Hechos 26

₁Ca' so Agripa 'naaco' queso Pablo:

—Qami' shichi' taxahi' quecá'maq 'ñirac.

Ca' so Pablo nanojshiguim da lqai'laxat, ca 'ne'tegueyi da la'qaatec:

₂—Ỹaatqajam ya'maqachiguiñi, ma' seshit setaqa quiyim seloqoisaxaguit qami' qarashi Agripa, quedá'maq sa'xat quedá'ogue dá'maq 'em na judioipi se yiuoten. ₃Ma' quedá'ogue dajo qami' 'yiiñite' ná'ogue na qano'ueenataxac qom judío laseripi, chaqai naua'que naua ñco'uaqatapiguilo. Vichiguiño' sashiilo'ot qami' quiyim na'xaỹaxañita ỹim.

₄Ná'ogue na judioipi ỹa'deenta da ño'ueenataxac, ma' salequetaugui na'maxare quiyí'maq ỹa'a', chaqai quiyi Jerusalén, na' llaqaỹim noctoqui'. ₅Chaqai na'maxare qai'neeta ỹa'den, chaqai ishit ỹa'xat no'm ỹa'maxarenta, ma' na' llaqaỹim ne'necoqui' salequetapougui na judioipi, ỹaatqajam shiquichi'ñiguilo naua ñapaxaguinaxaco quena qohinac leenaxat fariseo, ná'maq paguec quiichi'ñigui na naqataxaquipi chicqo'ot so Moisés. ₆Ca' nagui qanauego aỹim qayimit queca ỹasauaxaset, ca sasoualec da ñaquitaxac quiñi qota'olec quiyim liỹa nca'laxatec na mashic shi'gue ileu, ma' la'qaatec dajo quesaua 'auaxaqa qareta'al. ₇Chaqai sá'ogue so sachigoxosqaugui 'auaxaic doce llaalqaipi so qareta'a Israel, qai'neeta naquitesa'a dajo quiyim ipaquichigui. Vichiguiño' imaqachin ñi qota'olec, chaqai ỹo'uet da la'qaatec, ỹocane' naua na'xatari chaqai na piri. Ca' chaqaida quedajo ñaquitaxac nagui sasouetapigui, qami' ỹashi Agripa, ca chaqaida dá'maq 'em qanoquiaatapiguiỹa' quena judioipi. ₈Ca' ¿mesqai viilco' qamiri qai'neeta quiyim ñi qota'a ishit liỹa nca'leuec nqai'en ca mashic shi'gue ileu?

₉Ỹim qai'neeta quesom 'xoic quen na sahotaque shine'tegue ná'maq quelec quiyim huelec da leenaxat so Jesús, Nazaret le'ec. ₁₀Ca chaqaida shine'tegue na'le quiyi Jerusalén, ca yipacalec 'xoic na scoñi' quená'maq mashic icoñiguit da na'qaatec. Ma' ỹaatqajam 'ue da ñañinlataxac quena lashillipi na netaxaỹaxanqajanqaipi. Chaqai no'm 'ue ca qaỹalauat quená'maq mashic icoñiguit da na'qaatec, ỹim qai'neeta sa'maxarenta. ₁₁Chaqai 'xoic quiyim ỹim souaxantac, ma' sahotaque ỹaxanñi da lpi'ỹaxac. Da shinta'gue quen quená'ogue na lapoxoqui na judioipi. Ma' ỹaatqajam 'xoic ỹoquiiaxa quena'maxare, vire'ta socanaxañigui quena ỹoqa'a na'aateripi.

₁₂Ca' chaqaida da 'neeta quiyim 'ue so na'xa'a saata'gue da na'a' Damasco, llo'qoota'a so ñilaataxac chicqaugui na lashillipi na netaxaỹaxanqajanqaipi. ₁₃Qam queso nayic, qami' ỹashi, mashic na'xa'a lavinñi, ca 'uo' so seuana 'nejem ana ncoỹeraxanaxaqui chicqo'ot na piguim. Qam paguec lquesaxanaxa so lauaq cañi ra'aasa, na' nqai'lliguiñi quiyi seuqate'e, ỹovira'ogalo saua ñauegaxaua'. ₁₄Ca' qomá'ogue sanataxañi na'le, ca' sa'xaỹaque so na'qaatec ỹahota'ahi naua judío la'qaatqa, 'naac: “Qami' Saulo, ¿chi'negue ma' yocañi'sac? Chi nqa'viiñiseguelta', 'nejem ca nauegaxanaxala' quena' ỹachaqata'piguit na lo'lo aca na'daxanqate.” ₁₅Ca na'le, ca shinac: “Qami' ¿negue' qami'?” Ca' so'maxare 'naapiguiỹa': “Aỹim Jesús, chaqaỹim ná'maq ỹim yocañi'sac. ₁₆Qam ne'laxachirishiguim, ca nachaachiriñi, ma' 'ue dá'maq 'em ñachaxana qami'. Sahotaque quiyim qami' ilaatec, chaqai qami' ỹa'qaataxanqajnec quedá'maq nagui huañichirigui, chaqai quecá'maq huañita ma'le caỹim. ₁₇Aỹim so'ootaxanlec qami' ma'le quena judioipi chaqai quena mesqai judío. Ca' nagui selata qami' na'maxare. ₁₈Ỹim selatalo qami' caua'maxare, qaiyi naviguerec nqai'ñi' naua nqote', qaiyi totqai queetapougui na napalaxa, qainaata na lauaq queetapougui, qaiyi totqai qoỹoiquentac queda lquesaxanaxa so na'ỹaapec, qaiyi quegue ñi qota'a, chaqai qaiyi huelec caỹim, ca qaỹapalaxate' naua lasauaxasete', ca lotqai qaỹalecqajno quiyi la'a' ná'maq ỹaatqajam lca'acseripi ñi qota'a.”

