So Pablo reloqota'guit so Festo
1Ca co'na' so Festo ỹovita quiyim ỹacoñiguit da lo'ueenataxanaxac quiyim nashi. Ca co'na' ỹovite' tres na'xata', ca chicqochi'ñi yi Cesarea, ca taigue da Jerusalén. 2Ca' quiyi 'ue da lashiilaxanaxac queso Pablo so lashillipi na netaxaỹaxanqajanqaipi quena' qaretaxaỹa'pegue' ñi qota'a chaqai na judioipi paguec leta'allipi. 3Ỹaatqajam qaỹalamqajlec qarashiilaxanegue quiyim qarelaataxana so Pablo, qaỹauega yi Jerusalén. Ma' dá'maq na'deenaxague' saua'maxare, quiyim relaataxandelec qaỹalauat queso nayic. 4Qam so Festo 'naaco':
—Ñi Pablo ncoñiretari', neeta'ñi yi Cesarea. Qam ỹim sahotaque qaỹaloq sopil queda'maxare. 5Chaqaidaata quiyim 'ñiỹapega ná'maq na'gaxalateripi caqamiri quiyim eec, taigue da Cesarea, quegue aỹim. Ca no'm so ỹale ỹaatqajam 'ue ca lasauaxaset, ca' 'viiquiñitac ma'le cá'maq 'ñiita'gue.
6Ca' so Festo hueeto'o' yi Jerusalén, 'uo' ca ocho loqo'm diez na'xata'. Ime, ca' pilegue da Cesarea. Ca na' ỹovi', ca queso liỹa na'xa'a, ca quepegue' aca lo'ueenataxanaxaqui quiyim imitaque ca nasauaxaset. Ca relaataxane'oga so Pablo quiyim qaỹauego. 7Ca co'na' inoxono so Pablo, ca qanqo'neu'o' queso judioipi chicqa'gue da Jerusalén. Ca qohinapego' quená'maq qaimaxalec lasauaxaset, lodegaxat nqohin. Qam re'qoota quiyim sqai llic. 8Ca' so Pablo 'naaco':
—Aỹim qaica quet cá'maq ỹasauaxaset. Ma' se ñpa'guenta'pegue' na nelaataxaquipi na judioipi, chaqai añi no'ueenaxanaxaqui quiyi Jerusalén, chaqai ca nashi neeta'ñi yi Roma.
9Qam so Festo ỹahotaque quiyim ỹa'maqachigui lauel so judioipi, ca inato' so Pablo:
—¿'Maxariñite' quiyim 'itegue da Jerusalén, ca hua'ñiyi ma'le, ca simichi' quiyim ỹaatqajam 'ue ca rasauaxashichi'?
10Ca' so Pablo 'naapego':
—¿Negue' cá'maq 'neeto'? Ma' mashic ime seuetaugui ana ro'ueenataxanaxagui'i', ana'maxare idaaneguelec ñi nashi Roma le'ec. Ana'maxare huaugui quet quiyim qayimit queca ỹasauaxaset. Qam mashic 'yiiñite' quiyim qaica ca ỹasauaxaset huaugui na judioipi. 11Qam no'm 'ue ca ỹaatqajam 'chichiguiñi ỹasauaxaset ñigui ca nelauaxa, ca qaica 'negue quiyim qayalauat. Qam no'm qaica quet cá'maq llic quená'ogue ná'maq qaimaqatapiguilec, ca' qaica quet cá'maq ishit quiyim yayaanougui na judioipi. Vichiguiño' 'ue da ỹashiilaxanaxac quiyim chaqaica ca nashi quiyi Roma yimit quiyim ỹaatqajam 'uo' ca ỹasauaxaset.
12Ca' so Festo retaxaỹa'pegue'o' so lotauaripi. Ca co'na' ime, ca 'naaco' queso Pablo:
—Dá'maq rashiilaxanaxaqui' quiyim imit qami' ca nashi na'ñi yi Roma. Ca' chaqaica cá'maq quirepegue' ma'le.
