Deuteronomio 7

₁Ñi na'gaxala' ñí'maq qota'olec caqamiri inoxonaqta'a ma'le qamiri ca 'laua cá'maq ñiỹalec ma'le. Ca ỹo'daauec ma'le huañichigui ca siete ỹoreta'oguit qomyipi paguec lecaic chaqai paguec lquesaxanaxa caqamiri: na hitita laseripi, na gergeseoipi, na amorreoipi, na cananeoipi, na ferezeoipi, na heveoipi chaqai na jebuseoipi. ₂Ma' ñí'maq ra'gaxalari qota'olec ỹo'uet quiyim qadoxoñiguii yijo qomyipi, ca ma' qadoxoñiguii, ca' ỹaatqajam nomachichiguiñi. Qaica ca no'ueenashiguim nqai'ñii, chaqai qaica ca na'yiiñiguit quiyim rqouaguigue. ₃Chaqai se na'aaquiñiguit yi'maxare. Chaqai quena qachaalaxahipi ne'naqaipi chaqai na nequetegaxaipi sqo 'naxañiguit na llaalqaipi chaqai na llaallipi yijo qomyipi. ₄Ma' yi'maxare ỹo'uet ma'le quiyim na qachaalaxahipi noỹootec quiñi qara'gaxala', chaqai nqouagaxainot ca nadenqatec nqolac. Ca' ma'le, ca lonogoxonaxac ñi qara'gaxala' taalgoto qamiri, ca' 'ec ca qatagoxosoxonaxac, ca' ỹopoxoỹaxachiguilo qamiri. ₅Vichiguiño' qamiri paguec la'maxa quiyim poxoỹaxachigui ana lcopatoxonaxalate na'maxare; ỹaatqajam nopoxoỹaxachiñi na qaripi chaqai ana qo'paq loỹo quená'maq hua'ñi na nqouagaxainqa' na'maxare, chaqai copachiu'a na lashiilqaipi. ₆Ma' qamiri ỹaatqajam qaỹoỹooterec, qaiyi ỹaatqajam qamiri lalamaxarete' ñi qara'gaxala' qota'olec caqamiri. Ñi qara'gaxala' qamiri lca'acse' quená'ogue na qomyipi hueetalec na 'laua, qaiyi ỹaatqajam qamiri lalamaxarete' ñi'maxare.

₇Ca no'm ñi qara'gaxala' ỹaatqajam nca'au'alo qamiri, mesqai dá'maq quiyim paguec qamiri 'xoic quená'ogue na ỹoreta'oguit qomyipi. Ma' llicsa quiyim qamiri paguec sqo vito'olqai' quena'maxare. ₈Ñi qara'gaxala' naqata'alo qamiri quiyi Egipto yí'maq ñiita'ñi na' qamiri na'aquipi, ca' ỹahote'e dá'maq chalego lecaic lquesaxanaxa na' naqata'alo qamiri queso Faraón, ma' i'xorene' qamiri chaqai quiyim ỹahotaque ipacqajanchigui dá'maq la'qaatec na' 'ue da ỹaanec la'qaatec queso 'auaxaic qataa'illipi. ₉Ca' vichiguiño' ñaqai 'yiiñi'a ñi qara'gaxala', ñí'maq qota'olec caqamiri, quiyim chaqaiñi ñí'maq ỹaatqajam ỹoiquentac ná'ogue chaqai ỹaatqajam ipacqajanchigui cá'maq na'deenaxac queso 'au qareta'allipi, ca chi ỹovireta'alo qomi' quená'maq nqo'ta ñi'maxare chaqai ipacqajanchigui da lelaataxanaxac. ₁₀Qam ỹaatqajam ỹopoxoỹaxachigui cá'maq ro'ỹa ñi'maxare, ca' ỹa'ue cá'maq ỹaatqajam 'chiichiguiñi nouaxanaxaset. Ca' ¡ỹaatqajam se ỹaỹaloxon quiyim ỹa'ue ca nouaxanaxaset cá'maq noquii'a ñi'maxare! ₁₁Ca' pacqajñichiguilo naua lelaataxanaxaco, laqataxaco, la'qaatqaipi selarelgoto qamiri, ca' quiilgoto quiyim 'viichii'.