Na' taañi ro'ueenataxan so Aarón quiyim netaxaỹaxanqajnec
1Ca co'na' ỹovite' saua 'ocho na'xata', ca' so Moisés roỹaxana so Aarón chaqai saua llaalqa chaqai so qo'xoiquipi queso Israel llaalqaipi. 2Ca 'naaco' queso Aarón:
—Coñira'a ca huaqui llaalec qaica ca lcoñiraxa, ca 'ỹaañiro qaiyi qaỹapalaxat na rasauaxashichi', chaqai ca qagreta loua' qaica ca lcoñiraxa, ca 'ỹaañiro quiyim qaicopata'a rachitaxanataxanaxachi', ca do'ira'alo ñi qara'gaxala'. 3Ca na Israel llaalqaipi 'ñirapega quiyim ỹaconeu'a ca quetaq loua', ca ỹaano qaiyi qaỹapalaxate' caua lasauaxasete', chaqai ca huaqui llaalec chaqai ca qagreta llaalec cá'maq ñaqai 'oonoqui' yi niñaaxa, caua'que qaica ca lcoñiraxa', ca' caua'maxare qoỹaando, ca qaỹavigaxate' quiyim lachitaxanataxanqate'. 4Chaqai ca 'óna tooro chaqai ca qagreta loua', ca' iuanchiguilo nqohin ñi qara'gaxala' quiyim qaỹalauate', ca qoỹaando quiyim qaỹavigaxate', ca lotqai liỹa qaropilot ñi qota'olec. Chaqai nodouo qai'neeta ca na'deguesec 'aríña, lalegue' nqohin na aceite. Ma' ñi qara'gaxala' nachaxanalo qamiri quena na'xa'a.
5Ca' so Israel llaalqaipi nodou'a ca 'imec na'daañi yí'maq hua'ñi quiyim qanauane'e' ñi qota'a ná'ogue ná'maq 'naac so Moisés quiyim nodouo. Ca sá'ogue so qomyipi nachaatetañi, reloqotau'a ñi qara'gaxala'. 6Co'na'le, ca' so Moisés 'naaco':
—Najo ná'maq relaataxanlec ñi qara'gaxala'. Ca' 'viichii da'maxare. Ca ma'le, ca' ñi qara'gaxala' nachaxanalo qamiri, ca' huañichigui qamiri ma'le dá'maq chalego lecaic lauaq ñi'maxare.
7Co'na' ime, ca' so Moisés 'naaco' queso Aarón:
—Ñaq nqo'ñira'a añi ncopatoxonaxalate, ca 'ỹaañiro ca rachitaxanataxanaxachi' quiyim qaỹavigaxat qaiyi qaỹapalaxat na rasauaxashichi', chaqai 'ỹaañiro ca isecỹac quiyim vigaxachi' qaiyi qaỹapalaxat na rasauaxashichi' chaqai na lasauaxaset na Israel llaalqaipi. 'Ỹaañiro qai'neeta ca lachitaxanataxanaxat na Israel llaalqaipi qaiyi qaỹapalaxat ca lasauaxaset. Pacqajñichirigui dá'maq 'naac ñi qara'gaxala'.
8Ca' so Aarón nqo'neu'a aso ncopatoxonaxalate, ca ỹa'yi'ñigui ana nacallicshiguim so huaqui llaalec, ỹauaaque quiyim ỹaano qaiyi qaỹapalaxat na lasauaxaseteripi. 9Ca' saua llaalqa chaqa'ma' nodoora'a saua leuo' aso huaca, ca' so Aarón ilete' naua napoquena queso leuoripi, ca ỹa'meene' naua cuatro lasote aso ncopatoxonaxalate. Chaqai saua nerauec leuo', ca' ỹocotot aso ncopatoxonaxalate. 10Ime, ca' inaxalec aso ncopatoxonaxalate aso lo'ỹo chaqai saua leteguese chaqai aso lolamec lo'ỹo só'maq isecỹac, ca ỹavigaxat qaiyi qaỹapalaxat na nasauaxaseteripi. Ca' qaipacqajanchigui dá'maq la'qaatco' na'le ñi qara'gaxala' queso Moisés. 11Qam ca la'at chaqai ca loshicmaxa pa'xanauec queda lahi yí'maq qoyinta'ñi na' ỹavigaxat.
