So Jesús rapaxaguinataxanegue dá'maq 'neeta quiyim qaỹo'uet ca ỹa'maqachiguiñi
1Mesqai nachaxañita quena qom quiyim 'viichii cá'maq viilec, ca' ỹa'yiinchigui nqai'ñii na qom. No'm 'ñii'tegue dajo, ca' ñi qota'a ñí'maq viilec neeta'gue da piguim qaica ma' ỹo'uet quet ca nishivichii. 2Ca' vichiguiño' quiyim tauañii cá'maq 'ue ca louenaxanaxa, qam sqai 'deenaxanaxañiigue ná'ogue na qomyipi, 'nejem dá'maq 'ne'tegue quen ná'maq 'neetapigui lauel quiyim huagaxaraiquipi, nachaxanta quiyim hueetaugui ana lapoxoqui na judioipi chaqai quena nayiquipi. Dajo 'ne'tegue, ma' ỹahotaque quiyim qaimaqachin quena qomyipi. Qam ỹim shinac quedajo 'ne'tegue, chaqa'ma' shi'gue 'ue da nishiuetenaxac. 3Qam no'm qami' 'ue ca 'ỹaañitem cá'maq 'ue ca louenaxanaxa, qam sqa 'deenaxanaxañitegue cá'maq ỹaatqajam nauochaxaua'e' riỹa'e'. 4Ta'ta'a quiyim sqaica ỹa'den nqai'ñi'. Ca' ñi qota'a ñí'maq vi'relec ma' iuana ná'maq se re'xogui, ca ñi'maxare rishivichiñi' ma'le.
So Jesús rapaxaguinataxanegue da qouagaxainaxac
5Chaqai ma' qamiri nqouagaxaiñii, 'neeto' lotqai 'ñiita ná'maq 'neetapigui lauel huagaxaraic, nachaxanta quena' nqouagaxain cana lapoxoqui na judioipi chaqai quenaua lasoguel na nayiquipi, qaiyi qaỹa'ajantac quena qom. Ca' ỹaatqajam llic da shinac caqamiri, ca' quedá'maq dajo quiyim 'ne'tegue, ca chaqa'ma' 'ue ca nishiue'. 6Qam noma' nqouagaxaiñi' qami', ca' noxoñirougui ca qauochi'. Ca' po'irigui ca lasom, ca' nqouagaxaiñitot ñi qota'olec roda'ichichiguit. Ca ñí'maq qota'olec, ma' iuana ná'maq qaỹo'ueetetac se re'xogui, ỹaanem qami' ma'le ca nishivichi'.
7Ca noma' nqouagaxaiñi', 'neeto' lotqai pilaxachisa'gue ca ra'qaachiqui', 'nejem dá'maq 'neetari' quen ná'maq se ỹauanapega ñi qota'olec. Ma' 'neetapigui lauel quiyim qana'xaỹaxana quiñi qota'olec, ma' ỹopilaqteta'gue ca ỹa'xatetac. 8'Neeto' lotqai 'ñiita na'maxare, ma' ñi qota'olec shi'gue ỹa'den cá'maq viñitaque, ma' saqa' shiilaxañiỹaque. 9Ca ma' nqouagaxaiñii, ca 'ñiỹaco'sa':
Qami' qota'olec ma' ñiiso'ot na piguim, qaimaqachin dá'ogue da qadeenaxachi'.
10Naiquena nqai'ñi' ca ro'ueenataxanaxaqui' quiyim 'viiquiñi'sac ná'ogue najo,
qaiyi qaỹo'uet cá'maq vi'saque quená'maq hueetalec na 'laua, 'nejem dá'maq qohine'tegue queda piguim.
11Nagui quena na'xa'a vite cá'maq qarepetaxanaxat souenqataque.
12Chaqai palaxachi' ca qarasauaxaset, chaqai 'nejme' qomi' sapalaxataq cá'maq se no'uen qohine'teguelo qomi'.
13Chaqai se qarashiñitegue ca qane'guenaxac, ta'ta'a quiyim otaxañirelgoto qomi' queso na'ỹaapec.
Ma' qatoiquenachiqui' dá'maq no'ueenataxanaxac, chaqai da nquesaxanaxa, chaqai da nauaq qaica lqodoc. Ajá'a, ca' chaqaida 'neeta dajo.
14Ma' no'm qamiri 'xoriñii cá'maq riỹahi quecá'maq se no'uen ỹo'uet caqamiri, ca qai'neeta i'xorene' qamiri ñi qota'a ñí'maq viilec neeta'gue da piguim. 15Qam no'm sqai 'xoriñii ca riỹahi, ca' qai'neeta ñi qota'a ñí'maq viilec se i'xorene' qamiri quiyim ỹapalaxat ca rasauaxashichii.
So Jesús rapaxaguinataxanegue da 'neeta ca nqopaaqachit
16Ca ma' ỹovita quiyim nqopaaqachichii, qam se re'oq nqai'ñii quiyim ỹaviguiñi na qashiigui, 'nejem dá'maq 'ne'tegue quen ná'maq chi nachaxanta qomyipi. Ma' na'maxare 'ne'tegue dajo, ma' ỹahotaque qaỹa'den quiyim nqopaaqachitetac. Ca' ỹim shinac caqamiri quiyim na'maxare shi'gue 'ue da nishiuetenaxac. 17Qam qami' ma' ỹovita quiyim nqopaaqachichi', ca' quiỹo'irigui na qashiiqui', chaqai netaquichiriñi, 18qaiyi na qomyipi se retan quiyim nqopaaqachichi'sac. Qaiñiita ñi qota'a ñí'maq vi'relec roda'ichichiguit maq ỹa'den, ca ñi'maxare ỹo'uet ma'le ca nishivichi'.
