So Pablo qailategue da Roma
1Ca co'na' ỹovita ca laloqo' qailateguelo qomi' da Italia, ca so Pablo chaqai so liỹa ncoñiitecseripi qoỹaanem so nouaataxanaq lashi, leenaxat Julio. Sojo leloxoiqatecsec sá'ogue so nouaataxanaq só'maq qoỹanegue leenaxat nalliripi so Augusto. 2Ca yinotaxaugui aso qom lahi' huaxaỹaqse chicqota'gue da ñigaxasom Adramitio, tai'a yi ñigaxasomipi quiyi Asia. Chaqai qai'neeta ỹalequetauguilo qomi' so Aristarco, na'ñi yi na'a' Tesalónica, huaugui yi 'laua Macedonia. 3Ca queso liỹa nete'e, ca sovitaxa yi ñigaxasom leenaxat Sidón. Ca' hua'ñi, ca' so Julio huaguiguit so Pablo. Vichiguiño' qaỹasene'tem so Pablo quiyim quepegue' so leuanatqaipi chaqai quiyim qaiquelolliguit quesaua'maxare. 4Ca' na' senoxonaxauec quiyi Sidón, spa'xanqata'gue da qanemaq ada delec leenaxat Chipre, ma' seloxoiqa'guit so nonot. 5Sapacqa'ta so huaaxai, ca qolqato'ot yi naloote'oga yi Cilicia chaqai yi Panfilia, ca soviraqta'a yi ñigaxasom leenaxat Mira, huaugui yi 'laua Licia.
6Ca' yi hua'ñi, ca so nouaataxanaq lashi iuanejlec aso qom lahi' huaxaỹaqse chicqa'gue da Alejandría, taỹa'gue da Italia. Ca renotqajando qomi', ca lotqai liỹa qolaq. 7Ca' mashic 'vii saua na'xata' qolqata, sqai chaxalec aso qarahi'. Ca ỹaatqajam 'xoic qaredaxac, ca sovitaxa yi naloote'oga yi Gnido. Ma' qaiyiita seloxoiqata'guit so nonot, qolqa'tegue yi naloote'oga yi Salmón, llipatqatau'a ada delec leenaxat Creta. 8Chaqai queeta quiyim se ỹalamaq aso qarahi', ñaqai qolqot na lemanaxa aso delec, chi sovirqata'a yi leenaxat Ñigaxasomi' Lo'yaxanqa, sqoỹoqaque yi na'a' Lasea.
9Ỹaatqajam qaua' soviraq, chi ỹovireta'a quiyim 'xoic lichic qoyiquetañigui ana huaaxai, ma' mashic nepalataho so no'oomaxa. Vichiguiño' so Pablo ỹa'ue da laqataxac, 10ca 'naaco':
—Qamiri ỹalliripi, sedaanta'a quiyim 'xoic lichic dajo qoyicyaxac, chaqai sqoue quiyim na'laañi ana qarahi' chaqai na li'ỹaac, chaqai sqoue na'laañi qai'neeta da qanachaalataxac.
11Qam so nouaataxanaq lashi paguec na'xaỹaxana só'maq looỹac aso qarahi' chaqai só'maq ỹashaxanac aso'maxare, ca se na'xaỹaxana so Pablo. 12Ma' quiyijo ñigaxasom se no'uen quiyim qoyina'ñi quena' no'oomaxa, ca sham sá'ogue ỹa'deenta'a quiyim paguec la'maxa qoyique'e yijo, sha'apiguito' ishit ỹovirera'a yi Fenice, liỹa ñigaxasom quiyi Creta, reloqota'gue da rapiguima'gue chaqai da 'guiña'gue, ca nera'anyi quesá'ogue so no'oomaxa.
