So Moisés ỹa'vii saua ilate' ra'ajnaxanta yi Canaán
1Ca' ñi qara'gaxala' ỹalamaxachichigui so Moisés, ca 'naaco':
2—Vite caua relaataxahi' ỹale' quiyim ra'ajnaxanta yi 'laua Canaán yí'maq saanem ma'le na Israel llaalqaipi quiyim la'a'. Vite ca coñira'a 'oonoqui' quena ne'qaipi quesaua doce llaalqa so Israel, ca' lachi' cá'maq ỹaatqajam na'gaxala'.
3Ca' so Moisés ipaquichigui nqai'en da lelaataxanaxac ñi qara'gaxala'. Ca' ilate' saua'maxare chicqochiri'ñi yi 'laua qaica qom, leenaxat Parán. Ca sá'ogue na'gaxalateripi só'maq ila'. 6Ca ỹalequeto qai'neeta so Caleb só'maq llaalec so Jefone chicqaugui na llaalqaipi so Judá. 8Chaqai so Oseas só'maq llaalec so Nun chicqaugui na llaalqaipi so Efraín.
(13.4,5,7,9-16 Daua leenqate' sauá'maq diez liỹa' qailate' quiyim ỹa'ajne' yi Canaán.)
So Moisés ilate' sauá'maq ỹa'ajne' yi 'laua
17Ca' so Moisés ilate'o' quiyim ra'ajnaxanta ca 'laua leenaxat Canaán. Ca 'naapegalo':
—'Itou'o' ma'le yi Néguev, ca quiitalec yi 'laua 'xoic ana quemaralec qa' ladocai. 18Ỹaatqajam 'ajñita cá'maq 'neeta ca 'laua chaqai ná'maq ỹalliripi neetalec ca'maxare, quesaxanaxaic loqo'm se quesaxan, chaqai no'm 'xoic loqo'm sqo vite'. 19'Ajñii naua la'aate' no'm chi na'daañi 'imcoqui' loqo'm ỹaatqajam qaỹapootau'alo, chaqai cá'maq 'laua quiyim ỹaatqajam lo'yaxanec loqo'm se no'uen. 20Ỹaatqajam 'ajñita ca 'laua quiyim canchaqaica qoỹanñi ñaxashiguim, loqo'm 'e', chaqai no'm 'ue ana qo'paq, loqo'm qaca. Qaica ro'chiỹaque, chaqai 'uo' ca nodohi la ca nanecsec huelec cajo 'laua.
Ca co'na' qailate' saua'maxare viichigui yi laloqo' quena' qanaqat ana 'auaxai la ana 'uva. 21Ca' so ỹalliripi eec ra'ajnaxana sojo 'laua, ỹachigoxochichiri'ñi da la'ajnaxanaxague' yi 'laua qaica qom leenaxat Zin queda 'guiñi, chi ỹovireta'a yi Rehob queda rapiguim, huaqate'e' yi ñigo taỹau'a yi Hamat. 22Taaterou'a yi Néguev, ca chi ỹoviresa'a yi Hebrón. Ca' yí, nera'ño' saua Ahimán, Sesai chaqai so Talmai, saua'maxare llaalqa so Anac. Ca' sojo Hebrón qano'xonshiguimo' na' saqa'lecaua siete ñaxari quiyim 'ue yi Zoán quiyi Egipto. 23Ca' chi ỹoviresa'a yi ñaachi Escol. Hua'ño'yi na'le, ca' ỹouaxandec aso lasote aso 'uva lashi 'ue ana la laxale neetagui, ca' ỹahote so qo'paq ishiterec, ca' saua dos qomi' nallaaquente'. Chaqai qai'neeta ỹa'vii saua li'ỹaaco cana la ana granado chaqai ana 'igo. 24Ca' sojo ñaachi ỹantegue leenaxat Escol, 'úva laxale, ma' yi hua'ño' na' so Israel laseripi nouaxanec aso nanecse lasote neetagui ana la 'úva.
25Ca co'na' ime qaỹa'ajantac yi 'laua quesaua cuarenta na'xata', ca' pil so nelaatqaipi, 26pila yi Cades yí'maq huaugui yi 'laua qaica qom quiyi 'laua Parán. Ma' hueeta'ño'yi so Moisés, Aarón chaqai sá'ogue so liỹaripi Israel llaalqaipi. Ca co'na' ỹoviro queso'maxare, ca' ra'qaataxane' ỹa'xate' ná'ogue ná'maq iuanchirigui chaqai ỹachaxansac ana la ana nanecse huaalec yijo 'laua. 27Co'na' ime, ca 'neraco' queso Moisés:
—Qolaqpegue' yí'maq 'laua qarelachita. Ỹaatqajam llic quiyijo 'laua ỹaatqajam sqoue na huaca lo'i', chaqai na rapic li'i. Ca' najo aná'maq la ana nanecse quiyijo 'laua. 28Qam ná'maq qomyipi neetalec yijo 'laua ỹaatqajam quesaxanaxaiquipi, chaqai naua na'aate' ỹaatqajam 'xoic lecalliñi, chaqai qaỹapootau'alo. Chaqai mesqaidaata dajo, ma' seuanaxa qai'neeta na llaalqaipi so ladocaic ỹale leenaxat Anac. 29Ca' yi 'laua Néguev neetalec yi llaalqaipi so Amalec; ca yí'maq 'laua 'xoic ana quemaralec qa' ladocai, ca' neeta'ñi na hitita laseripi, chaqai jebuseo laseripi, chaqai amorreo laseripi; chaqai quena lahi aso huaaxai chaqai quena lahi aso lachiugue Jordán, ca' neetalec na cananeo laseripi.
30Ca' so Caleb i'maxañi nqai'en so qomyipi reloqoto'ot so Moisés. Ca 'naaco':
—¡Qomi' senqalec ma'le yijo 'laua! ¡Qomi' seshitaq souootaxanqa'gue yi'maxare!
31Qam cá'maq nauegaxauaripio' na'le so'maxare 'naaco':
—¡'E', qomi' se seshitaq qolaxau'a yijo qomyipi! Ma' yi qomyipi paguec 'ñaaxaiquipi coqomi'.
32Ca saua'maxare 'neraco' queso Israel llaalqaipi quiyim só'maq 'laua ra'ajnaxanta ỹaatqajam se no'uen. Ca 'neraco':
—Yí'maq 'laua sa'ajnaxanaxa ỹalauat na qom neetalec yi'maxare, chaqai ná'ogue ná'maq seuanaxa ỹalliripi naalec yi'maxare ỹaatqajam leta'allípi. 33Qai'neeta seuanaxa na ỹalliripi ladocaiquipi só'maq llaalqaipi so Anac. Ca quiyim sauaxaiqate'e' na'maxare, 'ec qomi' piñai, chaqai na'maxare quena ra'iita'alo qomi' qai'neeta 'ec qomi' piñai nqai'ne'.
