Lucas 24

₁Ca co'na' nete'etam queso 'auaxaic na'xa'a no'ueenataxanaxaqui, ca so 'aallipi quepegue' aso lahi', qai'xatete' saua corqate' mashic qaỹa'maxatesañi. Chaqai 'uo' so liỹa 'aallipi coỹaataxan. ₂Ca co'na' qaỹovire'oga aso lahi', ca qaiuanejlec so qa' lapooque' aso'maxare totqai hua'ñi ca loma'. ₃Ca' qainoxonougui aso'maxare, qam se qaỹanata so qara'gaxala' Jesús. ₄Ca' ỹaatqajam 'uo' da lqolonqa' saua'maxare, chaqai se ỹa'deene' ca 'neete', ca idaanda'alo saua dos ỹale' nachaatesañi, huaqata'to saua'maxare, qashilgue' saua loho. ₅Ca' saua'maxare ỹa'yi'iñi naua le'cootal, ca' ỹaatqajam ỹovirera'guit na 'laua, paguelec da lqolonqa'. Ca' sauajo ỹale' 'neraco':

—¿Chi'neco' ma' michitaque quena leuaxaiquipi cá'maq nca'leetauec? ₆Sqaica quenajo, ma' liỹa nca'leuec nqohin. Ñaq o'lliinchi'e da ỹa'xat na' llaq riỹahitac quiyi Galilea, na' 'naac: ₇“Najo ỹale llaalec qoỹaanougui ma'le na sauaqhuaiquipi, ca' ma'le, ca qaipateno. Qam ma' ỹovirerec caua tres na'xata', ca lotqai liỹa nca'leuec nqohin.”

₈Ca' saua'maxare chi no'uentetegue da la'qaatec so Jesús. ₉Ca co'na' ime chicqorau'a aso lahi', ca ỹa'xate' dá'ogue dajo queso once lelaatqaipi, chaqai quesá'ogue so liỹaripi. ₁₀Ca' saua ỹodooro da la'xaỹaxague' saua nelaatqa, chaqaisaua saua María lase yi Magdala, Juana, María late'e so Jacobo, chaqai so liỹa 'aallipi. ₁₁Qam saua nelaatqa 'ec chi nasaguiric nqai'ne' da ỹa'xatesac saua'maxare, ca sqai huerelec.

₁₂Qam so Pedro inoxonec, ca' eec ne'guenta ra'ajnaxane'oga aso lahi'. Ca co'na' ra'i'ñigui na lauel aso'maxare, ca iuanalo saua hualoq lahil lalagaxaqa hueesau'e na lahi aso'maxare. Ime, ca' queho queca la'a', ỹaatqajam 'xoic le'laxa quedá'maq 'neeto' na'le dajo.

₁₃Ca' chaqaisoota sojo na'xa'a, ca 'vio' saua dos quesaua'maxare taira'gue yi na'a', leenaxat Emaús, 'uo' ca once kilómetros lesega quiyi Jerusalén. ₁₄Ca co'na' queesa'gue so nayic, ca na'qaataxansapigui dá'ogue dá'maq 'neeto' na'le dajo. ₁₅Ca co'na' retaqasapigui chaqai noqollictetecta', ca' chaqai huaqato so Jesús, ca nauequetecto saua'maxare. ₁₆Ca ỹaatqajam qara'iito'ot, qam 'eco' 'ue só'maq 'em se qano'uenegue so'maxare. ₁₇Ca' so Jesús inato'o':

—¿Negue' cá'maq noqollicchitapigui quena' naguita'gue na nayic? chaqai ¿chi'negue ma' chigoita?

₁₈Ca 'óno' so quesaua, leenaxat Cleofas, saat, ca 'naaco':

—Ná'ogue na qomyipi na'ñi na Jerusalén qaica ca se ỹa'den da 'ue quesauajo na'xata'. ¿Chaqaqamito'o' ñi'sa'ñi yi'maxare sqa 'yiiñi'o' dajo?

₁₉Ca so'maxare 'naaco':

—¿Negue' ca 'neeto' ca'maxare?

