1Qam so Balaam co'na' iuana ñi qara'gaxala' ỹa'maxarenta quiyim ỹaanem da no'uen llicyaxac so Israel llaalqaipi. Ca' tot ishit quiyim pilalec ỹashiila ñi qara'gaxala' quiyim qoỹaanem ca la'qaatec 'nejem na' ñaqai 'aueta, ta'ta'a quiyim reloxoigue dá'maq pa'aata'gue yi 'laua qaica qom. 2Ca' so Balaam co'na' iuana so llaalqaipi so Israel naloqojonchiguiñi, ỹaatqa'tegue ná'maq chi ni'ic queca nco'matqa'. Ca' so ne'Espíritu ñi qota'olec ỹoiquentac retaqa nqai'en so'maxare. 3Ca co'na'le, ca' so Balaam 'ue ca la'qaatec, 'neetasa':
Da la'qaatec na Balaam ná'maq llaalec ñi Beor,
ná'maq ỹale ỹaatqajam qoỹoqo'tegue da leuanaxanaxac;
4ca quena' 'ue ca iuana, ca' ỹaatqajam re'qootec da leuanaxanaxac,
ca' 'vii naua qaỹauanaxanaxanque, chaqai 'vii naua qaỹa'deenaxanaxanque
chicqo'ot ñi qota'olec ñí'maq qaica ca lqalanec.
5¡Jacob, chalego loyaague' naua qauootochi' na'derañi!
¡Qami' Israel, chalego loyac na nco'matqachi'!
6Mashic 'ec chalego ladogolec chaaviquipi ỹo'viiquichiguiñi,
chaqai 'nejem ca nanaxanqa' hueeto'ot na lahi aca lachiugue,
chaqai 'nejem ana áloe, lanecse ñi qara'gaxala',
¡chaqai ana cedro hueeto'ot na lahi ca huaxaỹaq!
7Na llaalqaipi so Israel ỹaatqajam se ỹouen na laquip,
quiyim ni'chigui chaqai quiyim locoraxat ca lanec.
Ñi lashi loxonec ma'le ñi nashi Agag;
da lquesaxanaxa ñi nashi ỹaatqajam chalego lecaic.
8Ñi qota'olec ñí'maq naqata'a na'le quiyi Egipto yi'maxare,
ca' quiyi'maxare 'neetari' aca tooro lasote quiyim reloquilec.
Na Israel llaalqaipi ỹaatqajam nimiichiguiñi nqai'en ma'le ná'ogue na ỹoreta'oguit qomyipi pa'guenaxantac;
ỹaqaguit na lpi'nec
chaqai que'maqachit, ỹahote'e na lovic.
9Quena' ỹovita quiyim nco'matec nenanñi so Israel llaalqaipi,
ca' 'ec ca regat:
qaica ca ishit nqo'xon.
¡Ỹaatqajam qai'xoren cá'maq i'xoren yi'maxare,
qam ỹaatqajam 'ue da nqa'viic cá'maq se i'xoren yi'maxare!
So Balaam ỹa'xat da ñaqa naata
10Ca co'na' 'xaỹa dajo so Balac, ca ỹaatqajam ro'ỹa so Balaam. Ca' ỹouaxanta'ta' naua napoquena, ca' 'naac queso'maxare:
—Ỹim soỹaxana qami', ma' sahotaque quiyim se no'uen ca ra'qaachiqui' naqairelec na ñpa'guenaxauaripi. Qam nagui mashic ỹovi' tres quiyim lo'yaxanec dá'maq naqaiseguelec. 11¡Paguec la'maxa quiyim pilli' queca ra'aachi'! Ỹim shinac na'le quiyim so'uet ca remaqachiqui' lodegaxat, qam ñi na'gaxala' se ỹa'maxaren.
12Ca' so Balaam 'naaco' queso'maxare:
—Shi'gue shinac na'le quecaua relaataxahi': 13'Eno'm nañaañim cá'ogue ca 'oro chaqai ca plata hueetaugui na qauochi', qam ỹim se seshit ñapacalec ca la'qaatec ñi qara'gaxala', chaqai sqaica ca so'uet lo'yaxanec, loqo'm ca se no'uen, quiyim chaqai soiquentac. Chaqai qaicaata cá'maq yachilenegue ñi qara'gaxala', ca' chaqaica sa'xat. 14Ajá'a, sopil quecá'maq chi ỹa'a'. Qam nagui ma' saqa' seloqouec, ca' sahotaque sa'xachiraxarom dá'maq 'neeta ma'le yi qomyipi quena qauochi' laseripi.
15Ca' so Balaam co'na' retaqa 'naaco':
Da la'qaatec najo Balaam llaalec ñi Beor,
najo ỹale ỹaatqajam qoỹoqo'tegue da leuanaxanaxac,
16na'maxare quena' ỹovitot da leuanaxanaxac ỹaatqajam re'qootec nqai'en,
chaqai ỹa'deene' nauá'maq qaỹachaxanema quiñi qota'olec ñí'maq ỹomatalecna,
chaqai quiyim icoñiguit ca na'qaatec chaqai na leuanaxanaxac
chicqo'ot ñi qota'olec ñí'maq qaica lqalanec.
17'Ue ñí'maq ya'iita'a ma'le, ỹaatqajam qoỹoqo'ta ñí'maq ñi'pelaxanta'a:
ñijo 'ec ana huaqajñi chicqochigui ñi Jacob,
ñijo nashi ne'laxashiguim ma'le quena Israel.
Ca' co'vigui na lqahic na llaalqaipi so Moab,
co'vigui ná'ogue na llaalqaipi so Set.
18Loxonec ma'le yi Edom,
chaqai ỹomata'ta' ma'le yi Seir, yí'maq npa'guenaxaua.
Na Israel llaalqaipi ỹaatqajam 'xoic ca leloquiaxac.
19Cajo 'ñaaxaic chicqochigui ma'le ñi Jacob
chaqai nopoxoỹaxajñi ma'le na no'ueenañi queca na'a' lodegaxat.
(24.20-24 Liỹa la'qaatec so netaxaỹaxaqui Balaam.)
25Ca co'na' ime dajo, ca' so Balaam eec quepegue' ca la'a'. Chaqai so Balac qai'neeta pil.
(25.1—36.13 Ñi qota'olec se ỹa'maxaren qanqouagaxainot so nashiilec Baal. Qoỹiriñi qaiyi qaỹa'den ỹorete' so llaalqaipi so Israel, qaiyi qaneuagaxachigui yi 'laua queso ni'ic. So Moisés nca'au'a só'maq pa'a'ñi ma'le yi loma', ca' icona'a so Josué. Ỹa'xat dá'maq llicyaxac chicqota'gue da Egipto, ca' ỹovita yi Moab. Qaỹapaxaguine'tegue dá'maq 'ne'tegue ma' pacta aso lachiugue Jordán.)