12Ca' so Aarón ỹalauat qai'neeta só'maq isecỹac qaỹavigaxat, ca' qoỹaano quiyim nachitaxanataxanaxat. Ca' saua llaalqa ỹodoora'a so'maxare saua leuo', ca' so Aarón ỹocorelec aso ncopatoxonaxalate chaqai naua lahil aso'maxare. 13Ime, ca qaỹodou'a so'maxare so lqahic chaqai saua lahil qaichaxarec so isecỹac, qaỹahotaque qoỹaano quiyim qaỹavigaxat. Ca' so Aarón ỹavigaxat inaxalec aso ncopatoxonaxalate. 14Ime, ca quiỹo' saua lauelese' chaqai saua lapiaate', ca' inaxarelec aso ncopatoxonaxalate. Ca sá'ogue so isecỹac ỹavigaxat, qaica ca no'ueenauec.
15Ca' so Aarón ỹaano qai'neeta so lachitaxanataxanqate so Israel llaalqaipi. Ca' ỹacona'a so quetaq loua', ca' qoỹaano quiyim qaỹavigaxat qaiyi qaỹapalaxat ca lasauaxaset so qomyipi, ca' ỹalauat, ca' ỹaano, 'ne'tegue dá'maq 'au 'ne'tegue aso lachitaxanataxanqate. 16Ca' quiyim ỹaano ca isecỹac quiyim qaỹavigaxat, ca' ipaquichigui nqai'en dá'maq qaỹa'yiñi no'ueenataxac nqohin. 17Ime, ca' ỹaano aso lachitaxanataxanqate trigo la, ca ỹaconougui no'qaachigui nqai'en ada napoquena, ca illaalec ada ncopatoxonaxalate. Ca' ỹavigaxat, liỹaataho nqai'en nachitaxanataxanqateripi queso nete'eta.
18So Aarón ỹalauat qai'neeta so tooro chaqai so qagreta loua' ỹaano so Israel llaalqaipi quiyim qaỹavigaxat qaiyi pilot ñi qota'olec. Ca sauá'maq llaalqa so Aarón nodou'alo so'maxare saua leuo', ca ỹocorelec chaqai ỹocototo naua lahil aso ncopatoxonaxalate. 19Chaqai qai'neeta qaỹodou'a aso tooro lo'ỹo chaqai so qagreta loua', so lqai'it, chaqai saua lauelese' lo'ỹo, chaqai saua leteguese, chaqai so lo'ỹoqo' so lolamec. 20Ca' aso lo'ỹo qaỹauaxaỹaxañiguit aso lotogue lo'ỹo. Ca' so Aarón ỹavigaxat aso lo'ỹo hueetalec aso ncopatoxonaxalate. 21Qam aso lotogue chaqai so loteleta' la'at loicsec, qaidaata quiyim ipaquichigui nqohin da na'qaatec quiyim qaỹachaxanot ñi qara'gaxala'. Ca' ipaquichigui nqohin dá'maq 'naaco' na'le ñi qara'gaxala' queso Moisés.
22Ca' so Aarón ỹachaxañishiguim naua lqai'laqate', ca' ỹaanem da no'uen llicyaxac so Israel llaalqaipi. Ca co'na' mashic ỹomat ỹaano aso nachitaxanataxanqate quiyim qaỹapalaxat na nasauaxaseteripi, chaqai aso nachitaxanataxanqate qaỹavigaxat, chaqai asó'maq qoỹaano quiyim qaropilot ñi qota'olec, ca' qoshiiuec ca'e aso ncopatoxonaxalate. 23Ca na' ime, ca' so Moisés chaqai so Aarón inoxondougui ñi 'imec na'daañi quiyim qanauane'e' ñi qota'a. Ca co'na' nenoxondec, ca' ỹaantem da no'uen llicyaxac so Israel llaalqaipi. Ca co'na'le, ca ñi qara'gaxala' chalego da lauaq na' nachaxana sá'ogue so qomyipi, 'neetasa': 24nenoxonec so norec chicqo'tot ñi qara'gaxala', ca' ỹavigaxat sá'ogue só'maq isecỹac só'maq qaỹahotaque qaỹavigaxat, ca' qoỹaanot, chaqai aso lo'ỹo hueetalec aso ncopatoxonaxalate.
Ca co'na' qaiuanchigui dajo, ca sá'ogue so Israel llaalqaipi ỹaatqajam ỹaualqagui queda netoonaxac. Ca ỹa'chi'iñi naua le'cootal, ỹaatqajam ỹoviraqta'guita naua lataapi' na 'laua.
