Lucas 22

₁Ca' mashic ipalata'a so laloqo' quiyim qaỹa'ic na pan sqaca lpe'taqate, só'maq hueetaugui so na'xa'a quiyim qaỹo'leenta'a co'na' qanaqata'a so qomyipi quiyi Egipto. ₂Ca' so la'gaxalateripi na netaxaỹaxanqajanqaipi quena' qaretaxaỹa'pegue' ñi qota'a, chaqai na rapaxaguinataxanta'pegue na naqataxaquipi, idaantaque ca la'maqa' quiyim ỹalauat so Jesús, qam 'ue na lqolonaxa quena qom.

₃Ca' so na'ỹaapec inoxonougui so Judas, da liỹa leenaxat Iscariote. So'maxare chaqaiso so 'óna quesaua doce lelaatqaipi so Jesús. ₄So'maxare eec, quepegue' retaxaỹa'pegue' so lashillipi na netaxaỹaxanqajanqaipi chaqai ná'maq idaaneguelec añi no'ueenaxanaxaqui late'ogue' quiyi Jerusalén, ca na'deene'e' quecá'maq 'neeta ca leloxoỹaxac quiyim qaiconlec so Jesús. ₅Ca' saua'maxare ỹaatqajam netoonete'. Ca' quiyi, ca qohinapega quiyim qaỹa'ue aca nishiuete. ₆Ca' so'maxare saat, ca' imitaque ca la'maqa' quiyim ỹaano so Jesús ma' qaica ca qom.

₇Ca noviro' so na'xa'a quiyim qaỹa'ic na pan sqaca lpe'taqate. Sojo na'xa'a nalauataxaqui na qagreta llaalec quiyim qaỹa'ic, ca qaỹo'leente so na'xa'a co'na' qanaqata'a so qomyipi quiyi Egipto. ₈Ca' so Jesús ilate' saua Pedro chaqai so Juan, ca' 'naapegalo:

—Mohi, oquii 'maxachitañi ca qonoq quiyim qaỹo'leente so na'xa'a quiyim qanaqata'a so qomyipi quiyi Egipto.

₉Ca saua'maxare renataxane', 'nerac:

—¿Huá'gue ca vi'saque quiyim sellaqa'gue cá'maq sa'maxatqatañi?

₁₀Ca' so Jesús 'naaco':

—Ma' noxoñiu'a qamiri yi na'a' lodegaxat, ca' huañiỹa ma'le ca ỹale i'xateta aca no'xona 'laua no'qaachigui quena huaxaỹaq. Ca' chaqaica coỹari'tegue viraqchitau'a ca 'imec taugui. ₁₁Ca' 'ñiỹapega ma'le cá'maq ỹaatqajam lauo' ca 'imec: “Ñi napaxaguinataxanaq 'naapega qami': ¿Huá'gue ca 'imec cá'maq iqui'ỹaxaqui, quiyim squi'ỹa'e' na ỹapaxaguinatqaipi ma' sa'guinaq ca na'ic tai'a quena' qaỹo'leenta'a co'na' qanaqata'a so qomyipi quiyi Egipto?” ₁₂Ca' ca'maxare ỹachaxanalo qamiri ma'le yi nqui'ỹaaqa' ỹaatqajam lodegaxat, pa'aashiguim queda lelaq ñi 'imec, shi'gue qaỹa'maxatetañi; ca' 'maxachiñi ma'le ca qonoq.

₁₃Ca' saua'maxare que', ca' ipaquichigui nateneralec dá'ogue dá'maq 'neetapega so Jesús. Ca quiyi, ca ỹa'maxachiñi so na'ic.

₁₄Ca co'na' ỹovita ca laloqo' ca nqui'ỹaxac, ca so Jesús chaqai saua lelaatqa nqa'xañiñi, reloqosalec so nqui'ỹaxala'. ₁₅Ca' so Jesús 'naaco':

—¡Ỹaatqajam chalego na ishoxo quiyim qamiri iqui'ỹaxaua' quenajo na'ic ma' saqa' ỹovita yileu! ₁₆Ma' shinapegalo qamiri, quiyim nagui tot ishit liỹa pilalec sa'ic liỹa najo na'ic, toco' ma' ỹovita ca laloqo' quiyim ỹoiquentac ná'ogue najo ñi qota'olec.

₁₇Ca ỹacona aso 'taxaqui. Ime, ca' ỹaanot da na'aachic ñi qota'a. Ca co'na' ime, ca' 'naac:

—Coñiguit anajo 'taxaqui. Ca' nimiiñigui, quiñi 'óna ỹaanem ca liỹa. ₁₈Ma' ỹim shiñiỹapegaxaua' totqo pilac liỹa ñi'chigui najo li'i ana 'úva, toco' ma' ỹovita ca laloqo' quiyim ñi qota'a ỹoiquentac ná'ogue najo.

