Lucas 23

₁Ca sá'ogue so'maxare ne'laxashiguim, ca' qaỹauegueu'a so Jesús so nashi Pilato. ₂Ca' quiyi, ca qaỹa'uo' na qaimaxalec, qohinac quiyim lasauaxaset, ca qohinac:

—Qomi' seuanqajlec dajo ỹale quiyim ỹaatqajam se i'maxañi nqai'en na qouo' laseripi. Chaqai 'neetapega quiyim se seshiuetenaq ñi lashi na nashillipi neeta'ñi yi Roma, chaqai 'naac quiyim chaqaida dá'maq nashi nca'laxaqui.

₃Ca' so Pilato inato' so'maxare, 'naaco':

—¿Chaqaqami'o' ná'maq qami' lashi na judioipi?

Ca' so Jesús 'naaco':

—Ajá'a, chaqaida dá'maq 'ñirac.

₄Ca' so Pilato 'naapego' so lashillipi na netaxaỹaxanqajanqaipi chaqai so qomyipi, 'naaco':

—Ỹim sqaica ca sanata lasauaxaset dajo ỹale.

₅Qam saua'maxare ipaquera'a paguec lquesaxanaxa da ỹa'xate', 'nerac:

—Ñi'maxare ỹasauaxatetecta' yá'ogue yi qomyipi na'ñi yi Judea queda lapaxaguinataxanaxac. Chicqochi'ñi yi Galilea, chaqai nagui, ca' novireta'a najo.

₆Ca co'na' so Pilato 'xaỹa dajo, ca renataxanegue quiyim so ỹale na'ñi yi Galilea. ₇Ca co'na' qaỹa'qaataxanem quiyim so'maxare chicqa'gue da Galilea, ca' ilata so Herodes ma' so nashi quiyi Galilea, ma' so'maxare qai'neeta hueetau'a yi Jerusalén queso na'xa'a. ₈Ca' so nashi Herodes co'na' iuana so Jesús, ca' ỹaatqajam netoon; ma' shi'gom ỹahotaco' quen iuana, ma' 'qaateguelco' quen quena' qaỹa'xatetac so'maxare, chaqai ỹahotaque quiyim ỹauanchigui 'ue ca ỹo'uet quena se qaiuanapega. ₉Ca' ỹaatqajam 'xoic na lenataxanaxac, inatetac so'maxare, qam so Jesús qaica ca ỹa'xat. ₁₀Chaqai qai'neeta hueete'eyi só'maq lashillipi na netaxaỹaxanqajanqaipi chaqai ná'maq rapaxaguinataxanta'pegue na naqataxaquipi, ỹaatqajam ipaca'a 'xoic na imaqateguelec lasauaxaset so'maxare. ₁₁Ca' so nashi Herodes chaqai so nalliripi ỹaatqajam i'naari' so Jesús, ca' qaipeguenlec so nepo' ỹaatqajam qaica 'nejem loyac, 'nejem nqohin no'ueetaxac ca nashi. Ca co'na' ime, lotqai qaỹopilaxata so Pilato. ₁₂Ca' queso na'xa'a so Pilato chaqai so Herodes lotqai liỹa huagata', ma' saua'maxare shi'co' quen pa'guenaxaua'.

₁₃Ca' so Pilato lapoonta' so lashillipi na netaxaỹaxanqajanqaipi chaqai so lashillipi na qomyipi chaqai so qomyipi. ₁₄Ca 'naapego':

—Qamiri naviguiu'a ỹim dajo ỹale, quiyim 'ñiỹac chaqaida da ỹasauaxatetecta' na qomyipi. Ca' huañichigui quiyim ỹim shi'gue senatetac da'maxare, qam sqaica ca sanata lasauaxaset quená'maq pataxahiteguelec da'maxare. ₁₅Qai'neeta ñi Herodes, vichiguiño' rapilaxat da'maxare. Chaqai qamiri huañichigui da'maxare quiyim qaica ca lasauaxaset quiyim qaỹachigoxochichigui ca nalauataxac. ₁₆Ca' ỹim selaataxanlec da'maxare quiyim qaỹouaxan. Ca' ma' ime, ca sosouec.

₁₇Ca' so Pilato queda chi no'ueenataxac quiyim ỹa'ue ca ỹosouec quena ncoñiiteguesec quena' ỹovire'oga yi napoonaxanaxaqui, qaiyi na qomyipi ỹa'maxarenta so'maxare. ₁₈Qam sá'ogue nemashiguim ỹaualqatagui, 'naac:

—¡Qaỹalauat najo ỹale! ¡Ca' qaỹosouec ca Barrabás!

