Dajo na'qaatec 'naac qanadalaxashiguim da nelaataxanaxac. Liỹa qaỹa'ajanta dá'maq nelaataxanaxac qaicoñiguito' na'le quiyi Sinaí. So Moisés liỹa ỹa'xate' naua chalego lecaigue' ỹo'ueete' ñí'maq qota'olec chaqai ná'ogue ná'maq lqouagaxaquipi ñi'maxare, shi'gue na' ñaqai chita'gue ca'e yi Egipto. Vichiguiño' so'maxare ỹilen so qomyipi quiyim nqo'ta chaqai imaqachin ñi qota'olec. Na' ime, ca' so Moisés poyiguin, niquine'e' so qomyipi, ca' no'ueenaqtañi so Josué quiyim qalam nashi.
(1.1—5.33 Dá'maq la'qaataxanaxac so Moisés ỹa'xateta dá'ogue dá'maq 'neeta na' qoyiquetalec yi 'laua qaica qom. Liỹa qaỹa'xat dá'maq 'neeta so diez nelaataxanaxaquipi.)
Dá'maq paguec lecaic naqataxac
1Ca' so Moisés 'naaco':
—Najo ná'maq nelaataxanaxaquipi chaqai na naqataxaquipi chaqai la'qaatqaipi ñi ra'gaxalari qota'olec ỹamaxalgoto aỹim quiyim sapaxaguineguelo qamiri, qaiyi napaxaguiñiỹa quiyim 'viichii ma' viri quecá'maq 'laua qaỹauaaque ñiỹalec. 2Qaiyi ro'chiỹa ñi ra'gaxalari qota'olec, ca' pacqajñichiguilo quiyim ñaq rca'lliitauec naua'que naua laqataxaco chaqai naua lelaataxanaxaco selarelgoto qamiri, chaqai naua qachaalaxahi chaqai caua qauari, qaiyi ladoc aca rqauaxaguii. 3Ca' vichiguiño' qamiri Israel llaalqaipi, napaxaguiñiỹa quiyim 'viichii dajo. Qaiyi qaicanqaida queda qayicyaxaguii, ca chi ỹovireto'o' quiyim qamiri 'xoic ma'le quena 'laua quiyim ñiitalec. Najo 'laua ná'maq sqoue na huaca lo'i' chaqai na rapic li'i. Ca' ỹaatqajam ipaquichigui dá'maq ỹachaxantac ñi qara'gaxala' qota'olec quesaua 'auaxaqa qata'allii.
4Ñaq na'xaỹaxañii, qamiri Israel llaalqaipi: Ñi qara'gaxala' qota'olec coqomi', ñi'maxare qaiñiita qara'gaxala', qaica ca liỹa.
5Ỹaatqajam rqo'chita ñi qara'gaxala' qota'olec, machiro'ot añi re'taxanata'e', chaqai dá'ogue da nachaalataxaqui' chaqai dá'ogue da rquesaxanaxa'e'.
6Ỹaatqajam lli'chirigui na rqahiqui' ná'ogue ná'maq sa'xatetac nagui caqami'. 7Chaqai se neme paxaguiñisa'peguelo caua qachaalaxahi'; se coua'ira'ahi 'xachisapeguema quiyim ñiisa'ñi ca ra'aachi', loqo'm quiyim quiisa'gue ca nayic, chaqai quiyim nenañiriñi, chaqai quiyim ne'laxachirishiguim. 8Ỹaatqajam 'xachite' nauajo nelaataxanaxaco, coñichisau'alo naua rqai'laqachichi' chaqai quena ratapi' chi netanec caqami'. 9Chaqai 'chirelec qai'neeta caua na'chi'ñi chaqai queca lasom ca qauochi'.
