So Balac relaataxana so Balaam
1Ca' so Israel laseripi liỹa eec quecá'maq taata'gue. Ca' nco'matec quiyi 'laua leenaxat Moab, pa'aata'gue da lqodoigue caso lachiugue Jordán, naloote'oga yi Jericó.
2Ca' so Balac só'maq llaalec so Zipor, so'maxare iuanchigui so llaalqaipi so Israel quedá'maq 'ne'teco' na'le queso amorreo laseripi. 3Chaqai so qomyipi na'ñi yi Moab ỹaatqajam 'xoic da lqolonaxa na' idaana'guit so Israel llaalqaipi quiyim ỹaatqajam 'xoic. 4Co'na'le, ca' so qomyipi na'ñi yi Moab 'naaco' queso qo'xoiquipi na'ñi yi Madián:
—Ná'ogue najo qomyipi nomajñi ma'le na neetalec na qana'laua, 'nejem ca nauegaxanaxala' ñii'lola quiyim ỹaatqajam nomateta na 'uaqapi queca no'ueenaxa.
Ma' quesaua liỹa' ñaxari so Balac ỹaatqajam nashi quena Moab. 5Ca roỹaxano' so Balaam só'maq llaalec so Beor. So'maxare neeta'ño' yi Petor, yí'maq huaqate'e' aso lachiugue Eufrates quiyi na'laua so Amav. So Balac 'naaco' quesaua lelaatqa quiyim 'nerac queso Balaam:
—'Xoic yi qomyipi chicqota'gue da Egipto, ca na'maxare neuagaxajlec nagui na 'laua. Chaqai nagui neetalec na yaloote'oga 'laua. 6Ca' ỹim sa'deenta quiyim 'ue ca naqairelec ca ra'qaachiqui' lo'yaxanec loqo'm ca se no'uen, qam ipaquichigui cá'maq 'ñirac. Ca' no'uen quiyim se naỹaloxoriñi' quiyim na'itegue najo, ca' se no'uen ca naqairelec ra'qaachiqui', qaiyi se no'uen ca llicyaxac ma'le najo qomyipi, ma' se yalo'guit na'maxare. Sha'apiguito' quiyim ỹoxonec na'maxare, ca' so'daauec quena ña'laua.
7Ca' so qo'xoiquipi neeta'ñi yi Moab chaqai yi Madián, ca sá'ogue eec, lo'qoota'a ana lam, ma' ỹahotaque ishiueten ma' se no'uen ca na'qaatec. Ca co'na' qoỹovita yi neeta'ñi so Balaam, ca' qaỹa'xatem dá'maq 'naaco' na'le so Balac. 8Ca' so Balaam 'naaco' quesaua'maxare:
—La'xaỹa'ñi najo quena pe. Ca ma'le, ca' 'ue ca shinac ma' ỹaataq cá'maq 'naac ñi qara'gaxala'.
Ca' so qo'xoiquipi na'ñi yi Moab la'qa'ñi yi'maxare queso pe. 9Ca' queso pe, ca' ñi qota'olec nachaxana so Balaam. Ca' inatetac, 'naaco':
—¿Nega'ỹo' ná'maq ỹalliripi hueeta'ñi na ra'aachi'?
10Ca' so Balaam 'naaco':
—Ñi Balac, ñí'maq llaalec so Zipor, ñí'maq nashi quiyi Moab, nelate' quiyim 'nerac caỹim 11quiyim 'ue ca qomyipi chicqota'gue da Egipto, ca neuagaxajlec ná'ogue na 'laua. Ca' ñi Balac ỹahotaque quiyim chaqa'ma' shic, se no'uen ca ỹa'qaatec senaxalec. Sha'apiguito' quiyim ishit quiyim loxonec, ca' ỹo'daauec quiyi na'laua.
12Co'na'le, ca' ñi qota'olec 'naaco' queso Balaam:
—Totaxan oquiteguelo chaqai se na'aa ca naqairelec ra'qaachiqui' najo qomyipi, ma' najo qomyipi mashic shi'gue saanec da ỹa'qaatec quiyim ño'ueenaxat ca llicyaxac.
