(10.1—16.1 Qaỹa'xat ná'maq se qaiconapegueu'a qaiyi co'teeta ca qom.)
So na'xa'a quiyim qaỹapalaxat na nasauaxaset
2Ca' ñi qara'gaxala' 'naaco' queso Moisés:
—'Ñirapega ma'le ñi rqaỹa'e' Aarón quiyim se inoxona'a yi co'teeta ñqa'xanqa' quecanchaqaica na'xa'a yí'maq pootalec queso napoxonaxat, chaqai yi pa'aata'guit añi lapooquete añi lahi' na ilaataxanaxaquipi, qaiyi se ileu. Ma' ỹim ñoviriñi ma'le, seuetaugui so naueguelec, seuetalec añi lapooquete añi lahi' na ilaataxanaxaquipi. 3Ca' so Aarón ma' inoxona'a na ñqa'xanqa' pootalec, qam 'au ỹavigaxat ca' ỹaano ca huaqui llaalec qaiyi sapalaxat na lasauaxaset, chaqai ca qagreta loua' ỹaano quiyim ỹavigaxat lachitaxanataxanaxat. 4Chaqai no'm inoxono, qam ỹansañi caua loho sauaapigui lo'ueenataxanaxaqui' chicqoraugui na lino, chaqai caua lpa'xanqate, chaqai ỹanñi ca laxa' na lasot, chaqai ca lapooque' na lqahic. Ma' shi'gue qoỹaanoto aỹim cauajo noho, vichiguiño' quiyim ỹañiñi, qam ỹa'auaxan nachil.
5Chaqai so Aarón ỹachigoxotaugui na Israel llaalqaipi caua ỹaconeu'alo dos quetaq louaari, ca ỹaando qaiyi sapalaxat na lasauaxaset, chaqai ca qagreta loua', ca' qoỹaano qaỹavigaxat, ca' lachitaxanataxanaxat. 6Ca' ỹaano cajo huaqui llaalec quiyim chi lachitaxanataxanaxat, ca ỹavigaxat, ca' sapalaxat na lasauaxaset, qaiyi sapalaxat ná'maq chi lasauaxaseteripi chaqai na lasauaxaset so llaalqaipi. 7Ca ma' ime, ca iconeu'alo saua dos quetaq louaari, ca' ỹaanoto aỹim quiñi lasom ñi 'imec na'daañi, yí'maq hua'ñi quiyim qanauane'e' aỹim. 8Ime, ca' qanallichiguilo saua queta', qaiyi qaỹa'den cá'maq qoỹaanot aỹim qota'olec, chaqai cá'maq taỹot so nqui'i Azazel. 9Ca' cajo quetaq loua' cá'maq tajlec quiyim qoỹaanot aỹim, ca ca'maxare ỹaano so Aarón qaiyi sapalaxat na lasauaxaset. 10Qam ca quetaq cá'maq tajlec quiyim qoỹaanot ca Azazel, ca'maxare nca'leetauec, ca' qaỹachaxanot aỹim, qaiyi sapalaxat na lasauaxaset. Ime, ca' qaỹo'da'oga yi 'laua qaica qom yí'maq neeta'ñi ca Azazel.
