1Co'na'le, ca' so Balaam 'naaco':
—No'xoñirishiguim quenajo caua ỹouena siete ncopatoxonaxalate, chaqai 'maxachisañi caua siete huaqui llaalqa chaqai caua siete qagreta louaari.
2Ca' so Balac ỹo'uet dá'maq qohinapega queso Balaam. Ca' quesaua'maxare, ca ỹaando quiyim ỹavigaxat quiñi 'óna ca huaqui llaalec chaqai ca qagreta inaxarelec cañi 'óna quecaua ncopatoxonaxalate.
3Ime, ca' so Balaam 'naaco' queso Balac:
—Ro'viiñirañi quenaua qarachitaxanataxanqate. Ca' ỹim ñaqai saigue dajo, sha'apiguito' nachaxana ỹim ñi qara'gaxala'. Ca ma' ime, ca' sa'xatem qami' cá'maq ya'deenaxanaxanegue.
So Balaam ỹaanem da nqouagaxa so Israel llaalqaipi
Ca' so Balaam quepegue' aso quemaralec ladocai qaica qom, 4yí'maq hua'ño' na' qanachaxana quiñi qota'olec. Ca' so Balaam 'naaco':
—Mashic sa'maxatesañi yaua siete ncopatoxonaxalate, ca' quiyaua'maxare mashic sellaalec quiyim savigaxat ca 'óna huaqui llaalec chaqai ca 'óna qagreta.
5Ca' ñi qara'gaxala' ỹa'vii saua la'qaatqa so Balaam. Ime, ca 'naapego':
—Mo'e', pillita yi hueeta'ñi ca Balac, ca' 'xachitem ma'le da ỹa'qaatec saanem qami'.
6Ca' so Balaam pil, ca' natenejlec so Balac hueetau'e na lahi aso ncopatoxonaxalate, liỹaatac sá'ogue so nashillipi quiyi Moab. 7Ca' so Balaam ỹa'xate' daua la'qaatqa ñi qota'olec:
Ỹim sachicqochi'ñi yi 'xoic ana qa' ladocai queda lqodoigue quiyi Aram,
ñanaiquena nqai'en ñi Balac, nashi quena Moab.
Dá'maq 'naac na'le 'neetasa':
Na'itquena, qaiyi naqairelec ca se no'uen ra'qaachiqui' na Israel llaalqaipi,
naqairelec ca se ỹa'maxañi ra'qaachiqui' na lauo' so Jacob.
8Qam ¿negue' quet cá'maq shinta'gue quet quiyim senaxalec quet cá'maq se no'uen cá'maq ñi qota'olec mashic ỹaanem da lqouagaxa?
¿Negue' quet cá'maq 'neeta quiyim sahotaque ca se no'uen quecá'maq nqouaguegue ñi qara'gaxala'?
9Cana seuetalec qoỹoqoshi'megue qa', qam qaiyiita sedaanta'a,
canajo qoỹoqoshi'megue qa' ya'iita'a yi qomyipi ỹaatqajam noỹootetec,
sqai 'nejem na liỹa qomyipi.
10Yi'maxare 'nejem na lamoxoỹaxa, qaica ishit naloqochin.
¿Negue' quet cá'maq ỹa'den ỹorete' yi'maxare?
¡Chalego la'maxa queta' yileu shinta yí'maq qomyipi, ma' ỹaatqajam no'uen da llicyaxac,
chaqai ca iqodoc 'nejem quet ca lqodoc yijo qomyipi!
11Ca' so Balac 'naac queso Balaam:
—¿Negue' dá'maq 'ñi'sa'pegue? Ỹim ñoviraxat qami' quenajo, ma' sahotaque se no'uen ca ra'qaachiqui' naqairelec na ñpa'guenaxauaripi, qam qami' naqaiseguelec da no'uen llicyaxac.
12Ca' so Balaam 'naaco':
—Shi'gue shinqac quiyim qaicaata cá'maq nañaañim ñi qara'gaxala' quiyim sa'xat, ca' qaicaata shinac.
13Qam so Balac 'ue da lepagaxallic. Ca 'naaco':
—Ỹala'e', qolaxapegue' yi liỹa 'laua, yí'maq hua'ñi quiyim huañita ma'le naua lahil yí'maq co'matqa'. Ca' quiyi, ca' se no'uen ca ra'qaachiqui' naqairelec yi'maxare.