So nonot lodegaxat caso huaaxai
13Ca ma' npe'taxanshiguim so nonot se quesaxan chicqo'tegue da 'guiñi, ca 'neesapigui lauele' quiyim 'maxaraic liỹa queete'. Ca' reloqorec, ca qoyiqueto'ot na lahi ada delec Creta. 14Qam na' ncopaata, ca chaxaguit so nonot lodegaxat leenaxat rapiguimsec, reloqo'chiguit aso qarahi'. 15Ca quiyi, ca ỹaỹoxonaxat aca qarahi'. Ca ma' se seshitaq seloxoiqa'chiguit so nonot, ca saxanaxague quiyim qare'xat. 16Qolqa'tegue yi leseeca'oga ada cocho'lli' delec leenaxat Clauda, ca hua'ñi sqailligueme' quesaxan so nonot. Qam 'xoic qaredaxac, ca seshitaq ñauegaxashiguim aso qarouetaxanata nca'laxaqui, senaxasoxoñigui aso qarahi', ma' sauecqata quecanchaqa saxague. 17Ca na' ime qainaqshiguim caso'maxare, ca qaỹouene' saua ñaqa, ca qaicoñirigui na lasot aso qarahi', ca qaỹauegata' qaỹa'ñaxajta' so'maxare. Ca na' ime, ca' qanaviquiñi saua nonot lo'ol laỹoxonatqate' aso qarahi', ma' 'ue da nqolonaxa quiyim quejlec yi lo'uaxanaxa qohinac leenaxat la Sirte, ca qoỹaxanegue quiyim i'xat so nonot. 18Ca na' richiguiñi queso liỹa nete'e, so nonot ñaqai queeta da lquesaxanaxa, ca' so qariỹaripi inaxauec na li'ỹaac aso qarahi', inaxañigui aso huaaxai. 19Ca' queso liỹa na'xa'a, ca lotqai qomi' senaxasoxoñigui so huaxaỹaq ná'maq louenec aso qarahi'. 20Ca mashic 'xoic so na'xataripi se seuanqot añi ra'aasa chaqai ana huaqajñi, ma' queuguilo saua na'xata' so nonot lodegaxat. Vire'ta tot sahoqotaque quiyim qarca'leuec.
21Ca mashic 'vii saua na'xata' quiyim se squi'ỹaq, ca so Pablo nachajñi vichiguinguilo saua'maxare, ca 'naaco':
—Qamiri ỹale', paguec quet la'maxa quetaxan na'xaỹaxañiu'o' na'le quiyim sqai qolqa'e yi Creta. Ca' nagui ñaqa 'ajñii dá'maq sovirqau'a, chaqai 'ue na na'laañi. 22Qam nagui shinapegalo qamiri quiyim na'ñaxachii, ma' coqomá'ogue qaica ca ileu ma'le. Chaqanaata ana qarahi' na'laañi ma'le. 23Ma' squepe nachaxana ỹim so chicqashiguim qanela' quiñí'maq sento'ot qota'olec, chaqai so'ueetetac da lelaataxanaxac. 24Ca' so nelaatec 'naapiguiỹa': “Qami' Pablo, totaxan ro'chi'i', ma' ipacalec quiyim vichira'a ma'le ñi nashi na'ñi yi Roma. Vichiguiño' ma' chaqaqami' ná'maq 'em quiyim ñi qota'olec nca'laxatec ma'le ná'ogue ná'maq neetañigui ana rahiri.” 25Vichiguiño' nagui, qamiri ỹalliripi, na'ñaxachiỹo'. Ma' ỹim ỹaatqajam spi'ỹa'a ñi qota'olec, chaqai se'taxajñi quiyim chaqaida dá'maq 'naapiguiỹa' so nelaatec chicqashiguim. 26Qam qomi' qainaxalgoto ma'le aca delec.
27Na' ime' saua catorce na'xata' qolqata, ca sovitaxa aso huaaxai leenaxat Adria, chi qaremaxaguilo so nonot. Ca mashic 'uo' ca pe lauel, ca so lo'oipi aso qarahi' retan quiyim tot qoỹoqaque ca 'laua. 28Ca vichiguiño' qanaloqochin yi lishiguiñi yi huaxaỹaq, ca ỹovi' treinta y seis metros. Ca co'na' copaata liỹa que', ca lotqai liỹa qanaloqochin, ca ỹovi' veintisiete metros. 29Ca' 'ue da nouetaxa quiyim 'ue ca i'guenta'guit quena qa'. Ca' vichiguiño' 'vii saua qainaqaiñi cuatro lesallaxarete' quena qoshiỹa'gue aso qarahi', qaỹa'vii naua lequeete', ca nollirañi. Ime, ca 'xoic da niỹalaxa quiyim richiguiñi. 30Ca' so lo'ollipi aso qarahi' ỹahotaque 'eet. Vichiguiño' naqajñi aso qarouetaxanata. Qam saua'maxare chaqai 'nerac quiyim ỹa'vii caua inaqaiñi quena lesallaxarete' queda reloqota'gue aso qarahi', qaiyi nollirañi. 31Qam so Pablo ỹa'ue la'xaỹaxac so nouaataxanaq lashi chaqai so nalliripi, 'naaco':
—No'm dauajo quere'e ana qarahi', ca' qamiri qaica ca naquichitaque quiyim rca'lliuec.
