Job 13

Ná'ogue ná'maq 'xachitac ỹaatqajam seuanchigui quenaua ñqote',

chaqai shi'gue ỹaatqajam sa'qaachigui.

₂Ná'ogue ná'maq ra'yiiñigui, ỹim qai'neeta sa'den;

ca' qamiri sqai paguiỹauec caỹim.

₃Qam ỹim sahotaque setaxaỹa'pegue' ñi qota'olec,

sahotaque setaxaỹa'guit ñí'maq sqaica ca lqalanec. Mesqai qamiri.

₄Qamiri pohilec dá'maq lliqueta queda ra'maachiguii;

qamiri natarenataxana', qam qaica ca machiuec.

₅¡Quetaxan cocho'qui' re'maxaiñi,

ca' ỹaatqajam qamiri 'deenaxanqachaqaqa quet qamiri!

₁₈Ca' nagui, ca' saanec da ỹa'qaatec,

ma' ỹaatqajam sa'den quiyim lliqueta da'maxare.

₁₉No'm 'ue ca ỹa'xat ca ỹasauaxaset,

ca' ỹim yi'maxañi, ca' yileu ma'le.

₂₀Qami' qota'olec, vite cauá'maq doosolqai' sashiilaxantapigui,

ca' se ñañoxotapeguem qami':

₂₁Totaxan queeta quiyim youaxañi'sac,

chaqai mesqai 'xoic nqai'ñi' ca iqolonaxa.

₂₂Ỹaxañiriua', ca' ỹim sasaat ma'le;

loqo'm ỹim 'au setaqa ma'le,

ca' vite ca lopilaxaset ca ỹa'qaatec.

₂₃Ñaqai 'qaataxañirim, ¿negue' cá'maq ỹasauaxaset?

¿Negue' cá'maq se no'uen so'ueetetac?

₂₄¿Chi'negue ma' nqañoxochisapeguem aỹim?

¿Chi'negue ma' 'ñiisa'gue quiyim 'ec ỹim npa'guenaxaua'e'?

₂₅Ỹim shintari' aca qo'paq laue ỹaỹoxonaxat na nonot,

¿chi'negue ma' vi'saque quiyim yapalaxachirac?

ca ¿chi'negue ma' yocañi'sac?

₂₆Ỹaatqajam qui'ỹaq na ỹasauaxaseteripi maqaiseguelec aỹim;

ma' vi'saque sa'xat so ỹasauaxaset na' ñaqaỹim ne'necoqui'.

₂₇Vite lequeete' naua ichil,

ra'iichiri'ñiguilo naua ỹaqauaxaqui',

chaqai 'ajñite' naua ipiaate' lliquiñi.

₂₈Chi nemeeta'ñiguit na ỹahillipi, 'ec ỹim ca nooỹac leteraxaic,

shinta ca nooỹac ichiqueta na pit.