Mateo 8

₁Ca co'na' renotec so Jesús chicqotashi'megue ada quemaralec ladocai, ca qaicoỹare'tegue queso 'xoic qomyipi. ₂Ca nqo'neuo' so ỹale rishiita na loshicmaxa, ca' ỹa'dooto naua le'cootal so Jesús. Ca 'naaco' queso'maxare:

—Qami' ỹa'gaxala', no'm 'maxariñite', ca' shichi' quiyim yomachirec quena yalolaxa.

₃Ca' so Jesús ipootau'a so'maxare, ca 'naaco':

—Ajá'a, sa'maxarenta, nagui somachirec.

Ca co'na' 'naac dajo, ca só'maq rishiita na loshicmaxa chaqa'ma' imeuec queso ralolaxa. ₄Ca' so Jesús 'naaco' queso'maxare:

—'Neeto' lotqai 'ue ca 'qaataxañita quedajo. Ta'ta'a quiyim quirepegue', nachaxañireu'a ñi letaxaỹaxanqajnec na qomyipi quena' qaretaxaỹa'pegue' ñi qota'a, chaqai 'ỹaañiro ma'le aca rachitaxanataxanqachi'i' cá'maq relaataxanlec na'le so Moisés, qaiyi ná'ogue ỹa'den quiyim rimi'rec queso ralolaxa'e'.

₅Ca co'na' inoxono so Jesús quiyi na'a' Capernaum, ca qanoviro'o' queso nouaataxanaq lashi Roma le'ec. Ca ne'xoresene'tot so Jesús, ₆'naac:

—Qami' ỹa'gaxala', yi ilaatec hueeta'ñi yi ỹa'a', hueetalec yi lomala', se ra'ñiigue, ỹaatqajam 'xoic da le'xoric, paguelec na nqui'ic.

₇Ca' so Jesús 'naaco':

—Ỹim shicpegue', ca' somatec ma'le.

₈Ca' so nouaataxanaq lashi 'naaco':

—Qami' ỹa'gaxala', ỹaatqajam sqa saiguit quiyim noxoñirougui quet ñi iuo'. Chaqaidaata quiyim lachi' quet ca ra'qaachiqui', ca' ñi ilaatec imeuec. ₉Ma' ỹim qai'neeta seueto'ot da lelaataxanaxac na nashillipi, chaqai 'ue na ñalliripi selaretac. Ca' quena' 'ue ñi sela', ca' eec. Chaqai no'm soỹaxana, ca chaqa'ma' anac. Chaqai ca ilaatec, no'm 'ue ca selarelec, ca chaqa'ma' ỹo'uet.

₁₀Ca co'na' so Jesús 'xaỹa dajo, ca 'uo' da le'laxa. Ca 'naaco' quecá'maq liỹaripi:

—Ỹaatqajam llic da shinac caqamiri, quená'ogue na Israel qaica ca seuana qom 'xoic ca lpi'ỹaxac 'nejem dajo ỹale. ₁₁Ca' ỹim shinac caqamiri quiyim 'xoic ma'le ca novi' chicqa'gue da lqodoigue chaqai da lauashiguim, ca' nqa'xanñi que'e nouanta'to lqui'ỹaxaua' yaua Abraham, Isaac chaqai ñi Jacob, ma' qainoxona'a ca lo'ueenataxanaxac ñi qota'a queda piguim. ₁₂Qam ná'maq ỹalequetau'a quet da no'ueenataxanaxac hueeta'gue da piguim, na'maxare qaỹo'da'oga ma'le ca napalaxa pa'aauec. Ca quiyi ca hua'ñi, ca noỹentac iquishquinta' naua loue quena nqui'ic.

₁₃Ca' so Jesús 'naaco' na'le queso nouaataxanaq lashi:

—Quiro queca ra'aachi', ca' ipaquichigui ma'le dá'maq 'neeta da rpi'ỹaxaqui'.

Ca so ne'necoqui' chaqa'ma' imeueco' na'le.

₁₄Ca' so Jesús quepegue' yi la'a' so Pedro. Ca iuane'ta aso ni'ỹoqoro so Pedro nenantañi queso lomala', ma' 'xoic lpa'ỹaaxa na loshicmaxa. ₁₅Ca so'maxare ipootau'a da lqai'laxat, ca eec so lpa'ỹaaxa. Ca ne'laxashiguim aso'maxare, ca' quelolta'pegueto saua'maxare.

₁₆Ca co'na' mashic pe, ca qanodou'a so Jesús na 'xoic qomyipi ralolaxaiquipi 'ue na le'ec lecmaxaic. Ca' chaqai 'oonoqui' retaqa, ca ỹo'daauec na ne'ec lecmaxaic, chaqai qai'neeta ỹomatec sá'ogue so ralolaxaiquipi. ₁₇Ca' dajo 'neeto' na'le, qaiyi ipaquichigui da la'qaatco' na'le so qota'a letaxaỹaxanqajnec leenaxat Isaías co'na' 'naac: “Ca'maxare icona so qarolauaxa chaqai i'xat so qaralolaxa.”

