa, chaqai iuet na lauel, naquetac na neuoripi. Ca' so Pablo quepegue' queca 'imec hueetaugui. Ca co'na' ỹovira'a, ca nqouagaxainlec chaqai ỹashil-lec so'maxare, ca imeuec nqai'en. 9Ca' quedajo, ca nanagata' qai'neeta so liỹa ralolaxaiquipi quesó'maq na'ñi ada delec, ca qai'neeta sá'ogue imeuec. 10Ca' ỹaatqajam qaimaqachine' qomi'. Ca vichiguiño' na' liỹa yinotaxauo caso qom lahi' huaxaỹaqse, ca qaỹa'ue na qari'ỹaac quená'ogue ná'maq souenaq queda qoyicyaxac.
So Pablo ỹovita yi Roma
11Ca' mashic ỹovi' tres shiriguiri senqata'ñi aso delec, qam mashic ime'uegue so no'oomaxa. Ca yinotaxaugui aso qom lahi' huaxaỹaqse, lase yi Alejandría, hueesalec saua nadenqatqa lqui'il saua nashiilqa, leenaxate' Cástor chaqai Pólux. 12Ca na' sovitaxa yi ñigaxasom Siracusa, ca senqa'anyi quesaua tres na'xata'. 13Ca' quiyi, ca liỹa qolaq, qolqato'ot so lemanaxa chi sovirqata'a yi ñigaxasom leenaxat Regio. Ca queso nete'e 'ue so nonot chigoxogue da 'guiñi. Ca' queso liỹa nete'e, ca sovitaxa yi ñigaxasom Puteoli. 14Ca seuanqajlec so qarqaỹaripi quená'maq huelec da na'qaatec, ca qarollaañi senqa'anyi quesaua siete na'xata'. Ca na' ime, ca sachigoxosqochi'inyi, ca saxague da na'a' lodegaxat Roma. 15Ca cá'maq qarqaỹaripi na'ñi yi Roma mashic 'uo' da la'xaỹaxac coqomi', ca ca'guita qomi' queso nayic, ỹovirera'ñi yi leenaxat Foro de Apio, chaqai quiyi leenaxat Tres Tabernas, ca lotqai ñatenqa'guit so liỹaripi. Ca' na' idaanaugui so Pablo, ca ỹaanshiguim da na'aachic quiñi qota'olec, ca' nqo'neuec da la'ñaxac. 16Ca na' sovitaxa yi Roma, ca' so nouaataxanaq lashi ỹaano so ncoñiitecseripi queso neloxoỹaq cañi ncoñiitaxanaxaqui. Qam so Pablo qaỹoỹooteta'oga cá'maq chi la'a', ca' qaỹa'ue so 'oonoqui' nouaataxanaq le'ec reloqota'a.
So Pablo ỹa'xatetac da na'qaatec quiyi Roma
17Ca co'na' ỹovi' tres na'xata' neeta'ñi yi Roma so Pablo, ca roỹaxane'oga so lashillipi na judioipi neeta'ñi yi'maxare. Na' sá'ogue lapoỹata', ca 'naaco':
—Qamiri ỹaqaỹa', sa'qaataxanalo qamiri. Ma' ỹim qaica quet cá'maq sasauaxat quena qouo' laseripi judioipi, chaqai quiyim 'ue quet ca ñapaqueteguelec queda no'ueenataxac so 'auaxaic qareta'allipi, qam qaycoñi' queso judioipi hua'ñi yi Jerusalén. Ime, ca qayayaanou'a na Roma laseripi. 18Ca' na' qayinat, ca chaqa'ma' shim qayosouec, ma' qaica quet cá'maq ỹasauaxaset quiyim ñigui quet quiyim qayalauat. 19Qam na judioipi se ỹa'maxaren quiyim qayosouec. Ca' vichiguiño' sashiilaxan quiyim yimit ñi qarashi na'ñi na Roma quiyim yimit quiyim ỹaatqajam 'ue ca ỹasauaxaset. Qam quiyí'maq qouo' laseripi qaica ca shicapeguem. 20Ca' chaqaida dá'maq 'em soỹaxane'ogalo qamiri, sahotaque ñauanto qamiri chaqai setaxaỹa'pegueto qamiri, ma' chaqaida dá'maq qanaquitaxac qom Israel laseripi, ca' chaqaida dá'maq 'em nagui qaycoñiretari'.
