Job 14

₁Ca ỹale chicqaugui ana 'aalo,

ca'maxare se ladoc da nachaalataxac, chaqai 'xoic na taalec le'xoric.

₂'Ec aca lenoỹaxai quiyim huachigui, qam ime, ca' ỹaso;

quejlecna, ca chaqa'ma' palac 'ec ca la'al.

₃Ca' ¿peeta'a da ra'ajnaxanaxaqui' ỹalamqachigui nqai'ñi' najo ỹale,

ca' chaqaina ná'maq vi'saque nimichire'e'?

₄Qaica quet cá'maq ishit ñigui co'teeta nqai'en ca napio'o.

₅Ma' qami' ná'maq 'viichi' ca lqodoc ca qom,

ca' taachi'ñi nqai'ñi' ca nachaalataxac,

ca' quiyim vite ca raloqojonqui', ca' qaica napacalec,

₆totaxan ra'iita, qaiyi ỹa'maqachiguiñi;

¡'xañirac quiyim queetalec da nachaalataxac 'ec ca chaqai 'ueenataxanaxai!

₇Quena' qaỹouaxanlec aca qo'paq,

qam qaiyiita 'ue da quitaxac quiyim liỹa 'ue ca llaxataxa,

chaqai se ỹauana quiyim qaica quet ca llaxataxa.

₈'Eno'm mashic ỹasoote' naua lpa'yii,

chaqai aca loỹo mashic rishiita quena 'laua,

₉qam ma' nauata'guit na lo'oomaxa na huaxaỹaq, ca' liỹa no'ualauec;

ca' 'ue na lasoteipi 'ec aca chita'gue ñaxat 'ualata.

₁₀Qam na qom qaica quet cá'maq lata' quiyim ileu;

ca ma' ileu, ¿negue' cá'maq taigue ma'le?

₁₁Ca' na huaxaỹaq caso huaaxai ishit quiguiñi,

chaqai na lachiuguellipi ishit quiyim 'im;

₁₂qam quiyim ñaqa 'ue na piguim,

qaica ma' 'ue quet ca qom liỹa quet quiyim ne'laxashiguim caca napal lahi',

se nelouec queca lelaxac.

₁₃Saxanchi' yayoxochiriñi queca loma' na lqui'i na leuaxaiquipi,

toco' ma' ime'uegue ca qavilli',

chaqai vite ca raloqojonqui' quiyim o'lliinchira'a ỹim.

₁₄Ca no'm ileu ca qom, ¿peeta'a liỹo' nca'leuec?

Ca' ỹim sauaanaxantac queta'le quenaua'que naua na'xata',

vire'ta queta' novi' ca lachiguimqa' naua i'xoyaxaco.

₁₅Ca queta' ỹaxañiraque aỹim, ca' sasaachiguit qami',

ca' ra'iichiriuot queta'le queda rqo'iichi'i', ma' ỹim ro'ueenachiqui'.

₁₆No'm nagui ỹaatqajam 'ajñite' naua ỹaqauaxaqui',

ma'le, ca' tot ra'irigui na ỹasauaxaset;

₁₇ca' ỹaatqajam le'en nqai'ñi' na ỹo'maxaquipi

chaqai quiỹo'irec naua'que naua ỹasauaxasete'.

₁₈Ca vire'ta ana qa' ladocai 'guiñi,

chaqai na qa' leta'allipi ỹadalaxat na loma'.

₁₉Ca 'nejem na huaxaỹaq ichic na qa',

chaqai na ỹaxat i'xat na lamoxoỹaxa na 'laua,

ca' chaqaida 'ñitetegue quiyim palac nqai'ñi' ca naquitaxac ca qom.

₂₀Ca qadoxonqui', ca' ca'e, tot rapila ca na'laua,

ca' eec, qam ỹoqa'a da lashicyaxac.

₂₁Ca no'm na llaalqaipi ỹovira'a quiyim qaimaqachin, qam ca'maxare se ỹa'den;

chaqai no'm ỹovirau'a ca le'xoric lodegaxat, qam ca'maxare se retan.

₂₂Qainaata nauata'guit da lqui'ic ná'maq chi loshicmaxa

chaqai dá'maq chi le'xoric.