13Ca' queso liỹa na'xa'a na' nete'etam co'na' ne'laxashiguim so Balaam. Ca 'naaco' queso nashillipi nelaatqaipi queso Balac:
—Mohi, pilliỹa ca 'laua chigoxoiỹa'a, ma' ñi qara'gaxala' se yasen quiyim shigueguelo qamiri.
14Ca' so nashillipi quiyi Moab pila yí'maq neeta'ñi so Balac. Ca 'neraco':
—Ñi Balaam se nasapet quiyim nagueguelo qomi'.
15Qam so Balac 'ue da lepagaxallic. Ca' lotqai ỹa'vii saua liỹa' ilate' nashil, paguec viteu' chaqai paguec qaimaqachine', mesqai 'nejme' saua 'auaxaqa. 16Saua'maxare que', querepegue' so Balaam. Ca co'na' ỹovijta, ca 'neraco':
—Ñi Balac, ñí'maq llaalec so Zipor, nela' da la'qaatec quiyim: Qouaqui' nanaqui', 'neeto' lotqai se rasapchi'. 17Ca' ỹim paguec semaqachiñi' ma'le, chaqai sa'ue cá'ogue cá'maq shiilaxañiraque. Qam na'itquena qouaquiric, se no'uen ca naqairelec ra'qaachiqui' yijo qomyipi.
18Qam so Balaam 'naaco' queso'maxare:
—'Eno'm ñi Balac nañaañim cá'ogue ca 'oro chaqai ca plata hueetaugui ñi lauo', qam ỹim sqaica ca seshit so'uet ca cocho'qui' loqo'm lodegaxat, quecá'maq se ỹamaxailec ñi ỹa'gaxala' qota'olec. 19Qam qaiyiita ro'viiñiỹañi la'xaỹa'ñi najo quena pe, toco' ma' sa'den cá'maq 'naac ñi ỹa'gaxala'.
20Ca' queso pe, ca' ñi qota'olec nachaxana so Balaam. Ca 'naaco' queso'maxare:
—No'm yauajo ỹale' nacte qami', ca' quiteguelo, qam qaicaata cá'maq shinac, ca' chaqaica 'viichi'.
So Balaam qaỹanaqta'guit queso nelaatec chicqashiguim
21Ca' queso liỹa na'xa'a, ca' so Balaam ỹo'ueejlec aso lañaxalate 'ashina, ca' eec, queguelo saua nashil chicqora'gue da Moab. 22Ca' so Balaam neetalec aso 'ashina, ca' qaicoỹa' quesaua dos lelaatqa.
Qam ñi qota'olec ro'ỹo' na'le so'maxare sauaxat ma' eec. Ca' qaỹanaqta'guit queso chicqashiguim lelaatec ñi qara'gaxala', quepaqchiguit queda llicyaxac. 23Ca co'na' aso 'ashina iuane'ta so nelaatec chicqashiguim quena lavinñi so nayic, lo'qoota'a so lecat, ca' ỹoxouec queso nayic, ca quelec so no'ueenaxa. Qam so Balaam ỹouaxan, ma' ỹahotaque pila'a nqai'en so nayic. 24Ca co'na' ime, ca' so nelaatec quiñi qara'gaxala' qata'ñi yí'maq paguec lqalaqa' so nayic, yí'maq so nayic quiichicñigui yi 'uva lomaateripi. Ca' 'vii naua lquepaqatqate' naua lahil so nayic qano'xonshiguim quena qa'. 25Ca co'na' aso 'ashina iuane'ta so lelaatec ñi qara'gaxala', ca' huaxauo queso nquepaqataxanaxat, ca pataqauo so lichi so Balaam. Ca' so Balaam lotqai liỹa ỹouaxan. 26Qam so lelaatec ñi qara'gaxala' qata'a yí'maq paguec lqalaqa' so nayic, cá'maq hua'ñi quiyim qaica ca ỹa'maxañi ỹoxouec. 27Ca co'na' aso 'ashina iuane'ta so lelaatec ñi qara'gaxala', ca' nenanñi. Ca ro'o' na'le so Balaam, ca ỹahote'e qo'paq na' ỹouaxan. 28Ca' queco'na'le, ca' ñi qara'gaxala' retaqa nqai'en aso 'ashina quiyim 'naapega so Balaam:
—¿Nega'ỹo' cá'maq se no'uen shi'ntegue caqami'? Ma' nagui mashic tres youaxañi'.