Ca' saua'maxare 'neraco':

—Dá'maq 'neeta ca Jesús, Nazaret le'ec, cá'maq la'qaataxanqajnec ñi qota'a. Sojo ỹale qaica ca qalanac quena la'qaatec chaqai quená'maq ỹo'uet, chaqai ỹaatqajam ỹa'maxarenta so'maxare ñi qota'olec chaqai ná'ogue na qomyipi. ₂₀Qam na lashillipi na netaxaỹaxanqajanqaipi quena' qaretaxaỹa'pegue' ñi qota'a chaqai na qarashillipi ỹaanchiguit so'maxare da lelauaxa chaqai quiyim qaipateno. ₂₁Qam qomi' 'ue da qanaquitaxac quiyim chaqaiso só'maq nca'laxatec ma'le na llaalqaipi so Israel. Chaqai nagui quedá'ogue dajo, ca' mashic ỹovite' tres na'xata' quiyim 'ue dajo. ₂₂'Nesa ma' 'vii caua 'aalo chicqauguilo qomi' quiyim qo'ỹoqochite' qomi'. Ma' ñaq na'xa'ataco' na'le, ca' querepegue' aca lahi'. ₂₃Ca co'na' se ỹanajta ca'maxare, ca rapilerec, ca ỹa'xatesac ca lauanaxanaxague' co'na' iuanalo saua nelaatqa piguim lase' ỹa'xatesac quiyim so Jesús nca'leetauec. ₂₄Ime, ca' que' saua chi qanauegaxaua' ra'ajnaxande'oga aso lahi'. Ca co'na' ỹovirere'oga, ca iuanterelec co'chiichigui, ca' ipaquichigui da 'nerac saua 'aalo, qam se qaiuana ca Jesús.

₂₅Ca' so Jesús 'naaco':

—¡Ỹaatqajam qaico' ca 'yiiñii qamii, chaqai chalego laỹaloxo quiyim viilec ná'ogue na la'qaataxanaxaquipi so la'qaataxanqajanqaipi ñi qota'a! ₂₆¿Sqa 'yiiñiỹo' quiyim cajo nashi nca'laxaqui 'au ca le'xoric, ca' qaigueme ỹovira'a quiyim ỹapacauec da lichoxoric quená'ogue?

₂₇Ca' quiyi, ca ichoxotema da leloxoỹaxac da na'qaatec naneretañi, quenaua nerecse' la'qaatqa ñi qota'a ỹa'xatesa'guit so'maxare, ỹachigoxochichiguilo saua 'avichiriñi lerecse' so Moisés, ỹovira'oga nqai'en aso pa'aatec lerecse so la'qaataxanqajanqaipi ñi qota'a.

₂₈Ca co'na' ỹovirera'a yi na'a' tairau'a, ca' so Jesús chaqai 'negue 'eco' sham ỹa'iitauec. ₂₉Qam saua'maxare ipaquera'a nolliisegueñi, 'neraco':

—Ro'viñira'ansopa qomi', ma' nagui avit, chaqai mashic sham lepe.

Ca' so Jesús inoxono no'ueena'ansopa saua'maxare. ₃₀Ca co'na' mashic nqa'xansañi, reloqosalec so nqui'ỹaxala', ca so'maxare ỹacona so pan, nqouagaxainlec. Ime, ca ỹaanouguilo saua'maxare. ₃₁Ca' quiyi, ca saua'maxare 'ec naviqueterec naua nqote', ca no'uentegue so'maxare. Qam so'maxare palac. ₃₂Ca saua'maxare retaxaỹata', 'neraco':

—¡Ỹaatqajam llic mashic ỹaviquetauguilo nqai'ne' naua qare'taxanata na' ñanaguinqata'gue na nayic, na' ichoxotetapeguema qomi' da leloxoỹaxac naua nerecse' la'qaatqa ñi qota'olec!

₃₃Ca' quiyi, ca qaica ca nauaandaque, chaqa'ma' quetegue so nayic, pile' queda Jerusalén. Ca co'na' ỹovite', ca iuanterelec lapoota'ta' so once lelaatqaipi, chaqai sá'ogue so liỹaripi. ₃₄Ca chaqa'ma' qara'qaataxanalo, qohinac:

—Ỹaatqajam llic quiyim liỹa nca'leuec nqohin so qara'gaxala', ma' so Simón ỹauano'.