₁₉Qam sojo Barrabás qoỹanauguio' añi ncoñiitaxanaxaqui sauaxat co'na' npa'guene'e' so nashi hua'ñi yi na'a' lodegaxat Jerusalén, chaqai sauaxat quiyim lauataxanaxai. ₂₀Qam so Pilato ỹahotaque ỹosouec so Jesús, vichiguiño' lotqai pilalec quiyim renataxan. ₂₁Qam saua'maxare ỹaatqajam pilesalec paguec lelamaxa da laualaxague', 'nerac:

—¡Qaipateno na'maxare!

₂₂Ca' mashic tres pilalec so Pilato 'naapegalo saua'maxare, 'naaco':

—¿Nega'ỹo' ca ỹo'uet se ỹa'maxañi da'maxare? Ma' ỹim qaica ca sanata lasauaxaset cá'maq ñigui quiyim qaỹalauat. Ca' ỹim chi selaataxanlec quiyim qaỹouaxan da'maxare, ca' ma' ime, ca sosouec.

₂₃Qam so qomyipi ỹaatqajam ipaca'a ỹaualqatagui, rashiilaxanta'pegue quiyim qaipateno so Jesús. Ca co'na' ỹapaguec da laualaxac so qomyipi chaqai so lashillipi na netaxaỹaxanqajanqaipi, ca vire'ta qarasaachiguit quecá'maq ỹahotaque. ₂₄Ca' quiyi, ca so Pilato saachiguita quiyim ỹo'uet cá'maq rashiilaxansaque saua'maxare. ₂₅Ca' ỹosouec só'maq ỹale qanca'atapegueu'a quesaua'maxare, só'maq qaicoñi' sauaxat co'na' npa'guene'e' so nashi chaqai ralauataxan. Ca' ỹaanec so Jesús quecá'maq shim 'neesa'gue saua'maxare.

₂₆Ca co'na' mashic qaỹaueguec so Jesús, qaỹahotaque quiyim qaipateno. Ca' qaỹaconeu'a so ỹale, leenaxat Simón, ca la'a' na'ñi yi Cirene. So'maxare chicqauec quena no'ueenaxa. Ca' qohinapega quiyim i'xat so lpatenaxala', ca coỹaretaho nqohin queso Jesús.

₂₇Ca ỹaatqajam 'xoic so qomyipi coỹaretaho, chaqai 'xoic so 'aallipi, sá'ogue noỹentagui, ỹaualqatagui, paguec na le'xorenataxanaxa queso'maxare. ₂₈Ca so Jesús nqovilca'guit, ca 'naapega so 'aallipi, 'naaco':

—Qamiri 'aallipi ra'aari na Jerusalén, se nohiñilec aỹim, ta'ta'a chaqaqamii chaqai naua qachaalaxahi nohiñilec. ₂₉Ma' naate' naua na'xata' quiyim qohinac: “Ỹaatqajam chalego la'maxa acá'maq se ishit 'ue ca llaalec, chaqai aca se ỹauanapega 'man, chaqai aca se ỹauanapega quiyim illipaxantaho ca llaalec.” ₃₀Ca' quiyi, ca 'uo' na qom 'naapega na qoỹoqoshi'megue 'laua, 'naac: “Tahilgoto qomi'”; chaqai 'naapegalo naua quemarelgoto: “Ñaq qarayoqchiriñi.” ₃₁Ma' no'm qohine'tegue dajo aca ladala qo'paq, ¿huose'quet sqai paguec qohine'tegue aca qo'paq laso?

₃₂Ca qai'neeta qaỹaueguerec saua dos ỹale' lauataxanaxaqa, ma' qaỹahotaque nalauataxaua' nqohin so Jesús. ₃₃Ca co'na' qaỹovire'oga so 'laua leenaxat leuaxaic lqahic lpi'nec, ca' qaipateno so Jesús, chaqai qai'neeta saua dos lauataxanaxaqa. So 'óna qoỹana'gue da loic, chaqai so liỹa qoỹana'gue da nemaq. ₃₄Ca co'na' ñaq qaipatentapego, ca' so Jesús 'naaco':

—Qami' qota'olec, 'xoriñi' na qomyipi, ma' se ỹa'den da ỹo'ueetetac.

Ca' so nouaataxanyipi nallitetapiguilo saua loho so Jesús quiyim negue' ca taalgoto saua'maxare. ₃₅Ca' sá'ogue so qomyipi ỹa'ajantac so'maxare, chaqai vire'ta so nashillipi i'neetac, 'naac:

—Nca'laxatec quen na liỹa; ca' nagui 'maxaraic chi nca'laxatalta', no'm ỹaatqajam llic chaqaiñi ñí'maq nashi nca'laxaqui, lca'acsec ñi qota'olec.

₃₆Chaqai qai'neeta so nouaataxanyipi ỹaatqajam i'neetac so'maxare, ca' qanoquiiga'a, qaỹahotaque quiyim qane'taxañigui so lataxa chim. ₃₇Chaqai qohinapega:

—No'm chaqaqami' na' qami' lashi na judioipi, ca 'maxaraic quiyim chi nca'laxachiralta'.