₁₉Ca co'na' ime, ca ỹacona so pan, ca ỹaanot da na'aachic ñi qota'a. Ime, ca' ỹasectaqchigui, ca ỹaanouguilo saua'maxare, ca 'naaco':

—Najo chaqaina ná'maq ỹoshicmaxa qoỹaañiguit ca nelauaxa tai'a quiyim ra'maxaiñi qamiri ma'le. 'Viichiho' dajo, qam se couahi'e aỹim.

₂₀Ca' chaqaida 'ne'tegue nqai'en caso 'taxaqui na' ime da lqui'ỹaxague'. Ca' 'naac:

—Najo 'taxaqui tai'a dajo dalaxaic 'maqataxac, qai'taxajñi quenaua iuo', qaỹocoraqta'pe qaỹahotaque ca ra'maxahi.

₂₁Qam nagui dá'maq ỹale yayaano ma'le ñqa'xanqata'ñi' quena qarqui'ỹaxala'. ₂₂Ma' najo ỹale llaalec queeta'gue so nayic só'maq qaỹachaxañi'ñigui, qam ¡'xoraicolec ñí'maq ỹale ỹahotaque ỹaano na'maxare!

₂₃Ca' quiyi, ca chi nenatetecta' saua'maxare nega'ỹo' ca shim ỹaano so'maxare.

₂₄Ca' quiyi, ca retaqata'ta' saua'maxare negue' ca ỹapaguec lecaic nqohin quesaua'maxare. ₂₅Qam so Jesús 'naapegalo':

—Na nashillipi quená'ogue na qom ỹaatqajam ỹoiquentac 'ec na ỹaatqajam 'co', chaqai ná'maq lashillipi na'maxare ỹamata'gue huagaxaraic qomyipi. ₂₆Qam qamiri sqai 'ñiita dajo ma'le. Ma' cá'maq ỹapacauec caqamiri, da no'ueenataxac 'neeta'gue ca paguec ne'necolec; chaqai cá'maq relaataxan, 'nejem nqai'en da no'ueenataxac ca nelaatec. ₂₇Ca ¿negue' ca ỹapacauec, cá'maq nqa'xanñi reloqojlec ca nqui'ỹaxala' que'e, loqo'm cá'maq qailaretac? ¿Mesqai llico' chaqaiso só'maq reloqotalec so lqui'ỹaxala'? Qam aỹim salequetauguilo qamiri, shintari' quiyim chaqaỹim nelaatec.

₂₈Qamiri nauá'maq ỹaatqajam ñauequetecto ñi'guenaxaua' quenaua ñi'guenaxaco. ₂₉Vichiguiño' saanema qamiri ca ro'ueenataxanaxaguii quiyim 'viiquiñitac ná'ogue najo, 'nejem ñi qota'a ỹaanem aỹim da ỹo'ueenataxanaxac, ₃₀qaiyi qui'ii chaqai ni'chii queca iqui'ỹaxala' ma' seuetaugui ca ỹo'ueenataxanaxac, chaqai nqa'xañingui caua nashi nqa'xanaxaqui', ca' michii na llaalqaipi so doce llaalqaipi so Israel.

₃₁Qai'neeta 'naaco' so qara'gaxala':

—Qami' Shimoñi', ñaqa 'ajñi' so na'ỹaapec lashiilaxanqate' qamiri, ma' ỹahotaque ri'guiñii quiyim ỹochigoxoi' qamiri, 'nejem nqai'en ca trigo; ₃₂qam aỹim ñqouagaxainteguelec qami', qaiyi sqo viñire'e ca rpi'ỹaxaqui'. Qam qami' ma' ỹovita quiyim rapillita ỹim, tauañi'o' na rqaỹachi'ipi, qaiyi qaidaata 'neetari' da lpi'ỹaxac.

₃₃Ca' so Simón 'naaco':

—Qami' ỹa'gaxala', ỹim sqaica ma' sqa shiquetau'e' ma'le qami' cañi ncoñiitaxanaxaqui, vire'ta quiyim yileua'ñi' qami'.

₃₄Qam so Jesús 'naapego' so'maxare:

—Pedro, nagui shinapega qami', quiyim nagui ma' saqa' noỹen ca huaqa'e, ca' tres pilliralec ma'le noqollicchitegue aỹim quiyim huañiriua'.