14Ca' so Balac ỹauega so Balaam yi no'ueenaxa nquenoxonqa' quena roto ada qa' ladocai leenaxat Pisga. Hua'ño'yi na'le, ca lotqai liỹa no'xonshiguim saua siete ncopatoxonaxalate, ca lotqai illaalec ca 'óna huaqui llaalec chaqai 'óna qagreta cañi 'óna ncopatoxonaxalate. 15Ca' quiyi, ca' so Balaam 'naaco' queso Balac:
—Ñaq qovire'e najo na hueeta'ñi na nachitaxanataxanaxat. Ca' ỹim saigue dajo, qaiyi ñiuane'e' ñi qota'olec.
16Ca' ñi qara'gaxala' lotqai nachaxana so Balaam, ca' ỹa'vii saua la'qaatqa queta'le. Chaqai qai'neeta 'naaco':
—Pillita yí'maq hueeta'ñi ñi Balac, ca 'xachitem ma'le dá'maq ỹa'qaatqaipi saanem qami'.
17Ca' so Balaam pil, ca natenejlec so Balac huaqate'e' so nachitaxanataxanaxat, liỹaatac sá'ogue so nashillipi quiyi Moab. Ca' so Balac renataxano':
—¿Negue' ca 'naac cá'maq na'gaxala'?
18Ca' so Balaam ỹa'xato' dá'maq la'qaatec ñi qota'olec, 'neetasa':
Qami' Balac, qami' llaalec so Zipor,
ỹaatqajam na'xaỹaxañiteta aỹim.
19Ñi qota'olec mesqai 'nejem ca chaqai qom, ma' ca qom 'ue ca lqodoc:
ñi'maxare se na'majan chaqai se ỹadalaxat ca la'deenataxanaxac.
Ma' ñi'maxare quena' 'ue da 'naac, ca' ỹo'uet.
Chaqai quena' 'ue da ỹaanec la'qaatec, ca' ipacqajanchigui.
20Ỹim qanañaañim quiyim setaqa, qam saanec ca qouagaxa;
ca no'm ñi qota'olec nqouaguegue, ca' ỹim se seshit squepaxat ca lqouagaxa.
21Qaica ca iuana ca na'maachic chaqai ca se no'uen quena llaalqaipi so Israel, só'maq 'auaxaic leenaxat da Jacob.
Ñi la'gaxala' qota'olec ỹalequetauguilo naua'maxare,
chaqai na'maxare ỹaualqatalec ñi'maxare, 'neeta'gue meca lashi.
22Ñi qota'olec ñí'maq naqata'a na'le quiyi Egipto,
quena'maxare 'neetari' ana lasote na tooro quiyim reloquilec.
23Quena llaalqaipi so Jacob qaica ca 'negue quiyim qainaxalec ca se no'uen,
quena Israel llaalqaipi qaica nqai 'negue nqai'en cá'maq qohine'tegue ca ne'naxac.
Ca' nagui qaidaata quiyim qohinac quena Israel:
¡Ỹaatqajam 'xoic na ỹo'uet ñi qota'olec caqami' ỹo'uet da ne'laxa!
24Najo qomyipi quiyim ne'laxashiguim
ỹaatqajam qaica 'nejem da lichic 'ec ca regat,
chaqai se nco'matec quiyim saqa' qo'oc cá'maq letoc,
quiyim saqa' ni'chiguilo caua leuo' ca loxonec.
25So Balac 'naaco' na'le queso Balaam:
—¡Ca' totqai shichi' quiyim naqairelec ca se no'uen ra'qaachiqui' najo qomyipi, ca 'maxaraic quiyim sqai naqairelec cá'maq no'uen ra'qaachiqui' qai'neeta!
26Ca' so Balaam 'naaco':
—¿Mesqai shi'gue shinac caqami' quiyim ỹim se seshit ỹoqa'a cá'maq sa'xat quecá'maq qaỹamaxailec quiyim shinac quiñí'maq qara'gaxala'?
27Ca' so Balac 'naaco' queso Balaam:
—Ỹala'e', ñaq saviquita yi liỹa 'laua, sha'apiguito' quiyim ñi qota'olec se ro'o, no'm se no'uen ca naqairelec ra'qaachiqui' yi Israel llaalqaipi quiyi'maxare.
28Ca' so Balac ỹavicshiguim so Balaam cana roto aso qa' ladocai leenaxat Peor. Ma' quiyi, ca' re'qoota yá'ogue yi 'laua qaica qom. 29Ca' quiyi, ca' so Balaam 'naaco' queso Balac:
—No'xoñirishiguim quenajo caua ỹouena siete ncopatoxonaxalate, chaqai 'maxachisañi caua siete huaqui llaalqa chaqai caua siete qagreta louaari.
30Ca' so Balac ỹo'uet dá'maq 'naac so Balaam. Ca' cañi 'óna ncopatoxonaxalate illaalec ca 'óna huaqui llaalec chaqai ca 'óna qagreta.