11Ca' so Aarón ỹaano so huaqui llaalec chi lachitaxanataxanaxat, ca ỹavigaxat, qaiyi sapalaxat na lasauaxaset, qaiyi so'maxare chaqai so llaalqaipi sapalaxat na lasauaxaseteripi. 12Ime, ca' icona ma'le aca lahi' na nichiinaxanaxat, ca no'xataxachigui cana poqo ỹachigoxotalec aso ncopatoxonaxalate só'maq neeta'ñi yi leseeque'ta yi ñqa'xanqa', chaqai dos napoquena ỹaconougui so nichiinaxanaxat lo'daxaraic na lahita, ca' pa'xanauo queso napoxonaxat. 13Ca' cajo nichiinaxanaxat seuanchigui inaxañigui ca norec. Ca' naua lesalaxa' so nichiinaxanaxat pojlec nqai'en aso lapooquete aso lahite' saua ilaataxanaxaco. Ca' quedajo, ca' se ileu ma'le ñi Aarón. 14Icona qai'neeta ma'le ca cocho'qui' leuoripi aso huaqui llaalec, ca ỹahote'e ada napoquena, ca iñitaxajlec aso lapooquete queda lahi pa'aata'gue da lqodoigue. Ca' siete iñitaxajlec queso leuoripi ỹahote'e ada napoquena quena pa'aatauec caso lapooquete. 15Ca ma' ime dajo, ca' ỹalauat ca quetaq loua', ca ỹavigaxat, ca' ỹaano qaiyi sapalaxat na lasauaxaset so qomyipi. Ime, ca' ỹodoro saua leuo' pa'xandauo queso napoxonaxat. Ca ma' pa'aatauo, ca iñitaxajlec na pa'aashiguim chaqai na pa'aatauec caso lapooquete, ipacqajanchigui dá'maq 'ne'tegue na'le quesaua leuo' so huaqui llaalec. 16Ca chaqaida dá'maq qohine'tegue ma' qaico'taxat yí'maq ñqa'xanqa' quená'ogue ná'maq se no'uen, npa'guenaxanaxa chaqai na lasauaxaset so Israel llaalqaipi. Ca' chaqaida 'ñitetegue qai'neeta quiñi 'imec na'daañi quiyim qanauane'e' aỹim, ñí'maq neetañigui lavinñi na qomyipi chaqai ná'maq loic se no'uen.
17Ca' so Aarón no'm ñaqai hueetaugui ñi 'imec na'daañi ma' sapalaxat ca lasauaxaset, ca' chi ỹovireta'a quiyim nenoxonec so'maxare, ca' qaica ca hueete'e ñi 'imec na'daañi quiyim qanauane'e' aỹim. Ca ma' sapalaxat ca lasauaxaset so'maxare chaqai na llaalqaipi chaqai ná'ogue na Israel llaalqaipi, 18ma'le, ca' nenoxonec, ca co'taxat ada ncopatoxonaxalate quiyi ñqa'xanqa'. Icona ma'le ca cocho'qui' huaca leuoripi chaqai ca quetaq, ca ỹa'meene' naua lasote chaqai naua lahil ada ncopatoxonaxalate. 19Chaqai siete iñitaxajlec queca leuoripi ada ncopatoxonaxalate, ỹahote'e ada napoquena. Ca' quedajo, ca' co'taxat ma'le na Israel llaalqaipi quená'maq ỹo'ueetetac se no'uen.
20Ca ma' so Aarón ỹomat quiyim co'taxat yi ñqa'xanqa' pootalec, chaqai ñá'ogue ñi 'imec na'daañi hua'ñi quiyim qanauane'e' aỹim, chaqai ada ncopatoxonaxalate, ca relaataxane'oga ca quetaq loua' ñaq nca'leetauec cá'maq taỹot so nqui'i Azazel. 21Ime, ca' ỹashil-lec na lqahic cajo isecỹac, ca' ỹa'xat ná'ogue ná'maq se no'uen ỹo'ueetetac, lpa'guenaxanaxa, chaqai na lasauaxaset so Israel llaalqaipi. Ca quiyim 'ne'tegue dajo, ca' illaalec na lqahic so quetaq loua' na nasauaxaseteripi. Ca 'ue cá'maq ỹale ỹaueguec quiyi 'laua qaica qom, ca' ỹosouec. 22Ca ma' na'laañi ca quetaq loua' ỹo'maac quiyi 'laua qaica qom, ca i'xatetac ná'ogue ná'maq se no'uen ỹo'ueetetac so qomyipi quiyi 'laua qaica ca naalec. 23Ime, ca' so Aarón inoxonougui ñi 'imec na'daañi yí'maq hua'ñi quiyim qanauane'e' aỹim, ca' naqate' saua loho lo'ueenataxanaxaqui' quena' inoxona'a yi ñqa'xanqa' pootalec, ca illira'anyi. 24Ca na' ñaqai hueetaugui ñi 'imec na'daañi, ca' nquiỹo quena huaxaỹaq. Ca ma' ime, ca' ỹañiñi saua chaqai loho, ca' ỹaano só'maq chi lachitaxanataxanaxat chaqai só'maq sauaaque ỹaano queso qomyipi. Ca sapalaxat ná'maq chi lasauaxaset chaqai so qomyipi. 25Chaqai aso lo'ỹo so nachitaxanataxanaxat qaiyi sapalaxat na nasauaxaset, inaxalec aso ncopatoxonaxalate, ca ỹavigaxat. 26Chaqai cá'maq ỹaueguec ca quetaq loua' queca Azazel, ca' ỹosouec, ca ca'maxare quiỹo' caua loho chaqai nachil. Ca ma' ime, ca qaigueme ishit inoxono quena co'matqa'.
