1Na' ime dajo, ca sa'xaỹaque so netenegue lavillaxac so 'xoic qomyipi, 'maxashiguim quena piguim, 'naac:
¡Semaqachinaq ñi qota'olec!
Ma' da nca'laxa, da lauaq, chaqai da nquesaxanaxa lalamaxarete' ñi'maxare.
2Ma' ñi'maxare quena' imit na nasauaxaset ỹaatqajam quiichiguilo nqai'ne' naua leloxoỹaxaco dá'maq lliqueta.
Ma' ỹo'ueeto' na'le da nouaxanaxaset asó'maq ỹaatqajam nedequenaxai
ma' na'axat ná'ogue na qomyipi quena 'laua queda nedequenaxac;
ñi'maxare ỹa'ue lovi' caso'maxare da lelauaxa na lelaatqaipi ñi qota'a.
3Ime, ca' liỹa 'nerac:
—¡Semaqachinaq ñi qota'olec! Ma' na lesalaxaripi da ncopatoxoc yijo na'a' sqaica lqodoc nichiitashiguim.
4Ca na'le, ca' saua veinticuatro qo'xoiquipi chaqai saua cuatro ise' nca'leesauec, saua'maxare nqa'paxanchiguit na 'laua. Ca imaqachine' ñi qota'a nqa'xantalec yi nqa'xanqa' quiyim relaataxan. Ca 'neraco' quen:
—¡Ajá'a, chaqaida 'neeta dajo! ¡Semaqachinaq ñi qota'olec!
5Ca' 'ue so sa'xaỹaque nivillaxac 'maqateguelec yi nashi nqa'xanqa', 'naacsa':
Maqachiñii ñi qota'olec,
qamiá'ogue qamiri ma' mashic 'ueenataxañitacot
chaqai ná'maq huelec ñi'maxare,
quená'maq collo'olqaipioqui' chaqai ná'maq mashic leta'allipi.
Da lemaqachic so lashilaxac so 'ec qagreta llaalec
6Sa'xaỹaque qai'neeta so 'ec lavillaxac so 'xoic qomyipi, 'ec na lelamaxa na 'xoic lachiuguellipi, 'ec soxonaxa da lelamaxa, 'naacsa':
¡Semaqachinaq ñi qota'olec ñí'maq qara'gaxala' qaica ca qalanac, ma' mashic ỹovita yi laloqo' quiyim ỹoiquentac ná'ogue najo!
7Ỹaatqajam saỹaaquioqotac, ñitoonqatac chaqai semaqachinqatac ñi'maxare,
ma' mashic ỹovita yi laloqo' quiyim shilo ñi 'ec qagreta llaalec.
Chaqai añí'maq loua mashic na'maxatetañi.
8Ma' ñi'maxare qaỹa'maxarenta quiyim no'uet ỹanñi ná'maq no'uen nooỹac lino, co'teeta chaqai qashilec.
Ma' na lino taỹaugui da 'maxaraic nachaalataxac ná'maq lalamaxareteripi ñi qota'a.
9Ca na'le, ca' so nelaatec piguim le'ec 'naac caỹim:
—'Chiriñi: “Chalego loyac quená'maq nalecseripi queca lemaqachic so 'ec qagreta llaalec ma' shilo.”
Ca 'naac caỹim:
—Dauajo dauá'maq ỹaatqajam lliquete' la'qaatqa ñi qota'a.
10Ca' sa'chi'iñi naua i'cootal, sahotaque semaqachin só'maq piguim le'ec. Qam so'maxare 'naac:
—'E', sqai 'ñitetegue dajo. Ma' ỹim lelaatec ñi qota'a, shinta maqami' chaqai na rqaỹachi'ipi ỹaqamqata quiyim quelec dá'maq lliqueta ỹa'xat na'le so Jesús. Maqachiñi' ñi qota'a.
Ma' dá'maq lliqueta ỹa'xat na'le so Jesús, chaqaida dá'maq ỹo'ueete' da lquesaxanaxa ná'maq ỹa'xateta'pe naua la'qaatqa ñi qota'a.
