Da nanoxonaxac aso Babilonia
1Ca na' ime dajo, ca seuane'ta so liỹa nelaatec chicqotashiguim queda piguim, chalego lquesaxanaxa da lelaataxanaxac. Ca' na 'laua re'qojlec nqai'en queso lauaq. 2Ca' ỹaatqajam nelamaxaren ỹaualqatac, 'naacsa':
—Mashic huaañi, noxona aso chalego lecaic na'a' leenaxat Babilonia. Ca' nagui, ca loma' na se no'uen lelaatqaipi so na'ỹaapec, chaqai nqañoqotqa' ná'ogue ná'maq se re'xogui lecmaxaiquipi, chaqai lco'vichaqa' ná'ogue ná'maq isecỹac ỹo, napio'o chaqai qanaqaica'a. 3Ma' ná'ogue na ỹoreta'oguit qomyipi quena 'laua ỹaatqajam quiichigui nqai'en da nedequenaxac aso'maxare, 'ec quiyim qaiquiñiuguetqachit ca liỹa queca lataxa. Chaqai na nashillipi quena 'laua niyiquiñiguit aso'maxare, 'ec nqai'en aca 'aalo. Chaqai na nemeenaxaiquipi quena 'laua resalligui dá'maq chalego lqo'itaxanqachic se no'uen aso'maxare.
4Ca na'le, ca' sa'xaỹaque so liỹa na'qaatec 'maqot na piguim, 'naac:
—Oquii'e najo na'a' lodegaxat qamiri ma' qamiri ỹalamaxarete', qaiyi sqa lliguiu'a da lasauaxaset, chaqai se ỹovire'galo qamiri ca nqa'viic. 5Ma' lapootañi na lasauaxaset ỹovirashiguim quena piguim. Ca ñi qota'a ỹo'leenta'a ná'maq se no'uen ỹo'ueetetac yi'maxare. 6Pilaxachilec yi'maxare cá'maq 'nejmo' na'le ca ỹaanem ca liỹa. Ỹapacauec nqai'ñii cá'maq pilaxachilec quecá'maq ỹo'uet. Chaqai lecqajñiỹata' ca 'taxat, ca' ne'taxañigui, paguec lquesaxanaxa nqai'ñii quecá'maq chi ỹalecqajanta' yi'maxare quiyim ne'taxañigui ca liỹa. 7'Viichii ca nqa'viic chaqai ca le'xoric, chaqai 'nejem dá'maq 'neeta añi'maxare na' nañaañiguit da maqajnaxac chaqai da lishoxo. Ma' añi'maxare 'naac añi le'taxanata: “Quena senta'ñi ñqa'xantañi, aỹim nashi. Sqaỹim pa'ỹe, chaqai qaica ca i'xoric ma'le.” 8Ca' vichiguiño' quedajo, ca' queca 'oonoqui' na'xa'a, ca novi' ca nqa'viic: lelauaxa, lachitachic, chaqai lqopaaxa, chaqai qaicopata'a queca norec. Ma' qaica ca qalanac ñi qota'a, ñí'maq qara'gaxala', ñí'maq ỹa'ue da nouaxanaxaset.
9Ca ná'maq nashillipi quena 'laua quená'maq hueeta'piguit aso'maxare queda nedequenaxac chaqai queda lishoxo, noỹentagui ma'le chaqai ỹaualqateguelec, ma' ỹauanchigui so lesalaxaripi so ncopatoxoc aso'maxare. 10Qoỹorete'ogalo ma'le saua'maxare, ma' no'chita ma'le da nouaxanaxac. Chaqai 'nerac:
—¡'Agai! ¡'Xoraỹole qami', ma' qami' ná'maq chalego lecaic Babilonia, yí'maq chalego lquesaxanaxa na'a'! Ma' ne'laqataxanto da nouaxanaxaset.
11Na nemeenaxaiquipi quena 'laua qai'neeta noỹenlec chaqai ỹaualqateguelec asojo na'a', ma' tot qaica ma'le ca rishiujnaxana na li'ỹaac so'maxare lemeenec. 12Na li'ỹaac 'oro, plata, na qa' lo'yaxanec, chaqai na qa' 'ec ỹaviquetaugui, chaqai ana lo'yaxana lepate lino, chaqai ana lepate seda, chaqai ana lepate tocalec na lashic, chaqai ná'maq ỹaatqajam toc; chaqai na ỹaleque'ejta' qo'paq lo'daxaraic na lahita, chaqai na nouenec qoñaalec na lashic, qo'paq lo'yaxanec, bronce, fierro, chaqai na lo'yaxanec qa' leenaxat mármol; 13chaqai na liỹa li'ỹaac na canela, chaqai ná'maq ỹaleque'ejta' lo'daxaraic na lahita, chaqai na nichiinaxanaxat, chaqai na qo'paq louaq mirra, chaqai na coraxat, chaqai na lataxa, aceite, chaqai lo'yaxanec 'aríña, chaqai na trigo; chaqai na iseripi ni'ỹaaquioxola', qagreta, shipgaq, nahoglena, vire'ta na na'ac ná'maq re'qoochigui qom. 14Qohinac ma'le quiyijo na'a':
—¡Ca' tot qaca nagui aca lo'daxarai ala acá'maq ỹaatqajam namaañi' quen, chaqai ỹaatqajam na'laañi cá'ogue ca resallaxa'e' chaqai ca no'ueetaxachi' quen!