So Moisés qatetapega quiyim na'xaỹaxanta so Israel llaalqaipi
10Ñi ra'gaxalari chaqai qota'olec caqamiri, ñi'maxare inoxonaxatero qamiri ma'le quiyi 'laua ỹachaxantac na'le ỹahotaque ỹaanema saua 'auaxaqa qata'allii Abraham, Isaac chaqai so Jacob. Chalego lecaic chaqai loyac yi na'aateripi quiyijo 'laua, se ro'ueenachiguii qamiri yi'maxare. 11Na 'imqaipi no'qaachigui quená'maq no'uen nouenec, qam qamiri sqai ỹoxoiỹougui; chaqai ana ni'ỹa mese ri'ỹahi, chaqai na nanaxanqa' 'uva loma' chaqai na olivo loma', qamiri sqai ñiiñi. Qam qamiri 'guii ma'le ana la, chi ỹovireta'a rquemari. 12Qam ma' ỹovirelec dajo, 'neeto' lotqai couahitaque ñi qara'gaxala', ñí'maq naqata'alo qamiri na'le quiyi Egipto, na' qamiri na'aqa. 13Nqouagaxaiñitacot ñi na'gaxala' qota'olec caqamiri, qaiñiita 'ueenataxañitacot. Ca quiyim ỹovirelec quiyim 'ỹaañiuec ca ra'qaachiguii pacqajñichigui, qam quiichigui nqai'ñii da leenaxat ñi qara'gaxala'. 14'Neeto' quiita'pegue' na nqolac ná'maq nqouagaxaintacot na liỹa qomyipi qauorahi. 15Ma' ñí'maq na'gaxala' qota'olec caqamiri neetauguilo qamiri, ñi'maxare ỹauoteguelo qamiri. Sqoue ro'ỹalo qamiri, ca ỹopoxoỹaxachiguilo qamiri.
16'Neeto' 'guiñi'sac ñi qara'gaxala' qota'olec caqamiri, 'nejem dá'maq qohine'tegue na'le hua'ñi yi Masah. 17Ỹaatqajam qamaxachita pacqajñichiguilo naua lelaataxanaxaco ñi na'gaxala' qota'olec caqamiri, chaqai naua la'qaatqa chaqai naua laqataxaco caqamiri. 18'Viichi' nauá'maq ỹa'marichiriñi chaqai nauá'maq ỹa'maxarente' ñi qara'gaxala', qaiyi qaica canchaqaica queca qayicyaxaguii, chaqai quiyim ñiỹalec yí'maq no'uen 'laua yí'maq ñi qara'gaxala' ỹachaxantapeguema yaua 'auaxaqa qata'allii, 19chaqai quiyim ñi qara'gaxala' 'eet nqai'en ná'ogue na npa'guenaxauahi quená'maq ỹahotaque reloqoguita qamiri, ma' ỹaatqajam ipaquichigui nqai'en da la'qaatec ỹaanema qamiri.
20No'm 'ue ca na'xa'a inate' qamiri caua qachaalaxahi: ¿Negue' cá'maq 'neete' dauá'maq nelaataxanaxaco, naqataxaco chaqai na na'qaatqaipi qaỹamaxalgoto qomi' quiñi qara'gaxala' qota'olec?, 21ca' qamiri 'ñiỹac: Qomi' la'aqa na'le so Faraón quiyi Egipto, qam ñi qara'gaxala' chalego lquesaxanaxa na' naqata'alo qomi'. 22Qomi' ỹaatqajam seuanqachigui na'le ná'maq chalego lecaic chaqai ná'maq chalego lichic ỹo'uet ñi qara'gaxala', chaqai na netanqaipi ỹo'uet da ne'laxa quiyi Egipto na' ỹo'uet da nouaxanaxaset so Faraón chaqai sá'ogue só'maq lotauaripi. 23Qam naqata'alo qomi' quiyi'maxare, ca' qarauega yi 'laua ỹachaxantapeguema saua 'auaxaqa qareta'al, ca ỹaanema qomi'. 24Ca na' ime, ca' ñi qara'gaxala' qota'olec, ca' qarelarelec quiyim so'ueetaq ná'ogue na lelaataxanaxaquipi quiyim se ñapacqalec ñi'maxare, qaiyi qaicanqaida coqomi', chaqai qaiyi ñi'maxare nca'leesauec nqai'ne' qomi', chi ỹovireta'a nagui. 25Ca' vichiguiño' qomi' so'ueetaxe' sepacqajanqachiguilo naua lelaataxanaxaco ñi qara'gaxala' qota'olec quedá'maq 'naapegoxoua'.
