Job 11

Qami' Job, quená'ogue na ra'qaataxai'ipi ỹa'maqachiguiñi qaỹa'ue ca lopilaxaset,

ma' mesqaida quiyim 'xoic ca ra'qaachiqui', ca' ỹaatqajam lliqueta.

₃Ma' ¿'ñiisapego' quiyim 'xoic ca ra'qaataxai'ipi, ca' qare'maqata,

chaqai quiyim qaica ca ỹopilaxachiguit na re'naxanaxaqui'ipi?

₄Qami' 'ñirac quiyim na rapaxaguinataxanaxaqui' ỹaatqajam ỹa'maqachiguiñi,

chaqai chaqaqami' 'ñirac quiyim qami' 'maxaraic.

₅¡Saxanchi' ỹopilaxachiguit da ra'qaachiqui' ñi qota'olec!

₆Ca ñi'maxare rapaxaguiñitegue queta'le na la'deenqaipi se re'xogui,

ma' ỹaatqajam chalego lqalaigue'.

Ca ma'le, ca' 'yiiñi' quiyim ñi qota'olec

saqa' ỹaatqajam rouaxañi'.

₇¿'Ñiisapego' vichirau'a na se re'xogui no'ueenataxaquipi ñi qota'olec,

ca' shichi' vichirau'a cá'maq se re'xogui leloxoỹaxac ñi'maxare?

₈Ca ¿nega'ỹo' cá'maq 'ñi'sa'gue?

Ma' naua'maxare paguec lishicshi'mque quena piguim.

¿Negue' quet cá'maq 'yiiñi'? Ma' naua'maxare paguec lishigui'ñigui queca loma' na lqui'i na leuaxaiquipi.

₉Paguec lecaigue' quena 'laua,

chaqai paguec leca'guelo cana huaaxai.

₁₀Ca no'm nanac ñi qota'olec, ca' 'ue ca icona'a, ca roỹaxane'oga quiyim imit,

¿negue' quet cá'maq ishit quepaxat ñi'maxare?

₁₁Ñi'maxare ỹa'den ca 'maatqaic,

ñi'maxare idaanau'a ca hualoxonqaishic, ¿loqo'm 'ñiisapega quiyim se retan?

₁₂Cá'maq na'xa'a quiyim na 'ashin neuec ỹaxanñi cá'maq 'neetari',

ca' quecajo na'xa'a, ca no'uen ná'maq qaica ca ỹa'den.

₁₃Ca' qami' no'ueenaxachi' da qayicyaxaqui',

ca 'ỹaañitot da rashiilaxanaxaqui' ñi qota'olec.

₁₄Ca no'm 'xoic ca rasauaxashichi', ca' 'xañiriñi,

chaqai sqai 'xañitegue ca se no'uen queca ra'aachi'.

₁₅Qaiyi ma' na'irashiguim, qam co'teeta da rashicyaxaqui',

re'maqaisapeuc, qaica ca ro'chi'raque.

₁₆Ca' coua'ire'e ma'le da re'xoriqui';

ỹaatqajam 'ec ca huaxaỹaq quiyim 'miñi.