15Ca ná'maq qomyipi lemeenec quen najo, ỹachigoxotaugui da lesallaxa yijo na'a', qoỹoqota'a nqai'en ma' no'cha'a da nouaxanaxaset, noỹentac chaqai naualqategueñi. 16Ca' 'naaco' quen:
—¡'Agai, chalego le'xoric yí'maq chalego lecaic na'a'! Ma' 'neetari' quen aca 'aalo ỹantañi acá'maq no'uen loxoqui lino, chaqai naua noho tocalgoto chaqai na ỹaatqajam toc, chaqai no'ueetaxat na 'oro, chaqai na qa' lo'yaxanec, chaqai na qa' 'ec ỹaviquetaugui. 17Qam ¡ne'laqataxanto na'laañi cá'ogue ca chalego lecaic nesallaxa!
Ca ná'ogue na nashillipi lo'o ana qom lahi' huaxaỹaqse, chaqai ná'maq li'ỹaac qomyipi, chaqai ná'maq huaxaỹaq lo'ollipi, chaqai ná'ogue ná'maq ro'ueenataxantac hueetañigui na huaxaỹaq, na'maxare qoỹoqote'oga. 18Ca na' iuane'ta so lesalaxaripi na' qaicopata'a yi na'a' lodegaxat, ca' ỹaualqagui, 'naac:
—¿Negue' queto' aca liỹa na'a' 'nejem anajo chalego lecaic na'a'?
19Ca nemeetese'e naua lqahigo' quena 'laua, noỹentagui, rapooteseguelec, 'neracsa':
—¡'Agai, ỹaatqajam chalego le'xoric yí'maq chalego lecaic na'a'! Ma' queda lesallaxa resalligui ná'ogue ná'maq 'ue ana looỹac qom lahi' huaxaỹaqse cana huaaxai. ¡Qam ne'laqataxanto quiyim ná'ogue na'laañi!
20Qam qami' piguim, chaqai qamiri lelaatqa so Jesús, chaqai ná'maq letaxaỹaxaquiripi ñi qota'a, chaqai ná'ogue ná'maq lalamaxareteripi ñi'maxare, netooñigue yijo na'a' lodegaxat, ma' ñi qota'a ỹo'uet da nouaxanaxaset yi'maxare, ma' sougui dá'maq 'ne'teguelo qamiri.
21Ca na'le, ca' so nelaatec piguim le'ec quesaxanaxaic nanojshiguim so qa' 'ec ná'maq chalego lecaic qa' nopoxoiqataxanaxat quena trigo. Ca' inaxañigui aso huaaxai, ca 'naac:
—'Eda qohine'tegue ma'le ma' qanenaxañi yi chalego lecaic na'a' Babilonia, ca' tot qaica ma' liỹa quet qaiuana. 22Ca' tot qaica ca qara'xaỹa ma'le quenaua nayico yi na'a' ana neviigue chaqai na npe'te. Chaqai sqaica quet cá'maq ishit ỹo'uet canchaqaica no'ueenatec, chaqai tot qara'xaỹa ca lelamaxa ca nopoxoiqataxanaxat quena trigo. 23Chaqai tot qaiuana ca lauaq aca ncoỹeraxanaxaqui, chaqai tot qara'xaỹa quiyi na'a' ca laỹaac lemaqachic ca shilaq, 'eno'm nesallaxanqaipi quena 'laua ná'maq nemeenaxanyipi na'le, chaqai yiñi' ná'ogue ná'maq ỹoreta'oguit qomyipi queda qatoiquenataxanaxaqui'.
24Ma' quiyijo na'a' lodegaxat qaiuanalo naua leuo' ná'maq ỹa'xateta'pe naua la'qaatqa ñi qota'a, chaqai ná'maq lalamaxareteripi ñi'maxare, chaqai ná'ogue ná'maq qaỹalauat quena 'laua.
