Da nelaataxanaxac qaiyi co'teeta da nachaalataxac ca qom
1Ca' ñi qara'gaxala' ỹalamaxachichigui so Moisés, ca 'naaco':
2—'Ñirapego' na Israel llaalqaipi dá'maq ỹa'qaatec 'neetasa':
Ỹim na'gaxala', ỹim qota'olec caqamiri, sco'teeta, vichiguiño' qamiri ỹaatqajam no'uen quiyim nco'taxachita.
3Quiñi 'óna se napacqajan queca leta'a chaqai caca late'e. Se napaguiỹalgoto qai'neeta naua na'xata' ñco'mataxaqui'. Ma' ỹim ná'maq ỹim na'gaxala', ỹim qota'olec caqamiri.
4Mesqai quiipegue' shiilahi ca nadenqatec nqolac no'm 'ue ca reuogoxohi, chaqai sqo 'viichii ca rqolaguii rashiilliguii chigoxochiỹaugui na lecat lahi. Ma' ỹim ná'maq ỹim na'gaxala', ỹim qota'olec caqamiri.
(19.5-8 Qaicopata'a na nachitaxanataxanaxat quiyim qaropilot ñi qota'olec.)
9Ca ma' ỹovire'oga ca laloqo' quiyim naqachii la ca qadañicshiguii, ca' mesqai ỹaatqajam nomachitam, chaqai mesqai ne'palahi aná'maq la no'ueenañi. 10Chaqai sqai ỹaatqajam nomachite' ma' naqachi' ca qadanaxanqachi' 'uva loma'. Ca ná'maq najñi, ca' le'neetari' nqai'ñi', qaiyi ne'pala ma'le na 'xoraic chaqai na ỹoqa'a ca chicqa'gue. Ỹim ná'maq ỹim na'gaxala', ỹim qota'olec caqamiri.
11Sqo cuachii. Se na'majñii chaqai se nayiñitecta'.
12'Neeto' 'viichi' ca 'ñirac quiichigui nqai'ñi' da ỹeenaxat, qam sqai pacqajñirigui. Ma' 'ec hualaxaiñirari' da ỹeenaxat. Ỹim qota'olec caqami', ỹim ná'maq ỹim na'gaxala'.
13'Neeto' sqa 'maxachira'gue ca riỹa'e', chaqai sqai huootaxañira'gue ca louenec.
Chaqai sqai viraqchira'guit ca liỹa nete'e quiyim shivichiñi' aca lauegue cá'maq ro'ueenataxantacot aqami'.
14'Neeto' na'aa ca 'ñirac queca ra'ñaagui na lqahic.
'Neeto' 'viichi' quiyim repoxolaxan ca qai'laq. Chaxañi' quiyim se napaquiralec aỹim, ma' ỹim qota'olec. Ỹim ná'maq ỹim na'gaxala'.
15Chaqai 'neeto' sqai ỹa'maqachiguiñi ca leloxoỹaxac nqai'ñi' quiyim 'ue ca vite ca nouaxanaxaset. Ta'ta'a quiyim sqai vichirelec ca 'xoraic, chaqai sqai ỹaatqajam nañaañichiguit cá'maq 'ue nqaiyi. Ta'ta'a quiyim ỹaatqajam qoshi'relec yí'maq ỹaatqajam no'uen llicyaxac yí'maq ỹa'maqachiguiñi quiyim 'ue ca 'viichi' ca nouaxanaxaset.
16'Neeto' do'isac ca se no'uen na'qaatec quena qauochi'.
'Neeto' lliquirau'a quiyim qaỹalauat ca riỹa'e'. Ỹim ná'maq ỹim na'gaxala'.
17'Neeto' hueetagui nqai'ñi' añi re'taxanata'e' ca qavilli' queca rqaỹa'e'.
Ta'ta'a quiyim 'ue canchaqaica, ca' taqaita ca rqaỹa'e'. 'Neeto' lliquirau'a ca lasauaxaset.
18'Neeto' vi'saque ca rovichi', chaqai sqo quirapeguem cá'maq chi qauochi'. Rauochitegue ca riỹa'e', ma' chaqai 'nejem qami'. Ỹim ná'maq ỹim na'gaxala'.
(19.19-30 Naqataxac quiyim nco'taxateta ca qom, chaqai quena' qanqouagaxainot ñi qota'olec, na'maqataxac ca qom, da nouaxanaxaset cá'maq se na'xaỹaxan, chaqai nauá'maq no'viiñi ỹachaxanta'pe ñi qota'olec.)
31Chaqai sqai quiipegue' quiyim nachii na se re'xogui nqui'illipi chaqai ná'maq nachinchigui quiyim 'ue ca ỹa'xat. 'Neeto' 'ec napio'xote' qamiri quiyim nachii. Ỹim ná'maq ỹim na'gaxala', ỹim qota'olec caqamiri.
32Nachaachiriñi, chaxañi' quiyim 'ue nqai 'negue nqai'ñi' ca qo'xoic. Chaqai chaxañi' quiyim se napaquiralec aỹim, ma' ỹim qota'olec caqami'. Ỹim ná'maq ỹim na'gaxala'.
33'Neeto' viitaque ca le'xoric ca ỹoqa'a ca chicqa'gue ỹalequetauguilo qamiri. 34'Xoriñii, 'ñiita'gue cá'maq ỹaatqajam qauori le'ec, ma' qamiri qai'neeta ỹoqa'a ca chicqoỹa'gue na' ñiita'gue da Egipto. Ỹim ná'maq ỹim na'gaxala', ỹim qota'olec caqamiri.
35'Neeto' noquiigaxachiỹata' ca ladogaxa ca naloqojnaxanaxat, loqo'm ca lesallaxa, loqo'm ca lecaachigui. 36Ta'ta'a quiyim viñii aca 'maxarai nesallaqataxanaxaqui, naloochiguiñi ca lesallaqatec, chaqai naloochiguiñi ca ladogaxa ca laloqojnec. Ỹim ná'maq ra'gaxalari qota'olec. Ỹim ñaqata'alo qamiri na'le quiyi Egipto.
37Ca' vichiguiño' ỹaatqajam 'viichi' naua ilaataxanaxaco chaqai ỹaqataxaco; pacqajñichiguilo. Ỹim ná'maq ỹim na'gaxala'.
(20.1—27.34 Naqataxac quiyim nco'taxateta ca qom, chaqai quena' qanqouagaxainot ñi qota'olec, na'maqataxac ca qom, da nouaxanaxaset cá'maq se na'xaỹaxan, chaqai nauá'maq no'viiñi ỹachaxanta'pe ñi qota'olec.)
