Da nouaxanaxaset aso 'aalo ỹaatqajam nedequenaxai
1Na'le, ca' naari' so 'óna quesaua siete nelaatqa piguim lase' só'maq no'qoota'alo saua siete 'taxaqui'. Ca 'naapiguiỹa':
—Ỹala'e' na'itquena, sachaxanem aqami' dá'maq nouaxanaxaset añí'maq 'aalo ỹaatqajam nedequenaxai, añi'maxare nqa'xantalec na huaaxaipi. 2Na nashillipi quena 'laua mashic niyiquiñiguit añi'maxare. Chaqai ná'maq hueetalec ana 'laua ỹaatqajam quichigui da dequenaxac, 'ec ca qom quiyim qane'taxañigui ca lataxa.
3Ca na' ñaq sa'ajantac só'maq iuanaxanegue nqai'en aỹim so Espíritu Santo, ca' so nelaatec piguim le'ec yauega yi 'laua sqaica qom. Ca' quiyi, ca' seuana aso 'aalo neetalec so isecỹac lodegaxat, toc, naneretalec ná'ogue na loshicmaxa na nenqateripi se nqo'ta ñi qota'a. So'maxare siete saua lqahigo', chaqai diez aso lasote. 4Sojo 'aalo da lashicyaxague' naua loho ỹansañi tocalgoto, chaqai ná'maq ỹaatqajam toc. Nodaachiguiñi 'oro na no'ueetaxat, chaqai na qoỹoqota'a lo'yaxanec lashic qa', chaqai na qa' 'ec ỹaviquetaugui. Lo'qoota'a aso 'taxaqui 'oro no'qaachigui quená'maq qanaqaica'a chicqaugui da lapio'qotaxanaxac da nedequenaxac. 5Chaqai qoỹeretalec na latap so neenaxat se re'oq ca leloxoỹaxac. 'Neetasa': “Ana chalego lecaic Babilonia, late'e aná'maq nedequenaxaipi chaqai ná'ogue ná'maq qanaqaica'a quena 'laua.” 6Ca na'le, ca' yitan dá'maq 'neetari' aso 'aalo: quiñiuguetaxai, quiñiuguetqachit ná'maq leuoripi na lalamaxareteripi ñi qota'a chaqai ná'maq qaỹalauat, sauaxat quiyim ỹa'xatetac so Jesús. Ca na' seuanchigui dajo, ca' ỹaatqajam 'ue da i'laxa. 7Na'le, ca' so nelaatec 'naac caỹim:
—¿Chi'negue ma' 'ue da re'laxa'e'? Ỹim sa'deenaxanaxanegue qami' dá'maq leloxoỹaxac se re'xogui aso 'aalo chaqai só'maq isecỹac lodegaxat neetalec, yí'maq siete naua lqahigo' chaqai diez ana lasote. 8Só'maq isecỹac lodegaxat huañita nca'leetauco' quen nallaaqo', qam mashic tot qaica. Qam qaiyiita liỹa nenoxonshiguim ma'le chicqa'ña yi lapooqo' na lqui'i na leuaxaiquipi, ma' saqa' ỹovita cá'maq ỹaatqajam lelauaxa. Ca cá'maq hueetalec ana 'laua quená'maq se qoỹeretañi ca leenaxat caso lere lomalate na ca'laxaiquipi na' ñaqai chita'gue qaỹo'uet na 'laua, ca' 'ue ma'le ca le'laxa ma' iuana so isecỹac lodegaxat só'maq nca'leetauco' quen nallaaqo', qam mashic tot qaica, qam lotqai liỹa rapil ma'le.
9Ca dá'maq shim sa'xat nagui, da'maxare ỹouen ca na'deenec: Saua siete lqahigo' taỹauguilo saua siete quemaralgoto ladocai sauá'maq nqa'xantalgoto aso 'aalo. 10Chaqai qai'neeta saua siete lqahigo' ñiguilo saua siete nashil. Cinco sauá'maq mashic nachiñi. Quesauajo nashil 'oonoqui' ñí'maq ñaq relaataxantac nagui quesaua'maxare. Chaqai cá'maq liỹa saqa' novi'. Qam ma' novi' cá'maq co'uaataxanaxaic quenaua'maxare, ca' sqaỹaloq imeuo. 11Só'maq isecỹac lodegaxat só'maq nca'leetauco' quen nallaaqo', qam mashic tot qaica, chaqaiso só'maq pa'aatec nashi; 'eno'm so'maxare ỹalequetauguilo saua siete. Ca ma'le, ca' ỹaatqajam ileu.
12Sauá'maq huañitalo diez lasote, saua'maxare diez nashillipi, qam saqa' taañi relaataxan. Qam ỹaconchiguit quiyim nashil, relaataxane' ma'le caso 'óna hora, chaqai qai'neeta relaataxan so isecỹac lodegaxat. 13Ca' sauajo diez nashil ỹaatqajam natene'ejta', ca' ỹaantema da lquesaxanaxa quiyim relaataxan só'maq isecỹac lodegaxat. 14Ca' nco'uare'e' ma'le so 'ec qagreta llaalec, qam sqaica lovite', ma' so'maxare la'gaxala' na na'gaxalateripi chaqai lashi na nashillipi. Chaqai ná'maq lapoota'guit so'maxare noỹaxanqateripi chaqai nca'acseripi quiñi qota'a, chaqai ỹaqamaxatete' querelec.
15Qai'neeta 'naac caỹim so nelaatec piguim le'ec:
—Só'maq huañita huaaxaipi só'maq nqa'xantalec aso nedequenaxai, na'maxare chaqaina ná'ogue na qomyipi ỹoreta'oguit na la'qaatec. 16Ca' saua huañitalo diez lasote so isecỹac lodegaxat se nqo'ta ma'le aso nedequenaxai. Ca' ỹaatqajam qaỹalat, chaqai neetauec nqohin, ca' qaỹa'ic na la'at, chaqai qaỹalataq ma'le queca norec. 17Ca' ñi qota'a viichigui nqai'en na lauel quiyim qohine'tegue cá'maq ỹahotaque ñi'maxare, na' na'deenta' quiyim ỹaane' da lquesaxanqa' quiyim nashi so isecỹac lodegaxat, toco' ma' imigui dá'maq la'qaatec ñi qota'a. 18Ca só'maq 'aalo huañita na'le chaqaso asó'maq chalego lecaic na'a' só'maq ỹoiquentac ná'ogue na nashillipi quena 'laua.
