1Ca' na'le, ca so piguim le'ec ỹachaxañim aso lachiugue co'teeta chicqaugui da nca'laxa; so le'ec huaxaỹaq richiichiguiñi, 'ec na chaañi, chicqau'a yi nqa'xanqa' ñi qota'olec chaqai so 'ec qagreta llaalec. 2Chaqai quena lavinñi só'maq nayic quiyi lavinñi yi na'a' lodegaxat, chaqai quenaua lahil aso lachiugue que'teguelo ana llaqtaxai ana qo'paq chicqaugui da nca'laxa. Doce 'ue ana la quiyi ñaaxa, quiyi shiraigo lotqai 'ue na ala. Chaqai ana laue ana qo'paq qaỹouen quiyim qaratarenataxana quená'ogue na ỹoreta'oguit qomyipi. 3Ca quiyi ma'le, ca' tot qaica quet ca hueetalec ca nouaxanaxaset. Aca nqa'xanaxaqui ñi qota'olec chaqai so 'ec qagreta llaalec neeta'ñi yí'maq na'a', ca' na lelaatqaipi imaqachintac ma'le ñi'maxare. 4Ca' ỹaatqajam neuane'e' ñi'maxare, chaqai ná'ogue qoỹeretalec na latap na leenaxat. 5Ca' yi hua'ñi, ca' tot qaica ca pe ma'le. Ca ná'maq neeta'ñi yi'maxare, ca' tot ỹouen aca lcoỹeraxanaxaqui chaqai ca lauaq añi ra'aasa; ma' ñi qota'a ñí'maq qara'gaxala' coỹaretalec ma'le. Ca saua'maxare sqaica lqodoc quiyim nashillipi ma'le.
So Jesucristo tot qaỹaloq quiyim liỹa novi'
6Ca na' ime, ca' so nelaatec piguim le'ec 'naapiguiỹa':
—Nauajo na'qaatqa ỹaatqajam lliquete', chaqai ishit quiyim qaipi'ỹa'alo. Ca' ñi qara'gaxala' qota'olec ñí'maq ỹo'uet da lquesaxanaxa ná'maq la'qaataxanqajanqaipi, chaqaiñi ñí'maq nela' so lelaatec piguim le'ec, ma' ỹahotaque ỹachaxanem na lelaatqaipi ná'maq sqaỹaloq re'oq ma'le.
7—¡Sqaỹaloq ñanac!
¡Ca' chalego loyac quecá'maq na'xaỹaxane'ta da la'qaatec ñi qota'a qoỹeretañi canajo lere!
8Ỹim Juan sa'xaỹalo chaqai seuanalo nauajo. Ca na' ime sa'xaỹalo chaqai seuanalo, ca' sa'dooto naua i'cootal só'maq piguim le'ec só'maq ỹachaxañima saua'maxare, sham ñqouagaxainot. 9Qam so'maxare 'naapiguiỹa':
—'E', sqai 'ñitetegue dajo, ma' ỹim chi lelaatec ñi qota'a. Shinta maqami' chaqai só'maq rqaỹachi'ipi, só'maq letaxaỹaxanqajanqaipi ñi'maxare, chaqai ná'ogue ná'maq na'xaỹaxane'ta ná'maq naneretañi canajo lere. Nqouagaxaiñitot ñi qota'olec.
10Chaqai qai'neeta 'naac caỹim:
—Sqai 'xochiriñi da la'qaatec ñi qota'a naneretañi canajo lere. Ma' mashic tot qaỹaloq ỹovita yi laloqo' quiyim imiguilo. 11Ca' vichiguiño' nagui cá'maq ỹo'ueetetac cá'maq se no'uen, ca' 'xañisac ñaq ỹo'uet. Chaqai cá'maq napio'xot da nachaalataxac, ñaqai queetalec da napio'qotaxac. Qam cá'maq huagaxaraic, ñaqai queetalec da leuagaxaric. Chaqai cá'maq nañaanto'ot quiyim queeta'pegue' ñi qota'a, ca' ỹaqamqata quiyim queetalec ñi'maxare.
12—Ajá'a, ỹim sqaỹaloq ñanac. Ca' ñi'xateta cá'maq ishiuetenaxanaxat quiñi 'óna quecá'maq 'neeta ca lo'ueenataxanaxac. 13Ỹim ná'maq ỹim 'auaxaic, chaqai aỹim co'uaataxanaxaic, aỹim 'avichiguiñi chaqai aỹim nqodoc.
14Chalego la'maxa cá'maq quiỹo' caua loho, qaiyi ỹovirau'a ada qo'paq chicqaugui da nca'laxa, chaqai quiyim ishit inoxontougui ñi lasom yi na'a' lodegaxat. 15Qam no'ueenauec ma'le ná'maq ỹo'ueeteta'pe naua se no'viiñi, chaqai ná'maq ỹo'ueetetac ana le'naxanaxaqui, chaqai na nedequenaxairipi, chaqai na lauataxanaxairipi, chaqai ná'maq nqouagaxaintacot na nashiilec nqolac, chaqai ná'ogue ná'maq nqo'ta chaqai ỹo'ueetetac da na'maachic.
16—Ỹim Jesús, sela' na ilaatec piguim le'ec quiyim ichoxot ná'ogue najo quená'maq mashic icoñiguit da na'qaatec. Ỹim 'ec llaqtaxai so nashi David. Chaqai 'ec ỹim huaqajñi vigaxarai nete'ese.
17So Espíritu Santo chaqai aso loua so 'ec qagreta llaalec 'nerac:
—Anaqui'.
Chaqai cá'maq na'xaỹaxantac 'naac:
—Anaqui'.
Chaqai cá'maq ỹalauat ca laquip, chaqai ỹahotaque ne'et, ca' nanac, ca' ne'et quiyi huaxaỹaq chicqaugui da nca'laxa. Qaca nqohin aca laseuete.
18Ca' quená'ogue ná'maq na'xaỹaxantapegalo naua la'qaatqa ñi qota'olec naneresañi canajo lere, ca sa'ue da ỹaqataxac: No'm 'ue ca 'ue ca ỹoqotqajno quenauajo, ca' ñi qota'olec ỹoqotqajando queca'maxare nauá'maq nqa'viico naneresañi canajo lere. 19Chaqai no'm 'ue ca 'ue ca naqata'a quenauá'maq naneresañi la'qaatqa ñi qota'olec canajo lere, ca' ñi qota'olec rouootaxana'gue cá'maq qaỹaqatqajantari' taalec ca'maxare cayi lere chicqaugui da nca'laxa chaqai quiyí'maq na'a' ỹaatqajam co'teeta, yí'maq 'em qoỹerelec anajo lere.
20Ca só'maq ichoxote' nauajo 'naac:
—Ajá'a, sqaỹaloq ñanac.
Ajá'a, ca' chaqaida 'neeta dajo, nanaqui' qami' qara'gaxala' Jesús.
21Ca' qaidaata quiyim ñi qara'gaxala' Jesucristo no'ueenaxat ca qayicyaxaguii qamiá'ogue. Ajá'a, ca' chaqaida 'neeta dajo.
