So llaalqaipi so Israel totqai huelec ñi qota'a
1Co'na'le, ca' so Israel llaalqaipi ỹaualqatagui, ca' sá'ogue so pe noỹentagui. 2Ca sá'ogue so qomyipi se no'uen na ỹa'xat taalec nqai'en so Moisés chaqai queso Aarón, 'naaco' quen:
—¡Saxanchi' qareleualco' na'le yi Egipto loqo'm quenajo 'laua qaica qom! 3¿Chi negue' cá'maq 'neco' quiyim ñi qara'gaxala' nauegue'ogalo qomi' najo 'laua, chi ỹahotaco' qareleu meca lauataq chaqai quiyim na qaroua 'aallipi chaqai na qochaalqaipi noxonec ma'le quena qanpa'guenaxauaripi? ¡Paguec la'maxa queta' sopilaq queda Egipto!
4Ca chaqa'ma' retaxaỹata', ca' quiñi 'óna 'naapega ñi liỹa:
—¡Sahoqe ca qarashi, ca' sopilaq queda Egipto!
5Ca' so Moisés chaqai so Aarón ỹa'chi'iñi naua le'cootal, ca ỹoviraqtera'guit naua lataapi' na 'laua, ỹaatqajam qaiuanchiguilo quesá'ogue so qomyipi. 6Ca' so Josué chaqai so Caleb, ma' qai'neeta ra'ajnaxanta sojo 'laua, nasectaqta'ahi saua loho queda nqui'ic. 7Ca 'neraco' quesá'ogue so Israel llaalqaipi:
—¡Yí'maq 'laua sa'ajnaxanaxa qomi' ỹaatqajam chalego loyac! 8Ca ñi qara'gaxala' nqouagueguelo qomi', ca' qarotauan quiyim senoxonaxau'a yijo 'laua, ca' ỹaanema qomi'. Ca' quiyijo 'laua ỹaatqajam sqoue na huaca lo'i' chaqai na rapic li'i, ma' ỹaatqajam hua'ñi yi'maxare. 9Qam 'neeto' sqai viilec ñi qota'olec chaqai se ro'chiỹa yí'maq qomyipi neetalec yi'maxare. Ma' yi'maxare sqaica sauaqaque ma'le, ma' yi'maxare qaica cá'maq ro'ootaxanlec. Qam quená'maq qomi' 'ue ñí'maq qara'gaxala'. ¡Sqaica ro'chiỹaque!
10Qam quedá'ogue dajo qaiyiita so qomyipi ỹahotaque inaxe' saua'maxare quena qa'. Ca' queco'na'le, ca re'oq so lauaq ñi qara'gaxala' queso 'imec na'daañi hua'ñi quiyim qanauane'e' ñi qota'olec, ca' sá'ogue so Israel llaalqaipi ỹauanchigui.
(14.11-25 So Moisés nqouagaxainlec so llaalqaipi so Israel, qam ñi qota'olec ỹahotaque ỹa'ue da nouaxanaxaset ná'maq se na'xaỹaxan.)
Ñi qota'olec ỹa'ue da nouaxanaxaset so llaalqaipi so Israel
26Ca' ñi qara'gaxala' ỹalamaxachichiguilo saua Moisés chaqai so Aarón, ca 'naaco':
27—¿Chi' laquio' ñaqai queeta quiyim ña'ñaxateta'piguita naua la'qaatqa na hualoxonyipi llaalqaipi so Israel? Mashic shi'gue sa'xaỹa quiyim se no'uen da ỹa'xat caỹim. 28Ca' qami' 'xachitem na'maxare da ỹa'qaatec, 'neetasa': Ỹim ná'maq ỹim na'gaxala' ñallitalta' quedá'maq chi ñachaalataxac quiyim ỹim sopilaxajlec taalec nqaishin dá'maq sa'xaỹa 'naac caỹim. 29Ná'ogue ná'maq mashic qoỹeretañi quiyim ỹovite' yaua veinte ñaxari quiyim queeteguelec aỹim se no'uen da ỹa'xatetac, ca' nilliviñi, ca' na loshicmaxa neuagaxajlec ma'le na 'laua qaica qom. 30Ca' qaiñiita ñi Caleb chaqai ñi Josué inoxondo ma'le. Ca' qaica ca liỹa 'oonolec caqamiri quiyim inoxona'a yi 'laua yí'maq sachaxantac na'le quiyim sanalgoto qamiri. 31Qam na qachaalaxahipi quená'maq 'ñiỹac qamiri quiyim loxonec ca npa'guenaxauaripi, ca soviraqtau'a ma'le yi 'laua yí'maq sqai coñiguit, qaiyi na'maxare naalec ma'le. 32Ca' qamiri na roshicmaxahi huaguelec ma'le quena 'laua qaica qom. 33Ca' quenauá'maq qachaalaxahipi neetalec ma'le yi 'laua 'neetari' ca neloxoỹaq cana qagreta quecaua cuarenta ñaxari. Ca' quedajo, ca na'maxare ishiueten dá'maq quiyim qamiri se raqamaxahi, vire'ta quiyim qamiá'ogue rillivii, viitalec na 'laua qaica qom. 34Qamiri 'ajñitac yi 'laua quesaua cuarenta na'xata', ca' qai'neeta cuarenta ñaxari shivichiñitac da nouaxanaxashichii: 'oonoqui' na'xa'a ñigui ca 'óna ñaaxa, qaiyi 'yiiñii cá'maq 'neeta quiyim npa'guiñi'e' aỹim. 35Ỹim ná'maq ỹim na'gaxala', se'taxajñi da ỹa'qaatec: Ca' dajo dá'maq shi'ntegue ma'le najo qomyipi hualoxonyipi quiyim notauanta' quiyim npa'guene'e' aỹim. Ca' quenajo 'laua qaica qom, ca hua'ñi ma'le ca rqodoguii. Najo hua'ñi, ca rillivii qamiri.