21Ca 'naaco' so qomyipi:
—Qomi' ỹaatqajam qaca aca novitalo qomi' lere chicqa'gue da Judea quiyim ỹa'xat caqami'. Chaqai qaica quet cá'maq qara'xaỹaxac quená'maq noviretac chicqota'pegue da'maxare quena judío laseripi, ỹaatqajam qaica ca qara'xaỹaxac quiyim 'ue quet ca rasauaxashichi'. 22Vichiguiño' nagui sahoqotaque ña'xaỹaxanaxa cá'maq 'neeta ca ra'deenataxanaxaqui', ma' sa'deenaq chicqote'ogalo da npa'guenaxac ana dalaxai qoyiquetaugui.
23Ca vichiguiño' qaỹa'uo' so na'xa'a naloqojnec. Ca co'na' ỹovire'oga sojo na'xa'a, ca 'xoic so qomyipi ỹovira'a yi neeta'ñi so Pablo. Ca' ñaq nete'eta na' retaqa so Pablo chi ỹovireta'guit so avit, ỹa'xatetac da lo'ueenataxanaxac ñi qota'a ma' ỹoiquentac ná'ogue najo. 'Ne'tegue dajo so Pablo, ma' ỹahotaque qoyiuelec so Jesús. Vichiguiño' ỹachigoxochichigui da la'qaatec so naqataxaquipi chicqo'ot nqohin na'le so Moisés, chaqai ana lerecse so letaxaỹaxaquiripi ñi qota'a. 24Ca 'uo' na huelec da la'qaatec so Pablo, chaqai 'uo' na sqai huelec. 25Qam quiyim mesqai sá'ogue natene'ejta' ỹa'maxarenta, ca 'uo' na eec. Ca' so Pablo 'naaco' queso qomyipi:
—Ỹaatqajam taachiguio' dá'maq ỹa'xato' so Espíritu Santo queso 'auaxaic qareta'allipi, na' retaqaugui so qota'a letaxaỹaxaqui leenaxat Isaías. Co'na' 'naac:
26Mo'e', quirepegue', ca 'ñirapego' yi qomyipi:
Qamiri 'xahitapega ma'le da na'qaatec, qam sqa 'yiiñii;
ỹaatqajam ra'iita'a dá'maq sachaxantac, qam sqai huañiỹa;
27ma' añi le'taxanata yi qomyipi ỹaatqajam ra'ñi,
chaqai se ỹa'maxañi da na'xaỹaxanaxac,
chaqai naua nqote' pootaguilo;
qaiyi se reuanaxanalo naua nqote',
chaqai 'ec qaica ca 'xaỹa,
chaqai sqai vigui añi le'taxanata quiyim ỹa'den,
chaqai sqa nacpegue' aỹim qaiyi somatec.
28Ca nagui 'yiiñita dajo, ma' quenagui taachi'ñi da nca'laxa chicqo'ot ñi qota'olec qoỹaanougui na mesqai judioipi, ma' na'maxare na'xaỹaxana ma'le.
29Ca co'na' so Pablo 'naac dajo, ca so judioipi eec, qam chaqai pa'ỹata', retaqata'ta'.
30Qam so Pablo na'anyi quesaua dos ñaxari, ishiuetentac ca 'imec neetaugui, chaqai quelolta'piguit ná'ogue ná'maq ỹovira'a. 31Ca ỹa'xatetac da lo'ueenataxanaxac ñi qota'a ma' ỹoiquentac ná'ogue najo, chaqai rapaxaguinataxanta'pegue so qara'gaxala' Jesucristo. Qam qaica ca quepaxat.