₁₉Ca' qami' ỹashi Agripa, chaqaida nqaishin ma' chaqa'ma' ña'xaỹaxana so iuanaxanaxac chicqo'ot na piguim. ₂₀Ta'ta'a quiyim sa'auaxanchiguiñi saanougui da na'qaatec yi na'ñi yi Damasco, ime, ca qalam yi na'ñi yi Jerusalén, chaqai yá'ogue yi 'laua Judea, chaqai qai'neeta na mesqai judioipi. Shintapega quiyim ỹalate' naua lanatqa, ca quelec ñi qota'a, ỹo'uet da lo'yaxanec no'ueenataxanaxac, qam re'qoota nqai'en ca nadalqataxac. ₂₁Ca' chaqaida da 'em qaicoñilec na'le quena judioipi cañi qaro'ueenaxanaxaqui quiyi Jerusalén, ỹahotaque yalauat. ₂₂Qam ñaq yotauantac ñi qota'olec quiyim shiguelec da ña'ñaaqataxac ỹovireta'a nagui, sa'deenaxanaxanta'pegue ñi'maxare ná'ogue, qaica ca ỹochiỹa'oga nqaishin. Se ỹauana soỹootec ca sa'xat quená'maq la'qaatec so letaxaỹaxaquiripi ñi qota'a chaqai queso Moisés ỹa'xatesa'guita quiyim ipaquichiguilo nqohine' nauajo. ₂₃Ma' saua'maxare ỹa'xatesac quiyim cajo nashi nca'laxaqui tai'a quiyim 'xoic da le'xoric, ime, ca' ileu, chaqai 'auaxaic quiyim liỹa qanca'laxatec, chaqai qaỹachigoxochichigui da 'ec lauaq ca nca'laxa quena qouo' laseripi chaqai na liỹa ỹoreta'oguit qomyipi.

₂₄Ca co'na' ñaq retaqatac so Pablo ỹa'xatetac dajo, ca naualqashiguim so Festo:

—Qami' lecmaxaic nagui, Pablo, paguelec da napaxaguinaxaqui', ca releguemaxachi'.

₂₅Qam so Pablo 'naaco':

—Qami' ỹashi Festo, mesqai ỹim lecmaxaic, ma' dá'maq sa'xatetac ỹaatqajam 'maxaraic chaqai lliqueta. ₂₆Najo hueete'e ỹalequetauguilo qomi' ñi qarashi Agripa. Ñi'maxare ỹaatqajam ỹa'deenta dá'maq sa'xatetac. Vichiguiño' qaica ca youetaque, ca se lliyaqajnauec da ỹa'qaatec. Ma' ñi'maxare ỹaatqajam ỹa'deenta dá'ogue dá'maq sa'xatetac, ma' da'maxare se qoỹoxotetañi. ₂₇Qami' ỹashi Agripa, ¿vi'relec da la'qaataxanaxague' saua qota'a letaxaỹaxaqui'? Ỹim sa'den quiyim vi'relec.

₂₈Ca' so Agripa 'naaco':

—Saqa'leca cocho'qui', ca yishichi' quiyim shiguelec so Cristo.

₂₉Ca' so Pablo lotqai 'naaco':

—Queca cocho'qui' loqo'm queca 'xoic, saxanchi' mesqaqamite' nqai'en ñi qota'olec, ta'ta'am ná'ogue ná'maq na'xaỹaxantapiguiỹa' nagui ỹovira'a quiyim 'nejem aỹim, qam quiyim sqaicaua caua 'nejme' nauajo iqueete'.

₃₀Ca co'na' ime 'naac dajo so Pablo, ca nachajñi so nashi Agripa chaqai so nashi Festo, chaqai aso Berenice, chaqai sá'ogue só'maq liỹaripi nqa'xantañi. ₃₁Ca tare'oguiyi, ỹahosaque retaxairapigui dajo. Ca na' retaxaỹata', 'neraco':

—Ñi ỹale qaica cá'maq lasauaxaset cá'maq ñigui quet quiyim qaỹalauat, vire'ta quiyim se qaicoñiretari' quet.

₃₂Ca' so Agripa 'naaco' queso Festo:

—Ỹa'maqachiguiñi qaỹosouec quet ñi ỹale, qam chaqaiño' ñí'maq rashiilaxan quiyim qaimit queca lasauaxaset queca qarashi na'ñi yi Roma.