So Pablo reloqota'guit so nashi Agripa
13Ca mashic 'vio' saua na'xata', ca so nashi Agripa chaqai aso loua Berenice taategue da Cesarea, riquinaxanta so Festo. 14Ca mashic 'vio' saua na'xata' neesa'anyi, ca so Festo ra'qaataxana so nashi Agripa queda 'neeto' so Pablo. Ca 'naaco':
—Quenajo 'ue ñi ỹale no'ueenaqtaugui ana ncoñiitaxanaxaqui so Félix. 15Qam cana' seueta'gue da Jerusalén, ca anagata' na lashillipi na netaxaỹaxanqajanqaipi chaqai na na'gaxalateripi quena judioipi. Ca qanodou'a aỹim ca nashiilaxanaxac quiyim sa'maxarenta quiyim qaỹalauat ñi'maxare. 16Qam na'le, ca shinac na nashillipi quena romano laseripi se ishit quiyim 'aualec ỹasenta quiyim qaỹalauat ca ncoñiiteguesec quiyim saqa' qailoxoỹaxañiguit cá'maq ncoñiitqororipi quiyim noqollicte'e' ma' qaretaqagui cá'maq qohintapega lasauaxaset. 17Vichiguiño' na' novite' saua'maxare quenajo, ca sqaica ma' queeta quet nqaishin, ca chaqaica cá'maq nete'e na' ñqa'xanñi quena ỹo'ueenataxanqa', ca chaqa'ma' soỹaxane'oga quiyim qanauego ñi ỹale. 18Ca só'maq npa'guenaxauaripi ñi'maxare na' ỹa'xat ná'maq qohintapega lasauaxaseteripi, qam qaica quet cá'maq nachiñiguit quená'maq sepeeteta'a quiyim lasauaxaset. 19Chaqaidaata dá'maq 'nerac saua'maxare quiyim qanoquii'a ñi'maxare ma' souetapigui quiyim sqai quelec dá'maq huelec na judioipi, ma' qanoqollictetapigui ca leenaxato' Jesús, ma' ca'maxare shi'co' ileu, qam ñi Pablo 'naac nca'leetauec. 20Ca ma' ỹim se sa'den ca shi'ntegue dajo, ca senat ñi Pablo quiyim ỹa'maxarenta taigue da Jerusalén, ca' quiyi, ca qaimit quiyim ỹaatqajam 'ue ca lasauaxaset. 21Qam ñi'maxare chaqaiñi rashiilaxan quiyim qaỹauega ca nashi Augusto na'ñi yi Roma, ca' quiyi, ca qaimit queca lasauaxaset. Vichiguiño' selaataxanlec quiyim le'neetari' ncoñiretari', toco' ma' seshit selata ca'maxare.
22Ca' so nashi Agripa 'naaco' queso Festo:
—Aỹim liỹa sahotaque ña'xaỹaxana ca ỹale.
Ca' so Festo 'naaco':
—Ma' nete'e na'xaỹaxañito'.
23Ca' queca liỹa nete'e na' so Agripa chaqai aso Berenice ỹovirero, liỹaresaho da lemaqachigue' chaqai da lecaigue', inoxondougui añi netaxaỹaxaqui, liỹaasac so nouaataxanaq lashillipi chaqai só'maq nashillipi quiyi na'a'. Ca' so Festo relaataxane'oga qanauego so Pablo. 24Ime, ca' retaqo' so Festo, 'naaco':
—Qami' nashi Agripa, chaqai ná'ogue na ỹalequetauguilo qomi'. Najo ná'maq ỹale. Ma' 'xoic na judioipi 'ue na ỹa'xatetac queda'maxare queda Jerusalén chaqai quenajo Cesarea. Sqai ỹaxanñi quiyim 'neetapiguiỹa' quiyim se ỹa'maxañi quiyim nca'leetauec. 25Qam caỹim 'eco' sqaica cá'maq ỹaatqajam 'chichiguiñi quet lasauaxaset quiyim ñigui ca lelauaxa; qalaxam chaqaiñi rashiilaxan quiyim qaimit queca lasauaxaset queca qarashi Augusto. Ca sahotaque selata ca'maxare. 26Qam sqaica quet cá'maq shine'tegue ca ỹirec tai'a cá'maq qarashi quecá'maq 'neeta da'maxare, ca ñauegue'galo qamiri quiyim repagui'a nachii. Qam qami' ỹashi Agripa, salamaxate'tot qami' quiyim nachi', qaiyi 'ue cá'maq ỹa'qaatec sela' ma'le queca qarashi Augusto. 27Ma' ỹaatqajam 'ec mesqai 'chiñi quiyim qailata ca ncoñiiteguesec quiyim se liỹaata nqohin cá'maq 'neeta ca lasauaxaset.
