So huaxaỹaq chicqaugui aso qa'
1Ca' queso 'auaxaic shiraigo queso ñaaxa, ca' so Israel llaalqaipi ỹovita yi 'laua qaica qom, leenaxat Zin. Ca' 'vii saua na'xata' neeta'ñi yi Cades. Ca' quiyi, hua'ño' na' ileu aso María, ca' qaishinñi quiyi'maxare.
2Ca co'na' so qomyipi qaica ca laquip, ca' lapoỹata', ca' 'ue na ỹa'xat se no'uen queso Moisés chaqai queso Aarón. 3Ca 'neraco' queso Moisés:
—¡Paguec la'maxa quetaxan qareleua'ñi' na'le so liỹa Israel llaalqaipi só'maq nalauajñi na'le ñi qara'gaxala'! 4¿Chi'neco' ma' naviguiuec qamiri quenajo na lalamaxaret ñi qara'gaxala' quena 'laua qaica qom? Loqo'm ¿viitaque qarelliviñi qomi' chaqai na qoloipi? 5¿Chi'neco' ma' naqachiu'alo qomi' quiyi Egipto, ca' qaraviguiuec quenajo 'laua chalego la'aaxa? Quenajo se ỹa'maxañi 'ue ca qoỹanñi. Qaca aca 'igo lashi, chaqai ana 'uva, chaqai na granado. ¡Vire'ta na huaxaỹaq qaica quiyim ñi'taxagui!
6Ca' so Moisés chaqai so Aarón quere'e so qomyipi noỹooterec, ca' querepegue' yi ñigo quiñi na'daañi 'imcoqui', yí'maq hua'ñi quiyim qanauane'e' ñi qota'olec. Ca' quiyi, ca ỹa'chi'iñi naua le'cootal, ỹoviraqtera'guit naua lataapi' na 'laua. Ca queco'na'le, ca re'oq da lauaq ñi qara'gaxala'. 7Ca' ñi qara'gaxala' 'naaco' queso Moisés:
8—Coñita aca rashillichi'i', ca' notauañise'e' ma'le ñi rqaỹa'e' Aarón, ca' lapooñiỹata' ma'le na qomyipi. Ime, ca' iuanchigui nqai'ñi' ná'ogue na qomyipi, ca chaqai 'ñirapega ada qa' quiyim ỹa'ue ca huaxaỹaq. Ca ma'le, ca' huañita quiyim ada qa' chicqochigui ma'le ca huaxaỹaq, qaiyi ne'et na qomyipi chaqai na laloipi.
9Ca' so Moisés icona aso lashilete quiyi reloqota'ñi ñi qara'gaxala', ca chaqaida nqai'en dá'maq 'naac ñi'maxare. 10Ime, ca' so Moisés chaqai so Aarón lapoonta' sá'ogue so qomyipi quiyi naloote'oga so qa'. Ca' so Moisés 'naaco':
—Na'xaỹaxañichiguiñi queda shinac qamiri, ma' qaica ca viilec. ¿Peeta'a ishito' chicqochigui nqaishinaq ca huaxaỹaq anajo qa', qaiyi ni'chii queca huaxaỹaq?
11Ca co'na' ime 'naac dajo so Moisés, ca nanojshiguim aso lashilete, ca' dos ỹouaxano caso qa'. Ca' nahinec so huaxaỹaq, ca' so qomyipi chaqai so laloipi ne'et. 12Qam ñi qara'gaxala' 'naaco' queso Moisés chaqai queso Aarón:
—Ma' qamiri qaico' ca rpi'ỹaxaguii caỹim, chaqai se iuanchigui nqai'ñii na Israel llaalqaipi quiyim yimaqachiñii, ca se riỹahitaho ma'le najo qomyipi quiyim inoxona'a nqaishin yí'maq 'laua saanem ma'le na'maxare.
13Ca' so huaxaỹaq nahinec na'le caso qa' hua'ñi yi novirqataxanqa', yí'maq hua'ño' na'le na' so Israel llaalqaipi na' queeteguelec ñi qara'gaxala', ca ñi'maxare nachaxana so'maxare quiyim ỹaatqajam co'teeta.
(20.14-21 So llaalqaipi so Edom ỹanaxata'guit so llaalqaipi so Israel.)
Da lelauaxa so Aarón
22Ca sá'ogue so Israel llaalqaipi ca'e yi Cades, ca' quepegue' aso quemaralec qa' ladocai leenaxat Hor. 23Ca co'na' ỹovita yi lqodoc yi 'laua Edom, ca' ñi qara'gaxala' 'naac queso Moisés chaqai queso Aarón:
24—Ñi Aarón mashic ỹovita yi lqodoc aca lqauaxaqui, ca se inoxona'a yí'maq 'laua saanem na Israel llaalqaipi, ma' hua'ñi na' ne'paxanec so huaxaỹaq quiyi Meriba, ca' qamiri sqai pacqajanchigui dá'maq shinac. 25Ca' qami' Moisés viqui' da Aarón chaqai ñi llaalec Eleazar cana roto ada quemaralec ladocai Hor. 26Ca' quiyi, ca' naqachi' naua loho no'ueetaxaqui' quena' ỹovita quiyim retaxaỹa'pegue' aỹim, ca ỹañiriguilo da Eleazar. Ca hua'ñi yi'maxare, ca' ileu ma'le da Aarón.
27Ca' so Moisés 'ne'tegue dá'maq 'naaco' ñi qara'gaxala'. Ca iuanchigui nqai'en sá'ogue so Israel llaalqaipi na' taarishi'megue aso qa' leenaxat Hor. 28Ca' yí, hua'ño' na' so Moisés naqate' saua loho so Aarón no'ueetaxaqui' quiyim netaxaỹaxanqajnec, ca' ỹañiguilo so llaalec Eleazar. Ca' chaqaiyi hua'ño' na' ileu so Aarón. Ca' so Moisés chaqai so Eleazar renochiñi caso qa' ladocai. 29Ca co'na' retan so Israel llaalqaipi quiyim so Aarón ileu, ca' qanoỹenteguelec quesaua treinta na'xata'.
