So piguim chaqai so 'laua dalaxaic
1Ca na' ime, ca seuane'ta so piguim chaqai so 'laua dalaxaic, ma' só'maq 'auaxaic piguim chaqai só'maq 'auaxaic 'laua pala'pe. Chaqai aso huaaxai tot qaca. 2Ca' ỹim Juan seuañi'chiguit so na'a' lodegaxat dalaxai Jerusalén, ỹaatqajam co'teeta, chicqashiguim queda piguim, ỹaatqajam chicqo'tot ñi qota'olec, ỹaatqajam qaỹa'maxachichiguiñi, 'ec nqohin da na'maqataxac aca nequetegaxai quiyim ỹovita o'ñiguit ca nauonaxaua. 3Ca' sa'xaỹaque so na'qaatec ỹaatqajam lam, 'maqot na piguim, 'naac:
—Ñaqa 'ajñi', nagui ñi qota'olec ỹalequetaugui na qomyipi, ỹaatqajam lauoraripi. Na'maxare ỹaatqajam lauo' laseripi, chaqai chaqaiñi ñi qota'olec ỹalequetaugui yi'maxare, ca' lalamaxaret ñi qota'olec yi'maxare. 4Ñi'maxare nquiỹoorec naua'que naua lachi' ma'le yi'maxare. Ca' tot qaica ca nelauaxa, chaqai ca ỹenaxac, chaqai ca naualqategueñi, chaqai ca nqui'ic, ma' ná'ogue ná'maq shi'co' quen 'ue, qaica ime'uegue.
5Ca só'maq nqa'xantañigui aso nashi nqa'xanaxaqui 'naac:
—'Ajñi', ỹim dalaxaic nqaishin ná'ogue nanchaqaina.
Chaqai qai'neeta 'naac:
—'Chiriñi, ma' nauajo na'qaatqa ỹaatqajam lliquete' chaqai ishit qaipi'ỹa'alo.
6Na' ime, ca 'naac caỹim:
—Ná'ogue mashic ime. Ỹim ná'maq ỹim 'auaxaic chaqai spa'aatec. Ca cá'maq iuet ca laquip, ca' ñi'taxañigui ca ne'paxantashiguim huaxaỹaq chicqaugui da nca'laxa, qaca aca laseuete. 7Ca cá'maq rauegaxan ma'le, ca' icoñiguit ma'le ná'ogue najo, 'ec nishiue' nqohin. Ca' ỹim ỹaatqajam ỹim leta'a qota'olec, chaqai ca'maxare ỹaatqajam ỹalamaxaret ỹaalec ma'le. 8Ca ná'maq qolonqaiquipi, chaqai ná'maq sqai huelgoto naua ỹa'qaatqa, chaqai ná'maq naqaigaxat, lauataxanaxaiquipi, chaqai na nedequenaxairipi, chaqai na 'naxanaxairipi, chaqai na nqouagaxaintacot na nashiilec nqolac, chaqai ná'ogue na 'maatqaiquipi, na'maxare tai'a nqohin quiyim qainaxañigui ca norec lodegaxat lavigaxat na quiquiaxaic. Ca' chaqaica ca co'uaataxanaxaic nelauaxa.
So dalaxai Jerusalén
9Ca na'le, ca 'ue so nacpegue' aỹim quesaua siete nelaatqa piguim lase', quesauá'maq no'qoosa'alo saua siete 'taxaqui' no'qaachiguilo quesaua pa'aaterec nqa'viico. Ca 'naac caỹim:
—Ỹala'e', sachaxañiraxarom añí'maq napiitaxaua ñí'maq loua ma'le ñi 'ec qagreta llaalec.
10Ca quedá'maq iuanaxanaxac ỹachaxañim so Espíritu Santo, ca' so nelaatec piguim le'ec yavicshi'megue aso quemaralec qa' ladocai, ca' ỹachaxañim so chalego lecaic na'a' Jerusalén, ỹaatqajam co'teeta, chicqashiguim queda piguim, chicqo'ot ñi qota'a. 11Sojo na'a' hueetaugui da lauaq ñi qota'a, ca' da lqashilegaxa 'ec ná'maq no'uen qa' leenaxat jaspe, richaauec da lqashilegaxa. 12Ca' naua lahil yi na'a' 'ue so lquepaxaset lodegaxat chaqai ladocaic. Doce saua lasomi', quiñi 'óna lasom 'ue so 'óna neloxoỹaq piguim le'ec. Chaqai saua leenqate' saua doce llaalqaipi so Israel 'óna ca qoỹerelec quiñi 'óna lasom. 13'Vii saua tres lasomi' pa'aasa'gue da lqodoigue, tres queda rapiguim, tres queda 'guiñi, chaqai tres queda lauashiguim. 14Ca' so napoxonaxat queso na'a' lodegaxat qaỹo'xontalgoto saua doce qari, qoỹeretalgoto saua leenqate' saua doce lelaatqa so 'ec qagreta llaalec.