Só'maq neetalec so shipgaq lalagaxaic
11Ca na'le, ca seuana quiyim nauachigui na piguim, ca re'oq so shipgaq lalagaxaic. Chaqai só'maq neetalec leenaxat qamaxaraic chaqai lliqueta, quiyim nashi chaqai quiyim ỹa'maqachiguiñi da 'ne'tegue quena' imit na qomyipi. 12Saua nqote' ỹaatqajam ỹaviquetauguilo, 'ec na norec lauaq. Chaqai ỹantañi aso 'xoic nashi nado'ollipi. Chaqai 'ue so neenaxat hueetalec, qam qaisoota so'maxare ỹa'den. 13Ỹansañi saua noho nqo'lecse' quena neuoripi. Chaqai da leenaxat so'maxare 'neetasa': La'qaatec ñi qota'a. 14Ca so'maxare qaicoỹareta'pegue' queso nalliripi piguim laseripi ỹantañi ná'maq no'uen nooỹac lino lalagaxaic chaqai co'teeta. Sá'ogue neetalec na shipgaq lalagaxaic. 15Chaqai na lap neetaugui so lecat ỹaatqajam ỹaxaraic, ca' ỹoda'a ná'ogue ná'maq ỹoreta'oguit qomyipi, chaqai ỹoiquentac, 'ec ỹahote'e aca lashilete fierro quiyim relaataxan. So'maxare imit ma'le na nasauaxaset quena qomyipi, 'nejem nqai'en ca nelam na li'i ana 'uva, co'vigui, ỹahota'ahi naua lapiaate'. Ca 'ec lataxa nqai'en ma' ne'taxañigui dá'maq chalego lecaic nouaxanaxaset chicqaugui dá'maq lonogoxonaxac ñi qota'a ñí'maq qaica ca qalanac. 16Chaqai so'maxare qoỹeretalec so lapo' chaqai na loteleta' dajo neenaxat: “Lashi na nashillipi chaqai la'gaxala' na na'gaxalateripi.”
17Ime na'le, ca' seuane'ta so nelaatec piguim le'ec nachaatetañi, co'ueetalec añi ra'aasa. Ca na'le, ca' netenegue da laualaxac 'naapega ná'ogue aná'maq ỹo ỹootac quena piguim:
—Nanahiquena, lapoiỹau'a cá'maq chalego lecaic lqui'ỹaxanataxanaxac ñi qota'a, 18qaiyi a'guii na la'at na nashillipi, chaqai na nouaataxanaq lashillipi, chaqai na 'ñaaxaiquipi, chaqai na la'at na shipiguiripi, chaqai ná'maq qomyipi neetalec, ná'ogue na la'at na qomyipi, nelaatqaipi loqo'm se nelaatqaipi, cocho'qui' loqo'm ná'maq mashic lodegaxat.
19Na'le, ca' seuane'ta só'maq isecỹac lodegaxat chaqai na nashillipi quena 'laua chaqai ná'ogue na nalliripi. Lapoỹata', ma' ỹahotaque nco'ỹa'e' só'maq neetalec so shipgaq chaqai só'maq nalliripi. 20Ca' so isecỹac lodegaxat qaicoñi', liỹaatau'e' só'maq 'naaco' quen letaxaỹaxaqui ñi qota'a, só'maq qaiuanchiquio' quen nqai'en quena' ỹo'uet na netanqaipi se qaiuanapega. Ca' quedajo netanqaipi chicqochigui quiyim ỹayin ná'maq nañaañiguit so isecỹac lodegaxat quiyim ỹa'ue ca letanec so'maxare chaqai quiyim imaqachin so nadenqatec lqui'i. Ca só'maq isecỹac lodegaxat chaqai só'maq 'naaco' quen letaxaỹaxaqui ñi qota'a, saua'que nca'leesauec qainaxariñigui ca norec lavigaxat na quiquiaxaic. 21Ca só'maq liỹaripi, ca qaỹalauat, qaỹodoota'a so lecat neetagui na lap só'maq neetalec so shipgaq. Ca' ná'ogue ana qo'o quemategue ná'maq la'at saua'maxare.