32Ca' so nouaataxanyipi ichaxaguilo saua ñaqa lequeete' aso nouetaxanata nca'laxaqui, ca qoỹaxañi'ñigui quiyim najñi taañigui so huaxaỹaq.
33Ca co'na' tot qoỹoxoguit so na'xa'a, ca' so Pablo ỹahotaque quiyim sá'ogue so qomyipi 'ue ca ỹa'ic. Ca 'naaco':
—Mashic ỹovi' catorce na'xata' qaica ca laq chaqai qaica ca que'e. 34Ca' nagui shiñiỹapegaxaua' ñaq qui'ii. Ma' dajo roviñiguii, qaiyi 'ue ca rquesaxanaxahi, qaiyi rca'lliuec, chaqai retañita'gue quiyim ma'le qaica ca na'laañi, vire'ta quiyim qaicanqaida caqamiri.
35Ca na' 'naac dajo so Pablo, ca ỹacona so pan, ca ỹaanshiguim da na'aachic quiñi qota'a, reloqotougui sá'ogue so liỹaripi. Ca' ỹasectaqchigui, ca chaqa'ma' que'e. 36Ca so liỹaripi na'ñaxat, sá'ogue que'e qai'neeta. 37Ca quiyí'maq ỹorete' qomá'ogue caso qarahi' ỹovi' doscientos setenta y seis qomyipi. 38Ca na' ime que'e quecá'maq taachi'ñi ca ỹa'ic, ca' qaỹocoriñigui aso huaaxai so trigo, ma' qaỹahotaque pa'aateta aso qarahi'.
Iyinñi aso qom lahi' huaxaỹaqse
39Ca co'na' richiguiñi, so qarahi' lo'ollipi se ỹa'den yi 'laua sovitaxa. Qam qara'iita'ta'a so lemanaxa chaqai 'ue ca re'qoota nanatqa'. Ca qaỹahotaque quiyim sha'apiguito' qaishit nqo'neeta nqohin aso qarahi' quiyi lemanaxa. 40Ca qaichaxaguilo saua ñaqa inoqueta'guita saua lesallaxarete', ca qano'ueenaqterañigui aso huaaxai, ca qaỹocoỹaxajlgoto saua lequeete' saua nemaxasoxonqate' quena' qaỹashaxan aso qarahi', chaqai qaỹaviquishiguim saua nonot lo'ol queda reloxoỹa'gue aso qarahi'. Ca' so qarahi' nqo'neeta'ta'a so lemanaxa. 41Qam natenta yi hua'ñi dos llico na huaxaỹaq. Ca' aso qarahi' ta'chiguit so lo'uaxanaxa, ỹa'deeto rollapi'tegue so lo'lo queso lo'uaxanaxa, ca tot ishit reda. Ca' queda qoshiỹa'gue aso qarahi' ropoxoỹa'gue sauaxat na lquesaxanaxa na lo'paxa. 42Ca' so nouaataxanyipi ỹahotaque nalauajñi so ncoñiitecseripi, ma' se ỹa'maxaren quiyim 'ue ca ỹo'xonta, ca nemootauec. 43Qam so lashi so nouaataxanaq, ma' ỹahotaque quiyim nca'leetauec so Pablo, ca se ỹa'maxaren quiyim qohine'tegue dajo. Ta'ta'a quiyim chinlataxan quiyim cá'maq ỹa'den lo'xonaxac, ca 'au taañigui yi huaxaỹaq, 'au ỹo'xonta'ta'a yi 'laua, 44ca' so liỹaripi renojlec na qo'paq lo'xonaxala' chaqai na lahillipi ná'maq nac caso qarahi'. Ca' chaqaida 'neeta, ca sá'ogue nca'leetauec na' ỹovijta'a yi 'laua.