15Ca só'maq nelaatec piguim le'ec só'maq yitaxaỹaxantac quen, 'ue so lo'qoota'a naloqojnaxanaxat 'oro quiyim qanaloqochin yi na'a', saua lasomi', chaqai so lquepaqataxanaxat. 16Ca' yi na'a' nalo'ojta' da ladogaxa 'nejem dá'maq leca'gue. Ca' so piguim le'ec naloqochin na'le yi na'a' queso laloqojnaxanaxat. Ca na' qanaloqochin, ca' ỹovi' dos mil doscientos kilómetros da ladogaxa, da lishicshi'megue chaqai da leca'gue. 17Na' ime, ca' naloqochin so lapoxonaxat yi na'a', ca' ỹovi' sesenta y cuatro metros da lishicshi'megue. Ca' yijo ỹovi', ca' chaqaiyi yí'maq laloqojneguesec só'maq laloqojnaxanaxat na qomyipi só'maq raloqojnaxantapega so piguim le'ec.
18Ca' sojo nquepaqataxanaxat, co'na' qano'xonshiguim, ca' qaỹahote'e na qa' leenaxat jaspe. Chaqai na no'ueenataxat so na'a' nodaachiguiñi 'oro, na'maxare 'ec na chaañi co'teeta richaauec. 19Ca sauá'maq qari no'xonaxalate' so nquepaqataxanaxat no'ueetaxat ná'maq ỹaleque'ejta' no'uen qa'. Só'maq 'auaxaic leenaxat jaspe, chaqai so liỹa leenaxat zafiro, chaqai so liỹa leenaxat ágata, chaqai so liỹa esmeralda, 20chaqai so liỹa ónice, chaqai so liỹa cornalina, chaqai so liỹa crisólito, chaqai so liỹa berilo, chaqai so liỹa topacio, chaqai so liỹa crisoprasa, chaqai so liỹa jacinto, chaqai so co'uaataxanaxaic qa' leenaxat amatista. 21Ca' saua doce lasomi' sá'ogue 'ue na lauaq, ma' no'ueetaxat na qa' 'ec ỹaviquetaugui, quiñi 'óna lasom nodaachiguiñi najo qa' na lo'ueetaxat. Chaqai só'maq nayic quiichiguiñigui na lavinñi yi na'a' ỹaatqajam nodaachiguiñi 'oro, 'ec na chaañi richaauec.
22Qam sqaica ca seuana no'ueenaxanaxaqui queso na'a', ma' ñi qara'gaxala' ñí'maq qota'olec sqaica lqalanec, chaqaiñi ñí'maq 'ec lo'ueenaxanaxaqui, chaqai qai'neeta so 'ec qagreta llaalec. 23Chaqai yi na'a' tot ỹouen ca lauaq añi ra'aasa chaqai ñi shiraigo, ma' chaqaida dá'maq lauaq ñi qota'a chaqai so 'ec qagreta llaalec coỹaresalec. 24Ca ná'ogue ná'maq ỹoreta'oguit qomyipi, quená'maq mashic qanca'laxatec, ca' ỹouoxontac yi na'a' lodegaxat, queetapougui na lauaq yi'maxare. Ca ná'maq nashillipi quena 'laua nodootapegueu'a ma'le da lecaic chaqai da lemaqachic yi'maxare. 25Chaqai naua lasomi' totqa pootaguilo quiyi na'xa'a. Ca' quiyi, ca' tot qaica ca pe. 26Nodou'a yi'maxare qai'neeta da lecaic chaqai da lemaqachic ná'ogue na ỹoreta'oguit qomyipi. 27Qam se ishit inoxoneu'a yi'maxare ca ñaq napio'o, chaqai ca ñaq noqocatapiguilo naua se no'viiñi no'ueenataxaco, loqo'm naua na'majnaxaco. Qainaata inoxono ná'maq qoỹeretañi ca leenaxat aso nelere so 'ec qagreta llaalec, naneretalec ná'maq qaica lqodoc da lca'laxa.