₃₈Ca 'uo' so nerec qoỹeretalec na pa'aashiguim, hueetalec naua la'qaatqa na griegoipi chaqai na latinoipi chaqai hebreoipi, 'naac: “Ñi'maxare chaqaiñi ñí'maq lashi na judioipi.”

₃₉Ca' so 'óna npatenaxaua quesaua lauataxanaxaqa qai'neeta i'neetac so'maxare, 'naaco':

—No'm llic quiyim qami' nashi nca'laxaqui, ca' 'maxaraic quiyim chi nca'laxachiralta', chaqai qai'neeta qomi' qarca'laxachirec.

₄₀Qam so liỹa retaxaỹa'a so nauegaxaua, ca 'naapego':

—¿Sqaico' ca rqolonaxa'e' quiñi qota'olec? Ma' qami' chaqai 'ñiite' malam nouaxanaxaua'e' ñi'maxare. ₄₁Qomi' ỹaatqajam ỹa'maqachiguiñi quiyim 'xoic qare'xoric, ma' chi seshiuetenqatac dá'maq ñigui ca qarasauaxaset. Qam ñí'maq ñijo ỹale, qaica ca ỹo'uet se ỹa'maxañi.

₄₂Ca 'naaco':

—Qami' Jesús, totaxan coua'airo'o' aỹim ma' liỹa novichi' quiyim 'viiquiñi'sac ná'ogue najo.

₄₃Ca' so Jesús saachiguit, ca 'naaco':

—Ỹaatqajam llic nagui da shiñirapegaxaua', quiyim nagui chaqa'ma' ỹim qauora'e' quiyi la'a' na ca'laxaiquipi queda piguim.

₄₄Ca 'uo' ca mashic na'xa'a lavinñi. Ca ná'ogue na 'laua hueetalec na napalaxa, chi ỹovireta'a rashiiñi aso ra'aasa. ₄₅Ca' aso ra'aasa ỹaatqajam napalgui, ca' so lapoxonaxat pa'aauo aso no'ueenaxanaxaqui late'ogue' quiyi Jerusalén shicchichiguiñigui na lavinñi. ₄₆Ca' so Jesús ỹaualqo', 'naaco':

—Qami' ita'a, sañiguilo naua rqai'laqachichi' na ỹa'al.

Ca co'na' naauec da la'qaatec, ca' ileu.

₄₇Ca' co'na' iuanchigui dajo so lashi so nouaataxanaq, ca' imaqachin ñi qota'olec, 'naaco':

—Ỹaatqajam llic ñijo ỹale qaica ca lasauaxaset.

₄₈Ca' sá'ogue so qomyipi ỹauanchigui dajo, ca neuagaxatac, ca'e yi'maxare, nouaxante'e ana lotogue queda le'xoric nqai'en. ₄₉Ca sá'ogue so lauanatqaipi so Jesús, chaqai qai'neeta so 'aallipi quesó'maq queco' so'maxare co'na' chicqochi'ñi yi Galilea, qoỹoqote'oga yi hueete'e, ỹa'ajantac dá'ogue dajo.

₅₀Ca 'uo' so ỹale 'maxaraic da no'ueenataxac chaqai huagaxaraic, leenaxat José, na'ñi yi na'a' Arimatea huaugui yi 'laua Judea. So'maxare ỹalequetaugui so nashillipi ỹo'ueetegueñi na leloxoỹaxaquipi quena judioipi. ₅₁Sojo José nauaantaque quiyim novi' ca lo'ueenataxanaxac ñi qota'a ma' ỹoiquentac ná'ogue najo. Ca' so'maxare se ỹa'maxaren dá'maq 'ne'tegue lo'ueenataxanaxac so liỹa nashillipi. ₅₂Ca' so'maxare quepegue' so Pilato quiyim rashiilaxanegue so Jesús. ₅₃Ca co'na' ime naqajñi so Jesús queso npatenaxala', ca lepategue queso hualoq lahi lalagaxaic. Ca' illaugui aso lahi' chita'gue no'ueenata, naagui aso qa'. So'maxare saqa' ỹauanapega 'ue ca qaillaugui. ₅₄Ca' sojo na'xa'a chaqaiso' so na'xa'a 'maqataxaqui quiyim qana'maxateta'guit so liỹa na'xa'a co'mataxaqui ma' sham noviro.

₅₅Ca' so 'aallipi só'maq liỹaataco' so Jesús co'na' chicqochi'ñi yi Galilea qai'neeta eec ra'ajnaxane'oga so lahi'. Ca ỹauanchigui aca qaillaugui so Jesús. ₅₆Ca co'na' pilda'alo naua la'aate', ca ỹa'maxachiñi so coraxat lo'daxaraic lahita. Ca' nco'materec queso na'xa'a co'mataxaqui, ipacqajanchirigui da nelaataxanaxac.