Da lelauaqa' saua diez na'ajnaxana'
36-37Ca quesó'maq ỹalliripi só'maq qaila' na'le queso Moisés quiyim ỹa'aaten yi 'laua, qam na' rapil, ca' se no'uen dá'maq ỹa'xat, ca' chicqochigui quiyim so qomyipi queeteguelec ñi qota'olec, ca' so'maxare ñi qota'olec ỹo'uet quiyim ỹouaxane'tot da lelauaxa. 38Ca' sá'ogue so'maxare nimiichiguiñi ileu, qaisauate' saua Josué chaqai so Caleb nca'leesauec.
So Israel llaalqaipi 'eet nqohin quiyi Horma
39Ca co'na' so Moisés ỹa'xat da la'qaatec ñi qara'gaxala' queso Israel llaalqaipi, ca sá'ogue so qomyipi ỹaatqajam rachicota. 40Ca' queso liỹa na'xa'a na' ñaq nete'etam, ca' no'teetashiguim, ca taashi'ma yí'maq paguec qoỹoqoshi'ma cada quemaralec ladocai. Ca 'naaco' so'maxare:
—¡Nagui mashic seuqate'e najo! Ca qolaxapegue' yí'maq ỹachaxansa'ñi qomi' ñi qara'gaxala', ma' ỹaatqajam llic 'ue da qarasauaxaset.
41Qam so Moisés 'naaco' queso qomyipi:
—¿Chi'negue ma' se na'xaỹaxañiỹa dá'maq 'naac ñi qara'gaxala'? ¡Ca' dajo viitaque 'ñii'tegue se ipaguigui ma'le! 42'Neeto' quii, ma' ñi qara'gaxala' totqai ro'ootaxanlgoto qamiri, ca' loxonqa qamiri ma'le ca npa'guenaxauahi. 43Ca quedá'maq loxoiỹa'gue nauaanta'guita qamiri na Amalec llaalqaipi chaqai ná'maq na'ñi yi Canaán. Na'maxare ma' nalauajto qamiri, ca ralauachii, ma' qamiri mashic oquii'e ñi qara'gaxala', ca ñi'maxare tot ro'ootaxanlgoto qamiri.
44Qam so qomyipi lama'xa eec, taashi'megue so qoỹoqoshi'megue 'laua. Qam aso lahi' so diez nelaataxanaxaquipi se qaidaxan chaqai so Moisés se reda queso co'matqa'. 45Co'na'le, ca naco' so Amalec llaalqaipi chaqai so na'ñi yi Canaán só'maq neetalec yijo 'laua. Ca' ỹaatqajam ỹocantac so Israel llaalqaipi, ỹoviraqta'a yi Horma, qaica ca ỹauaaque.
(15.1—19.22 Najo ỹa'xat da llicyaxac ana nachitaxanataxanqate chaqai quena' qaỹavigaxat, chaqai dá'maq qohinta'gue quena' qaỹa'ue añi lqui'ỹaxaqui na netaxaỹaxanqajanqaipi chaqai na lotauaripi llaalqaipi so Leví, chaqai dá'maq 'neeta quiyim co'taxateta na loshicmaxa. Chaqai qai'neeta ỹa'xat dá'maq npa'guenaxac so Coré.)