₃₅Ca' so Jesús renataxan, 'naaco':

—Quecana' selate' qamiri, cana' le'en aca qachoxoguii chaqai aca qadamii lahi', chaqai qapelachiri, ca ¿'uo' ca viñitaque na'le?

Ca saua'maxare 'neraco';

—'E', qaica.

₃₆Ca 'naapegalo':

—Qam nagui cá'maq 'ue aca lloxoqui, ca' i'xat, chaqai qai'neeta aca lam lahi'. Chaqai cá'maq qaica ca lecat, ca' imen ca lapo', ca rishiujnaxanaque ca'maxare. ₃₇Ma' ỹim shinapegalo qamiri quiyim ỹaatqajam ipaquichigui caỹim dajo 'nerac naua nerecse' la'qaatqa ñi qota'a, ma' 'nerac: “Ca qaỹalecqajnougui na sauaqhuaiquipi ca'maxare ma'le.” Ma' ná'ogue na qoỹeretañi caỹim ipaquichigui ma'le.

₃₈Ca saua'maxare 'neraco':

—Qami' qara'gaxala', 'enaua 'vii naua dos lecachi.

Ca' so'maxare 'naaco':

—Hua' yí, nalootañi.

₃₉Ime, ca' so Jesús inoxonec, qam quedá'maq chi no'ueenataxac, ca quepegue' so qoỹoqoshi'megue 'laua leenaxat nananqa' ana qo'paq olivo; chaqai so lapaxaguinatqaipi coỹaretaho. ₄₀Ca co'na' ỹovijta yi'maxare, ca 'naapegalo':

—Nqouagaxaiñii, qaiyi sqo viriu'a ca ne'guenaxaguii.

₄₁Ime, ca' so Jesús noỹootec quesaua'maxare, ca na' ỹoxe'gauc, ca' ỹa'chi'iñi naua le'cootal, ca' nqouagaxain. ₄₂Ca 'naac:

—Qami' ita'a, sqo viraqchira'a ỹim dajo ñi'guenaxac 'ec aca naqana chim. Qam mesqai chaqaica cá'maq sahotaque, qaicaata cá'maq vi'saque.

₄₃Ca' nanac so nelaatec piguim le'ec ỹaanem da lquesaxanaxa so'maxare. ₄₄Ca co'na' paguec da le'xoric, ca lotqai noquigaxatec da lquesaxanaxa da nqouagaxainaxac, chaqai na nenoxoỹaxa naquetac, 'ec naua leuo' ñitetañi quena 'laua.

₄₅Ca co'na' ỹomat da nqouagaxainaxac, ca ne'laxashiguim, ca quepegueto saua lapaxaguinatqa. Ca co'na' ỹovita, ca iuanejlec sá'ogue laqata, ma' ỹapaguec na lachicoxo. ₄₆Ca 'naapegalo' saua'maxare:

—¿Chi'negue ma' laxaita? Ne'laxachishiguim, ca' nqouagaxaiñii, qaiyi se ỹovira'alo qamiri ca ne'guenaxaguii.

₄₇Ca' ñaq retaqatac so Jesús co'na' novi' so 'xoic qomyipi. Ca' só'maq leenaxat Judas, sojo 'óna quesaua doce lapaxaguinatqa, na'aueta, ca nqo'neu'a so Jesús, ca' nqo'goq. ₄₈Ca' so Jesús 'naapego':

—Judas, ¿qami' nqo'goqai' najo ỹale llaalec, ma' viisaque quiyim 'ỹaañiro?

₄₉Ca' só'maq nauegaxauaripi so Jesús co'na' ỹauanchigui da qohintari', ca' qainat so'maxare, qohinac:

—Qami' qara'gaxala', ¿se'guenqataugui, sahoqote'e na qalecat?

₅₀Ca 'óno' so quesaua'maxare nouaxanec aso loicse lque'la só'maq lelaatec so la'gaxala' na netaxaỹaxanqajanqaipi quena' qaretaxaỹa'pegue' ñi qota'a. ₅₁Qam so Jesús 'naaco':

—'Xañaac, yí, nalootañi.

Ca' so Jesús ipootau'a so lque'la so nelaatec, ca ỹomatec. ₅₂Ime, ca' 'naapega só'maq lashillipi na netaxaỹaxanqajanqaipi, chaqai so leloxoiqatecse aso no'ueenaxanaxaqui late'ogue', chaqai so qo'xoiquipi só'maq nac ne'guena'oga so'maxare quiyim i'xat, ca' 'naapegalo:

—¿Naguiho' qamiri vita'ahi naua lecachi chaqai naua neponyi, mashic 'eco' ỹim cuataxai? ₅₃Quena' ỹim salequetauguilo qamiri quesaua'que saua na'xata' cañi no'ueenaxanaxaqui late'ogue', qam qaica ca 'ñii'tegue aỹim. Qam mashic ỹovita ca laloqo' quiyim 'ueenataxañii chaqai quena' ỹapacauec da lquesaxanaxa da lo'ueenataxanaxac na napalaxa.