₃₅Ca saua'maxare lotqai ra'qaataxane'o' quedá'maq 'neeto' quesaua'maxare queso nayic, chaqai dá'maq 'neeto' na' no'uentegue so Jesús co'na' ỹasectaqchigui ca pan.

₃₆Ca' ñaq qaretaqatapigui dajo, ca' so Jesús nachaachichiguiñi quena lavinñi so qomyipi. Ca' riquinaxan, 'naaco':

—Ỹaatqajam 'uo' da ra'maxahi ma'le.

₃₇Qam saua'maxare no'daxateterec chaqai 'xoic da lqolonqa', 'neesapega nqui'i so iuanta. ₃₈Qam so Jesús 'naapegalo':

—¿Chi'neco' ma' ro'chii? chaqai ¿chi'neco' ma' 'uo' da roqollictaxanaxahi quenaua re'taxanatahi? ₃₉Ñaqa 'ajñii' naua ñapoquena chaqai naua ipiaate'. Quiyim chaqaỹim. Poochiu'a aỹim chaqai ya'ajñii, ma' ca nqui'i qaica ca la'at chaqai ca lpi'nec, qam qamiri huañichigui nagui caỹim 'ue.

₄₀Ca co'na' 'naac dajo, ca ỹachaxane' naua napoquena chaqai naua lapiaate'. ₄₁Qam saua'maxare saqa' huerelec, paguec da netoonaxague' chaqai da le'laqa' ñaqa 'ue. Ca' so Jesús 'naaco':

—¿Meca qanoxohi quenajo?

₄₂Ca' qoỹaanem so nallin lahi nqueualatec chaqai so li'ỹaac so 'laua nate' leta'a. ₄₃Ca so'maxare ỹacoñiguita. Ime, ca' ỹa'ic, ỹa'ajansac nqai'ne' saua'maxare. ₄₄Ca co'na' ime, ca 'naapegalo' saua'maxare, 'naaco':

—Dá'maq sovirau'a chaqaida dá'maq shi'gue shinac na' llaq ñauequetecto qamiri: quiyim ipaquichigui nqohin ná'ogue ná'maq qoỹeretañi caỹim quena nelaataxanaxaquipi queso Moisés, chaqai ana lerecse so la'qaataxanqajanqaipi ñi qota'a, chaqai so nerecseripi leenaxat No'ueenqaipi.

₄₅Ca' quiyi, ca' ỹa'deenaxanaxanque saua'maxare naua nerecse' la'qaatqa ñi qota'a. ₄₆Ca 'naapegalo':

—'Eda 'neeta da qoỹeretañi quiyim ca nashi nca'laxaqui 'au quiyim qaỹalauat, qam ma' ỹovi' tres na'xata', ca lotqai liỹa nca'leuec nqohin. ₄₇Ca' dajo leenaxat qaỹa'xat ma'le, qara'qaataxanougui na ỹoreta'oguit qomyipi, quiyim qohinapega ná'ogue na'maxare quiyim ỹalate' naua no'ueenataxaco, qaiyi naua lasauaxasete' qaỹapalaxate', qaỹachigoxochichi'ñi na Jerusalén. ₄₈Ca' qamiri ỹa'qaataxanqajanqa quedá'ogue dajo. ₄₉Ca' ỹim ñilatalo qamiri ma'le cá'maq ỹachaxantac nallaaqo' ñi ita'a, qam sqai daiỹari' quena na'a' lodegaxat Jerusalén, toco' ma' coñiguit ca nquesaxanaxa chigoxoshiguim.

₅₀Ca' so Jesús ỹaueguerec queda pa'aauec quiyi na'a' lodegaxat. Ca co'na' ỹovire'oga yi Betania, ca' ỹachaxañishiguim naua laua', ca ỹaanem da nqouacqa' saua'maxare. ₅₁Ca co'na' mashic ỹaanema da lqouagaxa saua'maxare, ca' ca'ahi, ca qaỹaueguegue da piguim. ₅₂Ca saua'maxare co'na' ime nqouagaxaintacot so'maxare, ca piltegue da Jerusalén, ỹaatqajam netoonta'pe. ₅₃Ca' chaqai 'neesari' sqai ỹaxandac hueesau'a aso no'ueenaxanaxaqui late'ogue', ỹo'ueensac ñi qota'olec. Ajá'a, ca' chaqaida 'neeta dajo.