Da nesallaxa queda piguim
19'Neeto' lapooñitañi ca resallaxahi quenajo 'laua, ná'maq hua'ñi na pit richigaxan, chaqai ná'maq hua'ñi quiyim ichirichiguiñi canchaqaica nouenec, chaqai ná'maq hua'ñi quiyim ca cuataxai ishit inoxono, ca' rocachi. 20Chaqaidaato' quiyim lapooñitañi ca resallaxahi queda piguim dá'maq hua'gue quiyim ca pit se ishit richigaxan, chaqai dá'maq hua'gue quiyim mesqai ichirichiguiñi canchaqaica nouenec, chaqai dá'maq hua'gue quiyim se ishit inoxono ca cuataxai quiyim rocachi. 21Ma' cá'maq hueeta'gue nqai'ñii ca resallaxahi, ca' chaqaica hueeta'gue qai'neeta añi re'taxanatahi.
Aca ncoỹeraxanaxaqui coỹarelec ca qom
22Ca' naua nqochichi' 'neesari' aca lcoỹeraxanaxaqui' na roshicmaxa'e'. Ca no'm lo'yaxanqa naua nqochichi', ca' ná'ogue na roshicmaxa'e' re'qojlec. 23Qam no'm naua nqochichi' se no'viiñi, ca ná'ogue na roshicmaxa'e' hueetaugui na napalaxa. Ca no'm nauá'maq rcoỹeraxanaxaqui'i' quet ñigui napalaxa, ca' ¡ỹaatqajam paguec lapalaxa ca vi'saugui!
Ñi qota'olec loqo'm ana plata
24Qaica ca ishit quiyim dos caua na'cooro'. Ma' ỹamaqa'gue ca 'óna chaqai nqo'ta ca liỹa, loqo'm 'xaỹaxanaxaraic queca 'óna chaqai se ỹaqamaq queca liỹa. Ca' se ishit qaro'ueenataxanot ñi qota'olec chaqai aca re'qoochigui plata.
Ñi qota'olec cochiỹa na llaalqaipi
25Ca vichiguiño' nagui shinapegalo qamiri quiyim sqa chigoita 'yiiñitaque ca qanoxohi, chaqai quecá'maq ni'chiigui quiyim viñitaque, chaqai cá'maq qatooỹaguii quiyim ñiiñi. ¿Mese ỹapacauec da chaalataxac quecá'maq na'ic, chaqai na noshicmaxa quecá'maq nooỹac? 26Ñaqa 'ajñii na ỹoripi ỹootegueri' quena pa'aashiguim; na'maxare sqai danaxan, chaqai sqai raqataxan, chaqai sqaica ca lo'xac la'maqataxanaxaqui queca lanecsec ala. Qam qaiyiita ñi qota'a ñí'maq viilec neeta'gue da piguim qaiyiita qui'ỹaxan. Ca ¡huose'quet caqamiri ma' paguiỹauec caca qo'oole! 27Chaqai ¿negue' quet ca 'óna caqamiri quiyim paguec ca leuogoxo, ca' noquiicshiguim quecá'maq chi ladoqueta?
28Ca' ¿chi'negue queta' 'yiiñitaque ca qatooỹaguii? Ca' ñaqai 'ajñii ana peue 'ue ana lenoỹaxai hueetalec na no'ueenaxa, ana'maxare se ro'ueenataxan chaqai se raqaletenaxan. 29Ca' shinapegalo qamiri quiyim vire'ta so nashi Salomón quená'ogue ná'maq chalego loyac no'ueetaxat, qam se nalo'guit da no'ueetaxac nqohin ana'maxare. 30Ca' no'm ñi qota'olec 'ne'tegue nqai'en dajo da no'ueetaxac ana peue hueetalec na no'ueenaxa, qam queca liỹa na'xa'a, ca qaỹavigaxat qaỹouen quiyim 'ue ca qaiqatel, ca' ¿huose'quet sqai paguec nqai'en ca no'ueetaxaguii, qamiri ma' cocho'qui' da rpi'ỹaxaguii? 31Vichiguiño' sqai hueetapigui qavillii quiyim 'ñiỹac: “¿Nega'ỹo' ca sa'guinaq nagui, loqo'm nega'ỹo' ca ñi'taxagui, loqo'm nega'ỹo' ca qotooỹac sanaxañi?” 32Ma' na qomyipi hueetalec ana 'laua ná'ogue ỹa'deentapiguii nauajo. Qam qamiri 'ue ñi qota'a ñí'maq viilec neeta'gue da piguim, ñi'maxare shi'gue ỹa'den quiyim viñitaque ná'ogue najo. 33Ca' vichiguiño' 'maxachi'tegue da na'xaỹaxanaxaguii queda lo'ueenataxanaxac ñi qota'olec quiyim ỹoiquentac ná'ogue najo, chaqai 'viichii cá'maq ỹahotaque ñi'maxare, ca' coñiguit ma'le qai'neeta ná'ogue najo. 34Ca' mesqai 'yiiñitaque cá'maq 'neeta ca liỹa na'xa'a. Ma' cajo liỹa na'xa'a ỹaatqa'chiguit cá'maq lqalaic huaugui. Ca' quiyi 'oonoqui' na'xa'a llicsa ỹaatqajam hueetougui yí'maq chi lqalaic.
