Jueces 4

₁Ca co'na' ime ileu so nashi Aod, ca' so Israel llaalqaipi lotqai ỹo'uet na se ỹa'maxañi quiñi qara'gaxala'. ₂Ca' vichiguiño' ñi qara'gaxala' ỹaañiguit so Israel llaalqaipi da lquesaxanaxa so Jabín, lashi na cananeoipi, reloqota'a yi na'a' Hazor. Chaqai so lashi so nalliripi, leenaxat Sísara, na'ñi yi Haroset-goim. ₃Ca' so nashi Jabín novecientos aso lahoglena fierro nalauataxaqui. Ca' so'maxare ỹovi' veinte ñaxari quiyim qaica ca 'nejem da lqa'viic queso Israel llaalqaipi, chi ỹovireto'o' quiyim so Israel llaalqaipi liỹa ne'xoresene'tot ñi qara'gaxala' quiyim qaỹotauan.

₄Ca' quesauajo na'xata' so Israel llaalqaipi qareloqota'a caso 'aalo qota'olec letaxaỹaxaqui, leenaxat Débora. Aso'maxare loua so leenaxat Lapidot. ₅Aso Débora chaqai 'neetari'o' quen quiyim nqa'xantañi, neeto'ot ca la'al aca lanecse chaavic (ca qaỹamata'gue leenaxat chaavic lanecse aso Débora). Sojo chaavic na'ñi yi 'xoic ana quemaralec qa' ladocai quiyi Efraín quena lavinñi' yaua Ramá chaqai yi Betel. Ca' na Israel llaalqaipi quepegue'o' quen aso 'aalo quiyim ỹa'ue ca la'maqa' canchaqaica se ỹa'maxañi.

₆Ca 'uo' so na'xa'a, ca' aso Débora roỹaxane'ogo' so ỹale, leenaxat Barac, llaalec so Abinoam, neeta'ño' yi Cedes, yi'maxare la'a' na llaalqaipi so Neftalí. 'Naaco':

—Ñi qara'gaxala' qota'olec quena Israel relachi', 'naac: Mo'e', quirepegue' ada qa' ladocai Tabor. Ca' quiyi, ca lapooñireta' ca diez mil qomyipi nallichi'ipi quena llaalqaipi so Neftalí chaqai so Zabulón. ₇Ca' ỹim so'uet quiyim ñi Sísara, lashi na nalliripi so Jabín, quepegue' yi ñaachi Cisón, qaiyi nalauate'e' qami', neetañigui na lahoglenaipi chaqai na nalliripi. Ca' ỹim saanec ma'le quiyim qadoxonqui'.

₈Qam so Barac 'naaco':

—Ỹim shic, no'm qami' quitegue aỹim. Qam no'm sqo qui', ca' ỹim sqa shic.

₉—Ỹim shigueco' qami' ma'le —'naaco' aso Débora—. Qam da nquesaxanaxa quedajo lauataxac sqai chicqochigui qami', ma' ñi qara'gaxala' ỹo'uet quiyim qadoxonqui' ñi Sísara chicqochigui aca 'aalo.

Co'na'le, ca' aso Débora quegue so Barac, taategue da Cedes. ₁₀Ca' quiyi, ca' so Barac roỹaxana so llaalqaipi so Zabulón chaqai so Neftalí, ca lapoonta' quiyim qaỹa'guelec queso diez mil nalliripi. Ca so Barac liỹaatac aso Débora.

₁₂Ca co'na' so Sísara 'ue da la'xaỹaxac quiyim so Barac taashi'megue aso quemaralec qa' ladocai Tabor, ₁₃ca' so Sísara lapoonta' so novecientos lahoglenaipi fierro chaqai sá'ogue so nalliripi. Ca' liỹaatac, eec, chicqochi'ñi yi Haroset-goim, ỹovira'a yi ñaachi Cisón. ₁₄Co'na'le, ca' aso Débora 'naaco' queso Barac:

—¡Ne'laxachirishiguim, ma' mashic ỹovita yi laloqo' quiyim ñi qara'gaxala' ỹaanec ñi Sísara quiyim qadoxonqui'! Ca' ¡ñi qara'gaxala' nagui chaqa'ma' 'auetauec quena nallichi'ipi!

Ca' so Barac renotec caso qa' ladocai Tabor, liỹaatac so diez mil nalliripi. ₁₅Ca' ñi qara'gaxala' ỹo'uet quiyim 'xoic da lqolonaxa so neetañigui na nahoglenaipi, chaqai sá'ogue so nalliripi so Sísara co'na' sham ỹovichiguit so lecat so Barac. Chaqai vire'to' so Sísara no'chi, ca' renotauec caso lahoglena, ca' 'eet, co'ueetañi. ₁₆Ca' so Barac queetalec ỹocanta so Sísara nalliripi chaqai so nahoglenaipi, chi ỹovireta'a nqai'en yi Haroset-goim. Ca' quesojo na'xa'a ỹaatqajam qaica ca no'ueenashiguim ca'laaxaic queso nalliripi so Sísara, sá'ogue nimiichiguiñi.