Mateo 7

₁'Neeto' lotqai michitac ca riỹahi queca lasauaxaset, qaiyi se imite' qamiri ñi qota'olec queca rasauaxashichii. ₂Ma' ñi qota'olec imite' qamiri, qam naloqojñi'chiguit cá'maq 'ñii'tegue ca rimiitaxanaxaguii queca riỹahi, ca cá'maq 'ñii'tegue quiyim naloqochiñii ca ỹopilaqtejelgoto qamiri. ₃Ca ¿negue' cá'maq 'neeto' quiyim shichii huañiỹa ca lichooqui' hueetagui añi nqote ca rqaỹahi, qam sqai huañiỹa añí'maq loỹo neeta'ñigui ana nqochii? ₄Ca no'm hueeta'ñigui ana nqochii aca qo'paq loỹo late'ogue', ca ¿negue' quet cá'maq 'neeta quiyim 'ñirapega quet ca rqaỹa'e': “Ñaq yayaxañirac quiyim ñaqat yi lichooqui' hueeta'ñigui añi nqochi'i'”? ₅Ca ma' 'ñiitapega quiyim qamiri 'maxaraqa, ca' 'au naqachii añí'maq loỹo neeta'ñigui ana nqochii, qaiyi ỹaatqajam neuañichiguiñi quiyim naqachii ca lichooqui' hueeta'ñigui aca nqote ca rqaỹahi.

₆Sqai 'ỹaañim na pioqripi cá'maq nouenec se ishit qaiualaxain. Ma' no'm na'maxare ỹopilaxajalgoto, ishit ỹasectaqta'pe qamiri. Chaqai sqai naxaiu'a aca no'ueetqachii leenaxat perla aca cos, 'neeto' co'vigui.

₇Shiilaxañii, ca' ñi qota'olec ỹaanema qamiri ma'le cá'maq shiilaxañitaque; daañiỹaque, ca nachiỹa; togoxoiuo ñi lasom, ca qaỹauate'ogalo qamiri. ₈Ma' cá'maq rashiilaxan, ca' icoñiguit ca rashiilaxanaque; chaqai cá'maq idaanaque, ca ỹanata; chaqai cá'maq ỹotogoxouo ñi lasom, ca' qaỹauate'oga.

₉¿Loqo'm 'ue cá caqamiri ishit ỹaanem ca qa' ca llaalec quiyim rashiilaxantaque ca pan? ₁₀¿Loqo'm ỹaanem ca nanaic, no'm rashiilaxantaque ca nallin? ₁₁Ma' quiyim qamiri hualoxona', qam 'yiiñii 'ỹaañim cá'maq no'uen ca qachaalguii, ¡huose'quet ñi qota'a ñí'maq viilec neeta'gue da piguim, ñi'maxare ỹaanec cá'maq no'uen quecá'maq qarashiilaxanaque!

₁₂Ca' vichiguiño' qamiri 'viichii cá'maq viitaque quiyim qohine'teguelo qamiri quena qomyipi, ma' chaqaida dá'maq lelaataxanaxac na laqataxaquipi so Moisés chaqai naua lerecse' so letaxaỹaxanqajanqaipi ñi qota'a.

₁₃Noxoñiỹougui ñi lasom cocho'qui'. Ma' 'xoic lecagui ñi lasom chaqai so nayic tai'a ca nelauqa'. 'Xoic leca'gue chaqai sqaica ca lqalaic, ca' ỹaatqajam 'xoic ná'maq queeta'gue so'maxare. ₁₄Qam ñi lasom chaqai so nayic taira'a yi nca'laxa, sqa loguilo, ca' mesqai 'xoic cá'maq ỹanata.

₁₅Rovichii'a na 'maatqaiquipi ná'maq 'naac quiyim letaxaỹaxanqajnec ñi qota'a. Najo naata'alo qamiri ỹantañi na qagreta loshicmaxa, qam da pa'aataho no'ueenataxac 'ec na isecỹac toxonaxai. ₁₆Qamiri shichii quiyim 'yiiñii quedá'maq lo'ueenataxanaxac. Ma' se qanaqat aca 'úva qaỹachigoxotaugui ca leesat, chaqai aca higo se qaỹachigoxotaugui ca cotaquesat. ₁₇Ca' vichiguiño' ná'ogue ana no'uen qo'paq lo'yaxana ana la, chaqai ana se no'uen qo'paq, ca' se no'uen ana la. ₁₈Ca acá'maq no'uen qo'paq mesqai se no'uen aca la, chaqai aca se no'uen qo'paq se ishit quiyim lo'yaxana aca la. ₁₉Ná'ogue ana qo'paq se no'uen ana la, ca qaỹouaxanlec, ca' qainaxañigui ca norec, ca qaỹavigaxat. ₂₀Ca' qamiri 'yiiñii na'maxare ma'le quedá'maq lo'ueenataxanaxac.

₂₁Mesqai ná'ogue na qomyipi quená'maq 'naac: “Qami' qara'gaxala'”, sqai ná'ogue inoxono ma'le queca ñaqai naata lo'ueenataxanaxac ñi qota'a queda piguim. Chaqaicaata cá'maq ỹo'uet dá'maq ỹahotaque ñi ita'a neeta'gue da piguim. ₂₂Ca' ma' ỹovita cajo na'xa'a, ca 'xoic ca 'naac ma'le caỹim: “Qami' qara'gaxala', qomi' so'ueenataxanqatapega quen da qadeenaxachi' quena' sa'qaataxanqatac, chaqai quena' so'daqauec na ne'ec lecmaxaic, chaqai queda qadeenaxachi' 'xoic na so'ueetaq ỹo'uet da ne'laxa.” ₂₃Qam ỹim shinac ma'le caqamiri: “Ỹaatqajam qaica ma' seuanapegalo quet qamiri. Nqo'ñiiuec caỹim, ma' qamiri 'viichitaco' quen na se no'uen.”

₂₄Ca' chaqaida 'neeta quecá'maq 'xaỹa aỹim, ca' ỹo'uet dá'maq ỹa'qaatec, ca 'nejem nqaishin ca qom 'deenaxanqachaqaic quiyim ỹanejlec ca qa' quiyim ỹa'yiñi ca lauo'. ₂₅Ca' novi' na ỹaxat, chaqai i'paxanlec aso lachiugue, chaqai anac na nonot lodegaxat, qam sqai 'guiñi so 'imec, ma' qaỹa'deetalec so qa'. ₂₆Qam cá'maq 'qaatapega aỹim, qam se ỹo'uet dá'maq sa'xatetac, ca 'nejem nqaishin ca qom sqaica ca ỹa'den, ca' ỹa'yiñi ca lauo', nejlec nqai'en ca lo'uaxanaxa. ₂₇Ca novi'o' na ỹaxat, chaqai ne'paxanshiguim ana lachiugue, chaqai novi' na nonot lodegaxat, ca so 'imec 'guiñi, ca sá'ogue na'laañi.

₂₈Ca co'na' so Jesús ỹomat da letaxaỹaxac, ca' so qomyipi chalego da le'laxa queda lapaxaguinataxanaxac. ₂₉Ma' queda lapaxaguinataxanaxac ỹaatqajam 'chichiguiñi, 'ue da lquesaxanaxa, mesqai 'nejem ná'maq rapaxaguinataxanta'pegue na naqataxaquipi chicqo'ot so Moisés.