Salmos 24

₁Ñi qara'gaxala' lalamaxaret ná'ogue na 'laua,

lalamaxaret ná'ogue ná'maq 'ue,

chaqai ná'ogue ná'maq nca'leetauec hueetalec.

₂Ma' ñi qara'gaxala' ỹo'viijñi ca lo'xonaxala' na 'laua,

ca' ỹanalec ana huaaxai chaqai na lachiuguellipi.

₃Ca ¿negue' ca ishit quishi'megue añi quemaralec qa' ladocai lalamaxarete ñi qota'olec?

¿Negue' ca ishit shi'gom hueetaugui añi co'teeta qouagaxainaxaqui quiñi'maxare?

₄Cá'maq co'teete' naua lqai'laqate' chaqai añi le'taxanata

quená'ogue na nasauaxaset;

cá'maq se ỹashiila nqouagaxainot na nqolaquipi

chaqai se nallitalta'.

₅Ñi na'gaxala' ñí'maq qota'olec nca'laxaqui

nqouaguegue ma'le cajo ỹale chaqai ỹo'uet cá'maq ỹa'maqachiguiñi.

₆Ca' chaqaida dá'maq 'neeta quet cá'maq imitetaque ñi qara'gaxala',

cá'maq ỹahotaque reloqoto'ot ñi qota'olec queso Jacob.

₇¡Ca' huatouguilo naua lasomi' qaica lqodogue'!

¡Ca' chaqai 'neetari' nauatetauguilo,

ca' inoxono ma'le ca nashi 'ue da lauaq!

₈¿Negue' cá'maq nashi 'ue da lauaq?

¡Chaqaiñi ñi qara'gaxala' quesaxanaxaic chaqai 'ñaaxaic!

¡Chaqaiñi ñi qara'gaxala' 'ñaaxaic quena' nalauat!

₉Ca' ¡huatouguilo naua lasomi' qaica lqodogue'!

¡Ca' chaqai 'neetari' nauatetauguilo,

ca' inoxono ma'le ca nashi 'ue da lauaq!

₁₀¿Negue' cá'maq nashi 'ue da lauaq?

¡Chaqaiñi ñi qara'gaxala' ñí'maq qaica ca lqalanec!

¡Chaqaiñi ñí'maq nashi 'ue da lauaq!