27Ca huaqui llaalec chaqai ca quetaq loua' cauá'maq mashic qoỹaando qaiyi sapalaxat na nasauaxaset, chaqai saua leuo' mashic qaỹodou'alo yi ñqa'xanqa' pootalec qaiyi sapalaxat na nasauaxaset, ca' qaỹodouec sá'ogue so la'at chaqai so loshicmaxa, ca' qaỹavigaxat ỹasoota nqohin queda pa'aauec quiyi co'matqa'. 28Ca cá'maq qom copata'a so'maxare, ca quiỹo' caua loho chaqai nachil quena huaxaỹaq. Ca ma' ime, ca' qaigueme ishit quiyim inoxona'a na co'matqa'.
29Ca' dajo ỹaatqajam ilaataxanaxac chaqai qaica lqodoc caqamiri 'neetasa': ma' ỹovire'oga ca na'xa'a diez queca shiraigo siete, ca' chaqaica viichigui nqai'ñii nqopaaqachichii quiyim nqouagaxaiñii, chaqai sqo 'ueenataxañii chaqai ná'maq ỹoqa'a ca chicqa'gue ỹalequetauguilo qamiri. 30Ma' quesojo na'xa'a sapalaxate' naua rasauaxashichii', ca' co'teete' qamiri quesá'ogue so'maxare. 31Ca' dajo ilaataxanaxac qaica lqodoc caqamiri, ca no'uen quiyim nco'machiuec quesojo na'xa'a chaqai quiyim nqopaaqachichii. 32Ca cá'maq retaxaỹaxanqajñiguii quiyim retaxaỹa'pegue' aỹim ỹaatqajam nca'acsec quiyim qoỹanagui da lo'ueenataxanaxac ca leta'a quiyim retaxaỹaxanqajñiguii, ca ca'maxare ỹo'uet aca nachitaxanataxanqate, qaiyi sapalaxat na nasauaxaseteripi. Ca' ỹañiñi caua loho sauaapigui lo'ueenataxanaxaqui'. 33Ca ca'maxare co'taxateta yi ñqa'xanqa' pootalec, chaqai ñá'ogue ñi 'imec na'daañi, chaqai ada ncopatoxonaxalate, qaiyi sapalaxat na lasauaxaset na netaxaỹaxanqajanqaipi chaqai ná'ogue na Israel llaalqaipi.
34Ca' dajo ilaataxanaxac qaica lqodoc caqamiri; quiyi ñaaxa lotqai qaỹo'uet aca nachitaxanataxanqate, qaiyi sapalaxat na lasauaxaset na Israel llaalqaipi.
Ca qaỹo'uet qaipacqajanchigui dá'maq 'naaco' na'le ñi qara'gaxala' queso Moisés.
(17.1—18.30 Nelaataxanaxac quena' qaỹavigaxat na nachitaxanataxanaxat quiyi lanatqa' ñi qota'olec, chaqai quiyim se qaỹa'ic na leuoripi, chaqai se qaỹa'maxaren quiyim qoyiueta'piguit ca sqoỹoqa'a chaqai ca isecỹac.)