₁₈Ca co'na' so Jesús iuane'ta so 'xoic qomyipi lapoỹaho queso'maxare, ca 'naapegalo saua nale' quiyim tareta'gue da liỹa lemanaxa aso latogot late'ogue'. ₁₉Ca' 'ue so napaxaguinataxanaq quena naqataxaquipi nqo'neu'a so Jesús, ca 'naaco':

—Qami' napaxaguinataxanaq, aỹim sahotaque shiguegue aqami' quecanchaqai 'itegue.

₂₀Ca' so Jesús 'naaco' na'le queso'maxare:

—Ana nouaxaỹaxallipi 'ue na lauac, chaqai na qo'oollipi 'ue na lpa'gue'. Qam najo ỹale llaalec qaica ca lo'xaỹoqsoqo'.

₂₁Ca 'uo' so 'óna quesaua chi lapaxaguinatqa 'naaco':

—Qami' ỹa'gaxala', ñaq yayaxañirec ñaqai 'au seshinñi yi ita'a.

₂₂Ca so Jesús 'naaco' queso'maxare:

—Naquitegue aỹim, 'xañirac ná'maq 'ec leuaxaiquipi ñaq ishinñi na lasauaxanqaipi.

₂₃Ca' so Jesús renojñigui aso qom lahi' huaxaỹaqse, liỹareta'pe saua lapaxaguinatqa. ₂₄Ca' caso latogot late'ogue' nanac so nonot lodegaxat, ca na lo'paxaripi sham i'paxanlec nqai'en aso lahite', qam so Jesús laqata. ₂₅Ca co'na'le, ca saua lapaxaguinatqa querepegue', ca nqo'xone', ca 'nerapego':

—Qami' qara'gaxala', qarca'laxachirec, ma' sham iyiñiñi qomi'.

₂₆Ca' so Jesús 'naaco' quesaua'maxare:

—¿Chi'negue ma' 'xoic na rqolonaxahi? ¡Ỹaatqajam cocho'qui' da rpi'ỹaxaguii!

Ca co'na'le, ca ne'laxashiguim. Ca' nelaxa so nonot chaqai aso huaaxai, ca chaqa'ma' sá'ogue nayaarichiguiñi. ₂₇Ca quedá'maq le'laqa' saua ỹale', ca 'neraco':

—¿Nega'ỹo' dá'maq dajo ỹale, ma' vire'ta na nonot chaqai ana huaaxai na'xaỹaxane'ta?

₂₈Ca co'na' ỹovijta so Jesús caso latogot late'ogue', na' ỹovijta'a yi 'laua Gadara. Ca' qaỹanaqta'guit quesaua dos ỹale', saua'que 'ue na le'gue' lecmaxaic chicqotera'a yi napalyipi. Ca nqo'nero queso'maxare. Chalego lichigue', vire'ta quiyim qaica ca ishit que'tegue yi'maxare queso nayic. ₂₉Ca' ỹaualaxai', 'nerac:

—¿Chi'negue ma' 'isapegueu'alo qomi', qami' Jesús, qami' llaalec ñi qota'olec? ¿Peeta'a na'itquena quiyim vite ca qanouaxanaxaset quiyim saqa' ỹovita ca laloqo'?

₃₀Qam quecajo sqoỹoqaque so 'laua neetalec aso 'xoic cooshipi que'eetac. ₃₁Ca' so ne'equipi lecmaxaiquipi ne'xoresene'tot so Jesús, 'naac:

—No'm qaro'yirauec, qam qarayaxañiraco' quiyim senoxonaxaugui yi cooshipi.

₃₂Ca' so Jesús 'naaco':

—Hua', mohi, 'iugui.

Ca' so ne'ec lecmaxaiquipi nenoxonec quesaua ỹale', ca' taugui so cooshipi. Ca co'na' ime, ca sá'ogue so cooshipi ta'ñigui aso latogot late'ogue', ca sá'ogue homac.

₃₃Ca só'maq neloxoỹaripi caso cos 'eet, no'chi. Ca co'na' ỹoviro quiyi na'a', ca ra'qaataxane' quedá'maq 'neeto' na'le dajo chaqai quesauá'maq ỹale' 'uo' so le'gue' lecmaxaiquipi. ₃₄Ca sá'ogue so qomyipi na'ñi yi na'a' nacpegue' yi hueete'e so Jesús. Ca co'na' ỹovita, ca ne'xoresene'tot quiyim ca'e yi la'a' so'maxare.