₅₄Ca qaiconleco' so Jesús quiyim qaicoñi', ca qaỹauegueu'a ca la'a' so lashi na netaxaỹaxanqajanqaipi quena' qaretaxaỹa'pegue' ñi qota'a. Ca so Pedro coỹaretaho queso'maxare, qam qoỹoqo'chiguit. ₅₅Ca co'na' ỹovirero saua'maxare, ca' qaỹalon so norec, qaillaañigui na lavinñi so nasoxoc. Ca' qai'neeta so Pedro nqa'xanñi, ỹalequetauguilo saua'maxare. ₅₆Ca' aso nelaata, co'na' iuana so Pedro nqa'xantañi reloqotañigui ca norec, ca' ra'iito'ot, ca' 'naaco':

—Qai'neeta ñijo ỹale nauegaxaua da Jesús.

₅₇Qam so Pedro noqolliguit, 'naaco':

—Taque', ỹim se seuanapega da'maxare.

₅₈Qam co'na' ncopa dajo, lotqai 'uo' so liỹa iuana so Pedro, ca 'naaco':

—Qami' qai'neeta lapaxaguinatec da Jesús.

Ca' so'maxare 'naaco':

—Taque', ỹim 'e'.

₅₉Ca co'na' mashic shi'gom dajo, ca pilalec renataxan so liỹa, 'naaco':

—Ỹaatqajam llic quiyim ñijo ỹale chi nauegaxaua da'maxare, ma' ñi'maxare qai'neeta chicqa'gue da Galilea.

₆₀Ca' so Pedro 'naaco':

—Taque', se sa'den da 'xachisac.

Ca co'na' ñaq retaqatac so Pedro, ca' noỹen so huaqa'e. ₆₁Ca' quiyi, ca' so qara'gaxala' nqovilca'a so Pedro. Ca' so Pedro ỹo'leente'te ca la'qaatec so qara'gaxala', co'na' 'naac: “Ma' saqa' noỹen ca huaqa'e ma'le', ca' qami' tres noqollicchitegue aỹim, 'ñirac sqa huañirapiguiỹa'.” ₆₂Ca' quiyi, ca inoxonec so Pedro, ca' ỹaatqajam 'xoic da noỹenaxac.

₆₃Ca só'maq ỹalliripi reloqota'a so Jesús ỹaatqajam i'neetac so'maxare chaqai ỹouaxantac. ₆₄Ca qaỹapoguilo naua nqote' so'maxare, ca' qaỹouaxañigui na lashic, ca' qohinac:

—¡Ñaqa 'xachi' negue' ca rouaxañi'!

₆₅Chaqai 'xoic na liỹa na'qaatec so'maxare chaqai qaishiuentac.

₆₆Ca co'na' mashic richiguiñi, ca lapoỹata' so qo'xoiquipi quena judioipi, chaqai saua lashil na netaxaỹaxanqajanqaipi, chaqai na rapaxaguinataxanta'pegue na naqataxaquipi. Ca' qaỹauegueu'a so Jesús so nashillipi ỹo'ueetegueñi na leloxoỹaxaquipi. Ca qainatetac, qohinac:

₆₇—'Qaataxañitema qomi' quiyim ¿chaqaqami' ná'maq nashi nca'laxaqui?

Ca' so'maxare 'naaco':

—No'm shinapegalo qamiri ajá'a, chaqaỹim, qam qamiri sqai viilec aỹim. ₆₈Chaqai no'm sa'ue ca inataxanaxac, ca' qamiri sqai taxahi, chaqai mese yosohiuec. ₆₉Qam quenagui najo ỹale llaalec shi'gue nqa'xantañi queda loic ñi qota'a, ñí'maq sqaica 'nejem lquesaxanaxa.

₇₀Ca na' ime, ca sá'ogue qaimaalec qainat, qohinac:

—¿Ca' qami'o' na' qami' llaalec ñi qota'olec?

Ca' so Jesús 'naaco':

—Ajá'a, chaqaỹim, ma' qamiri qai'neeta 'ñiỹac.

₇₁Ca' saua'maxare 'neraco':

—¿Negue' queto' ca liỹa souenaq quiyim retaqa? Ma' qomi' ỹaatqajam sa'xaiqachigui dá'maq ỹa'xat.