29Ca' so Balaam 'naaco':
—Mashic chi yi'ñirari', quetqai 'ue ca llicat nagui, ca chaqa'ma' salauachi'.
30Qam aso 'ashina 'naaco':
—Ỹaatqajam ỹim qañaxalachi'i' quenaua'que naua na'xata'. Chaqai qami' 'yiiñite' quiyim se ỹauanapega shine'tegue qami' dajo.
Ca' so Balaam 'naaco':
—Ajá'a, llic.
31Co'na'le, ca' ñi qara'gaxala' ỹo'uet quiyim so Balaam iuane'ta so lelaatec ñi qara'gaxala' hueeta'ñigui na lavinñi so nayic, lo'qoota'a so lecat. Ca' so Balaam ỹa'chi'iñi naua le'cootal, ca ỹoviraqta'guit na latap na 'laua. 32Qam so lelaatec ñi qara'gaxala' 'naaco' queso'maxare:
—¿Chi'negue ma' tres huaxañi' añi qalo'e' 'ashina? Ỹim ná'taq sapo'guit na qayiqui', ma' se yqo'ta da qayicyaxaqui'. 33Ca ná'maq 'ashina iuana aỹim, ca' tres huaq, ca' ỹoxouec. Quetaxañi' shi'gue salauachi', qam añi'maxare ñca'laxatetauec queta'le.
34Ca' so Balaam 'naaco' queso lelaatec ñi qara'gaxala':
—'Uo' ca ỹasauaxaset, ca' se sa'den quiyim viisa'ñi yi'maxare qachisa'ñigui na nayic. Ca no'm sqai 'maxariñi' quiyim shic, ca' sopil.
35Qam so lelaatec ñi qara'gaxala' 'naaco' queso Balaam:
—Qami' shichi' quiteguelo nauajo ỹale'. Qam qaicaata cá'maq ỹa'qaatec 'xachi'.
So Balac queeta'guit so Balaam
Ca' so Balaam queguelo saua nashil nelaatqa queso Balac. 36Ca co'na' so Balac ỹa'den quiyim so Balaam naqueta, ca ca'guit quiyi na'a' huaugui yi Moab, hua'ñi yi leseeque'ta aso lachiugue Arnón, quiyi lqodoc yi na'laua. 37Ca 'naaco' queso'maxare:
—Ỹaatqajam 'ue da ipagaxallic quiyim qoỹaxantaque qami'. ¿Chi'neco' ma' sham se nanaqui'? ¿'Neetapiguio' qavilli' quiyim sqai 'xoic lemaqachic nqaishin aqami'?
38Ca' so Balaam 'naaco' queso'maxare:
—Nagui, ca' ñovita qami' ña'ajnaxañiraxaua'. Qam tot qaica ca iquesaxanaxa quiyim soiquentac ca ỹa'qaatec; ma' qaicaata cá'maq 'naac ñi qota'olec quiyim shinac, ca' chaqaica sa'xat.
39Na' ime, ca' so Balaam eec, liỹaatac so Balac, querepegue' yi Quiriat-huzot. 40Ca hua'ño'yi na'le, ca' so Balac relaataxanlgoto saua huaca quiyim qaỹalauate' chaqai saua qagreta. Ca' so la'at relaataxanlec quiyim qaỹodo quiyi neeta'ñi so Balaam chaqai so nashillipi liỹaatac.
41Ca' queso liỹa nete'e na' nete'etam, ca' so Balac i'guena'a so Balaam, ca' ỹavicshiguim caso Bamot-Baal. Ca' yí, hua'ño' na' iuana cá'ogue ca neeta'ñi nco'matqa' so Israel llaalqaipi.
