Salmos 27

₁Ñi qara'gaxala' icoỹaraxanaxaqui chaqai ica'laxa,

ca ¿negue' quet cá'maq yo'chiitaque?

Ñi qara'gaxala' ro'ootaxanlec da ñachaalataxac,

ca ¿negue' quet cá'maq ỹa'ue ca iqolonaxa?

₂Na hualoxonyipi ñpa'guenaxauaripi

lapoỹata' quiyim yiloquin chaqai quiyim yapalaxatac;

qam chaqaina na'maxare ná'maq repoxolaxan chaqai huaañi.

₃'Eno'm yahiquinchiguiñi ca ỹalliripi nalauataxairipi,

qam se no'chi añi i'taxanata;

'eno'm na'maxajñi quiyim yiloquin,

qam ỹim yi'maqatapeuc.

₄'Oonoqui' cá'maq sashiilaxantaque quiñi qara'gaxala',

qaicaata yishiitaque:

Quiyim seuetaugui añi no'ueenaxanaxaqui quiñi qara'gaxala'

quenaua'que naua na'xata' quiyim yca'leetauec,

qaiyi ñqouagaxaintacot seuetaugui añi no'ueenaxanaxaqui

chaqai sa'ajantac da loyac.

₅Qaiyi ma' novite' caua se no'viiñi na'xata',

ñi qara'gaxala' ro'ootaxanlec aỹim ma'le quiñi no'ueenaxanaxaqui;

seueto'ot só'maq chi la'al quiyim ro'ootaxantapiguilec.

¡Yca'laxatec, ỹantalec aỹim aca qa' ladocai!

₆Ca ma'le, ca' seshit ñidaanshiguim,

ña'iita'ña ná'ogue na ñpa'guenaxauaripi;

ca seshit savigaxat ca ỹachitaxanataxanaxat cañi no'ueenaxanaxaqui,

chaqai yaualaq queda ñitoonaxac, chaqai so'ueenaxan, so'ueenaxantalec ñi qara'gaxala'.

₇Yaualqatacot qami' ỹa'gaxala' quiyim na'xaỹaxañiriua'.

Ñaq yi'xoriñi',

¡saachichiguit aỹim!

₈Añi i'taxanata 'naac caỹim:

Daañiraque quiyim huañita ñi qara'gaxala'.

Ca' ỹim sahotaque quiyim seuañiraxaua', qami' ỹa'gaxala'.

₉¡Totaxan nañoxochirapeguem aỹim!

¡Totaxan 'oiraiguit, ca 'yiraiguit!

¡Qaica quet cá'maq liỹa yotauan, qaqamite'!

Chaqai se yodaqajñiterec quiyim qaica ca se'guenot,

ma' qami' ica'laxaqui chaqai qota'olec caỹim.

₁₀Ma' 'enquetqai yalat ca ita'a chaqai aca ỹate'e,

qam qami' ỹa'gaxala' loqoisa'a ỹim.

₁₁Qami' ỹa'gaxala', chaxañirim ca nayicyaxaqui';

shique'tegue nqai'ñi' ca no'uen nayic,

sauaxat na ñpa'guenaxauaripi;

₁₂se yayaañirec quiyim yatoiquentac

ma' na'maxare mashic 'ue da la'xalenataxanaxac.

Sqai llic ná'maq ỹa'xatetac, ỹahotaque yiloquiaxan.

₁₃Qam ỹim ỹaatqajam sa'deenta

quiyim seuana ma'le ca lqouagaxa ñi qara'gaxala'

quedá'ogue da ñachaalataxac.

₁₄¡Pi'i'ta ñi qara'gaxala'!

¡Na'ñaxachi', totaxan reualliriñi!

¡Ajá'a, ỹaatqajam pi'i'ra'a ñi qara'gaxala'!