Apocalipsis 20

₁Ca na' ime, ca seuane'ta so nelaatec chicqotashiguim queda piguim, lo'qoota'a aso lauaatqate yi lapooqo' na nqui'illipi, chaqai lo'qoota'a so chalego lecaic ncoñiitaxanaxat. ₂Ca' sojo nelaatec ỹaconlec so isecỹac 'ec naanoc, só'maq ñauapeco' quen nanaic lodegaxat, ca' chaqaiso' só'maq na'ỹaapec chaqai Satanás, ca' coñirari' quesaua mil ñaxari. ₃Ca inaxa'ña ca lapooqo' na nqui'illipi. Ca ỹapo'ña, ỹo'uet aso netanaqsete ñi lasom, ca tot ishit ỹayin ná'maq ỹoreta'oguit qomyipi, toco' ma' ỹovirerec saua mil ñaxari. Ca' ma'le, ca' liỹa qaỹosouec lecocho'qui'.

₄Ca na' ime, ca seuane'talo saua nashi nqa'xanaxaqui'. Ca' quesaua'maxare nqa'xantañiguilo sauá'maq qoỹaanema quiyim ishite' imite' na nasauaxaset. Qai'neeta seuana na lqui'illipi ná'maq qaichaxaic na lqahic sauaxat ỹa'xatetac da la'qaatec ñi qota'a, dá'maq shi'co' ỹa'xat so Jesús. Saua'maxare chaqaisaua sauá'maq se imaqachine' so isecỹac lodegaxat chaqai so nadenqatec lqui'i, chaqai se ỹa'maxarene' quiyim qaỹa'ue ca netanec quena latap loqo'm quena lqai'laxat. Seuane'ta quiyim liỹa qanca'laxaterec, ca lotaua' so Cristo quiyim nashillipi quecaua mil ñaxari. ₅Ca' chaqaiso só'maq 'auaxaic qanca'laxatec quesó'maq leuaxaiquipi. Qam só'maq liỹa leuaxaiquipi, ca' se qanca'laxatec, toco' ma' ime'ueque saua mil ñaxari. ₆¡Chalego la'maxa quená'maq nouanau'a ma'le só'maq 'auaxaic nca'laqataxanaxac, chaqai lalamaxareteripi ñi qota'a! Ca tot qaỹovira'a quesó'maq co'uaataxanaxaic nelauaxa, ta'ta'a quiyim netaxaỹaxanqajanqaipi quena lalamqateripi ñi qota'a chaqai so Cristo. Ca' quiyi, ca' lotaua so'maxare quiyim nashillipi quecaua mil ñaxari.

₇Ca na' ime ỹoxe'ueque saua mil ñaxari, ca' lotqai qaỹosouec so na'ỹaapec queda ncoñiitaxac. ₈Ca' lotqai liỹa eec ỹayin ná'ogue na ỹoreta'oguit qomyipi hueetalec ana 'laua. Ca' quepegue' ỹayin ñi Gog chaqai Magog. Ca lapoonta' quiyim nalliripi, ca' nalauat, ma' ỹaatqajam 'xoic yi'maxare 'nejem na lo'uaxanaxa hueeto'ot na lqodoc aso huaaxai. ₉Ca' quiyi, ca' quelec ná'ogue na 'laua, ca nahiquinchiguiñi cá'maq hueeta'ñi na lalamaxareteripi ñi qota'a chaqai yí'maq na'a' lodegaxat nqo'ta ñi'maxare. Qam ñi qota'a nela' so norec chicqo'ot na piguim, ca' sá'ogue ỹavigaxat. ₁₀Ca só'maq na'ỹaapec rayinaxantaco' quen queso'maxare, ca' qainaxañigui so norec lodegaxat lavigaxat na quiquiaxaic, yí'maq qainaxanquio' na'le so isecỹac lodegaxat chaqai só'maq chaqai 'naaco' quen letaxaỹaxaqui ñi qota'a. Ca' hua'ñi, ca' 'ue da le'xoric sqaica lqodoc quenaua'que naua na'xata' chaqai naua piri.

₁₁Na'le, ca seuane'ta so chalego lecaic nashi nqa'xanqa' lalagaxaic chaqai só'maq nqa'xantalec. Ca' quiyi, ca' ỹaatqajam palac na 'laua chaqai na piguim, ca' tot qaica ca qaiuana quesaua'maxare, ma' pala'pe. ₁₂Chaqai seuane'ta na leuaxaiquipi cocho'qui' chaqai na lodegaxat nachaatetañi, reloqoto'ot ñi qota'a. Ca qaỹauachiguilo saua lerel chaqai aso liỹa lere asó'maq lere naneretalec ná'maq qanca'laxatec. Ca ná'maq leuaxaiquipi qaimit, ca' qaishiueten quiñi 'óna quecá'maq ỹo'uet quená'maq qoỹeresalec saua lerel. ₁₃Ca aso huaaxai ỹaano na leuaxaiquipi huaañigui aso'maxare. Chaqai so nelauaxa chaqai yí'maq lapooqo' na leuaxaiquipi ỹaano qai'neeta ná'maq hueeta'ñi yi'maxare. Ca sá'ogue qaimit, ca' qaishiueten quiñi 'óna quecá'maq ỹo'uet. ₁₄Ca na' ime, ca' so nelauaxa chaqai só'maq lapooqo' na leuaxaiquipi qainaxariñigui ca norec lodegaxat. Ca' sojo norec lodegaxat chaqaiso só'maq co'uaataxanaxaic nelauaxa. ₁₅Ca' sojo norec qainaxañigui só'maq se naneretalec ca leenaxat aso lere qoỹeretalec ná'maq mashic qanca'laxatec.