Jeremías 4

₅'Xachii dajo quena Jerusalén chaqai quiyi Judá,

pi'chiigui aca npe'te quená'ogue na 'laua hueesalec,

taxahi, ỹaatqajam nelamaxariñi ma'le, 'ñiỹac:

¡Hua', lapohiỹata'

quenaua na'aate' leta'al 'ue na lquepaqataxanaxat!

₆Nanorishiguim aca netana ỹiqueta'gue nqai'ñii da Sión;

¡daañiỹaque ca nañoqotqari, se nomiiñitari'!

Ma' sachigoxota'gue ma'le da rapiguim

da chalego ne'xoric chaqai da nasouaxac.

₇Na sauaxaic leta'a mashic nenoxonec quiyi nañoqotqa',

ná'maq mashic nomategueñi na ỹoreta'oguit qomyipi mashic naqueta;

nenoxonec quiyi na'laua, ma' ỹahotaque nomajñi na qomyipi neetalec najo 'laua,

ỹahotaque co'telec na na'aateripi chaqai nopoxoỹaxajñi.

₈Vichiguiño' ñiiñi naua noho nachicoxoqui'

noỹiñii chaqai raualaxahi queda nqui'ic,

ma' dá'maq chalego lecaic lonogoxonaxac ñi qara'gaxala'

sqo ỹoxe'oga coqomi'.

₉Ñi qara'gaxala' i'taxajñi da la'qaatec, ca' 'naac:

Ma' ỹovita cajo na'xa'a,

ñi nashi chaqai na na'gaxalateripi i'loxol ma'le queda lqolonaxa,

na netaxaỹaxanqajanqaipi quena' qaretaxaỹa'pegue' aỹim no'chi

chaqai na itaxaỹaxaquiripi no'daxatetec ma'le.

₁₀Ca na'le, ca' shinac: Qami' qara'gaxala', 'xoraiqolqa,

¡negue' cá'maq 'neeto' ma' chi'riñi na qomyipi quena Jerusalén!

Chaxañi'sac na'le quiyim vite ca no'daxa,

qam dá'maq taatalec quiyim qaichaqot na lqosot.

₁₁Ca ma' ỹovita dajo,

ca' qohinac quena na'a' lodegaxat Jerusalén:

Na nonot pa'e chicqojlec na 'laua qaica qom

npe'taxanshiguim, taatagui yi ỹalamaxareteripi.

Mesqai ná'maq nonotoqui'

ná'maq co'taxategue quen ana trigo ala;

₁₂ná'maq nonot ñila' ma'le paguec lquesaxanaxa quena'maxare,

ma' nagui so'uet da sa'yiñi nouaxanaxaset na qomyipi quena Jerusalén.

₁₃'Ajñii, na pa'guenaxauaripi mashic 'ec naueguelec,

na lahoglenaipi nalauataxaqui 'ec ca nonot quesaxanaxaic,

na lalo shipiguiripi paguec liyic queca o'ic.

¡'Xoraiqolqa qomi', ỹaatqajam qara'lliichiguiñom!

₁₄Qami' Jerusalén, co'taxachi' añi re'taxanata'e' quena se no'uen,

qaiyi rca'llirec ma'le.

¿Chi' laquio' se ỹaqaletentac na rqahiqui' na ra'deenataxanaxaqui' se no'uen?

₁₅Chicqochi'ñi yi na'a' Dan chaqai naua quemaralgoto quiyi Efraín

se no'uen na na'xaỹaxac chicqa'ñi, qohinac:

₁₆Vii la'xaỹaxac na ỹoreta'oguit qomyipi chaqai yi Jerusalén

quiyim da qoỹoqo'tegue 'laua chicqa'gue na npa'guenaxaua,

ỹaualqata'guit, ỹahotaque nalauataxac,

naga'a na na'aateripi leta'allipi quena Judá.

₁₇Nahiquinchiguiñi ma'le yi Judá, 'ec na neloxoỹaq quena no'ueenaxa,

ma' npa'guene'e' ñi qara'gaxala' qota'olec.

Ỹim na'gaxala' se'taxajñi da ỹa'qaatec.

₁₈Da no'ueenataxaqui' chaqai da ro'ueenataxanaxaqui'

chaqaida chicqochigui dá'maq 'neeta nagui caqami';

dá'maq se no'uen 'viichi'sac, ỹo'uet dá'maq 'ec chim laỹaxac caqami',

ca ỹouaxañigui añi re'taxanata'e'.

₁₉¡Mashic ñoqogañi queda nqui'ic!

¡Añi i'taxanata 'ue da lquesaxanaxa rachitata!

¡Ỹaatqajam se yo'viijñi, se seshit yi'maqata!

Sa'xaỹaque da lelamaxa ana npe'te

chaqai da naualaxac quena' lauataq.

₂₀Tot neme na na'xaỹaxac queda ne'xoric;

ná'ogue na 'laua hueetalec na chalego ne'xoric.

Mashic chita'gue, ca qanomajñi naua ñco'matqate',

qaiuagaxatetac sogui nqohin na ñco'mataxaqui 'imec na'daañi.

₂₁¿Chi' laquio' quiyim ñaqai queeta sa'ajantac añi netana quena lauataq,

chaqai quiyim sa'xaỹaque ca lelamaxa aca npe'te?

₂₂Na ỹalamaxaret ỹaatqajam se nouoogoñi, se no'uenegue aỹim

—'naac ñi qara'gaxala'—.

Ỹaatqajam ñaalqaipi se na'maxat, ma' ỹaatqajam se retanaxan.

Ỹaatqajam ỹa'den quiyim ỹo'uet na se no'uen,

qam se ỹa'den ỹo'uet ca ỹa'maqachiguiñi.

₂₃Seuana na 'laua quiyim qaica ca qom nelec chaqai qaica cá'maq ỹaatqajam no'ueenataxac;

ya'ishiguim quena piguim qaica ca 'ue ca lauaq.

₂₄Sa'ajan ana qa' ladocai, ca ná'ogue i'loxoltari';

ná'ogue ana quemaralec choolaxan.

₂₅Na' squenoxon, ca' tot qaica ca seuana qom,

chaqai ná'ogue ana qo'o nañit.

₂₆Squenoxon, ca' seuana na nanaxanqa' quena 'ue ana lenoỹaxai 'neetari' ca se ỹauanapega qoỹanlec,

chaqai naua'que naua na'aate' leta'al mashic qanopoxoỹaxajñi.

Da chalego lauel ñi qara'gaxala' chicqaugui dá'ogue dajo.

₂₇Ñi qara'gaxala' 'naac:

Ná'ogue na 'laua qanopoxoỹaxajñi,

qam mesqai ná'ogue ñomachichiguiñi.

₂₈Na 'laua no'xalec queda nachicoxo

chaqai na piguim 'ue da nasouaxac.

Ỹim setaqa, chaqai se netogochigui iuel;

ta'ta'a quiyim sepacqajanchigui dá'maq shinac.

₂₉Ca' queda laualaxac na neetashiguim qomyipi chaqai na no'xoshic lo'ollipi

ná'ogue na qomyipi 'eet ne'guentagui;

nañoxotougui na leesat

loqo'm quishiguim cana qa'.

Naua'que naua na'aate' leta'al qoyica'ahi;

ca' tot qaica ca na'ñi na'maxare.