Jeremías 7

₁Ñi qara'gaxala' qota'olec ỹalamaxachichigui so Jeremías, ca' 'naapega:

₂—Vi'sa'guit ñi ñigo quiñi lo'ueenaxanaxaqui ñi qara'gaxala', ca 'deenaxanaxañitegue da ỹa'qaatec: ná'ogue ná'maq neetalec na Judá quená'maq taatapougui na lasom nqouagaxainot ñi'maxare, na'xaỹaxañiỹa dajo la'qaatec ₃ñi qara'gaxala' qaica lqalanec ñí'maq qota'olec queso Israel: No'ueenaxachii da nachaalataxaguii chaqai dá'maq ro'ueenataxanaxaguii, ca' ỹim queeta nqaishin quiyim rca'lliitauec quenajo 'laua. ₄Totaxan viilec ná'maq rayiñitac quena' 'naac: ¡Najo ná'maq na'ñi na lo'ueenaxanaxaqui ñi qara'gaxala', najo na'ñi na lo'ueenaxanaxaqui ñi qara'gaxala'!

₅No'm no'ueenaxachii da nachaalataxaguii chaqai da ro'ueenataxanaxaguii chaqai quiyim na'maxachii'jta'; ₆no'm sqai hualaxaiñiỹari' chiitegueñi na ỹoqa'a na chicqa'gue, na na'pelyipi chaqai ana pa'ỹellipi, chaqai no'm sqai lauachii na qom qaica ca lasauaxaset quenajo, chaqai no'm sqai 'yiỹoto naua re'cootallii ná'maq ỹoqa'a qota'olqaipi, ma' chaqaina ná'maq 'em nqa'viiñiteguelta', ₇ca' ỹim queeta nqaishin quiyim rca'lliitauec quenajo, quena 'laua saanem na'le so 'auaxaic qataa'illipi.

₈Qamiri viiteguelec na na'qaatqaipi na'maachic qaica ca 'negue caqamiri. ₉Ocachii, lauataxañii, niyiquiñii, se ipaguigui quena' 'ue da 'xachii, 'ỹaañiỹot na richiinaxanaxachii ñi nashiilec Baal, chaqai 'yiỹoto naua re'cootallii na 'naac qota'olqaipi sqa 'iỹapegueu'a. ₁₀Quena' ime, ca' naguipegue' na no'ueenaxanaxaqui qaỹauaaque qouagaxainaxaqui caỹim, naguipegue' aỹim. 'Neetapigui qavillii quiyim qaica canchaqaica; 'neetapigui qavillii quiyim quiitalec dá'maq 'viichitac quedá'maq tot yalo'guit. ₁₁¿Loqo'm 'neetapigui qavillii quiyim najo no'ueenaxanaxaqui qaỹauaaque qouagaxainaxaqui caỹim 'ec nqai'ñii lauaquiaxaqui na cuataxairipi? Ỹim seuana dá'ogue dajo. Ỹim na'gaxala', se'taxajñi da ỹa'qaatec. ₁₂Quiipegue' yí'maq senta'ñi na'le quiyi Silo, yí'maq 'auaxaic ica'acsec quiyim sena'ñi, ca 'ajñii dá'maq shine'tegue yi'maxare sauaxat dá'maq se no'uen ỹo'ueetetac yi ỹalamaxaret Israel. ₁₃Ma' mashic sopiltalec shintapega quedá'maq ỹo'ueetetac, qam qamiri se na'xaỹaxañiua' chaqai vire'ta sqai saachiguit aỹim. Ỹim na'gaxala', se'taxajñi dajo. ₁₄Vichiguiño' dá'maq shi'ntegue na'le yi senta'ñi Silo, chaqaida dá'maq shine'tegue qai'neeta najo no'ueenaxanaxaqui lodegaxat qaỹauaaque qouagaxainaxaqui caỹim, ná'maq saanema qamiri chaqai so 'auaxaic qataa'illipi chaqai ná'maq pi'iitapega qamiri. ₁₅So'yiiỹauec qamiri ma'le 'nejem quesom na' so'daauec so rqaỹairipi so chigoxougui so Efraín.