Ñi qota'olec roỹaxana so Gedeón
1Qam so Israel llaalqaipi lotqai ỹo'ueetetac da se no'uen quiñi qara'gaxala'. Ca' ñi qara'gaxala' ỹaañiguit quiyim qoỹoiquentac queso Madián llaalqaipi quesaua siete ñaxari. 2Ca', ma' so Madián llaalqaipi noquiigaxatetauec da lqa'viic queso Israel llaalqaipi, vichiguiño' so qomyipi ỹo'ueete' naua nqañoqotaxaqui' ỹanauguilo naua quemaralgoto qa' ladocai, ma' paguec da lqolonaxa queso Madián llaalqaipi, qaiyi se qaỹovita. 3Ma' co'quena' na Israel llaalqaipi 'ue na lanecsec, na Madián llaalqaipi, na Amalec llaalqaipi, chaqai na qomyipi chicqa'gue da lqodoigue, nacpegue' quiyim nalauate'e'. 4Ca na'maxare anac quiyim naalgoto naua la'aate' na Israel llaalqaipi. Ca' iuagaxatac ná'ogue na la na nanecsec quiyi 'laua, ỹovira'a nqai'en yi Gaza. Ca' qaica ca no'ueenaqtañi loq na Israel llaalqaipi, vire'ta ana qagreta, chaqai na ñii'lola, chaqai na 'ashinyipi rouootaxana'gue. 5Ma' na'maxare quecá'maq ta'ñi imeetegueri', chaqai na na'aateteripi qo'oc ná'ogue na huelec na 'laua. Ma' 'xoic ana ne'xateta lalo nauaanaxanaxa late'e, ỹaatqajam nomateta ná'ogue, 'ec ana piñai. 6Ca' sauaxat na Madián llaalqaipi, ca' 'xoic da le'xoric so Israel llaalqaipi, vire'to' na' ne'xoresene'tot ñi qara'gaxala' quiyim qaỹotauan.
7Ca co'na' so Israel llaalqaipi ỹashiila ñi qara'gaxala' quiyim ro'ootaxanlec queso Madián llaalqaipi. 8Ca' ñi qara'gaxala' nelata so letaxaỹaxanqajnec, 'naaco':
—Da la'qaatec ñi qara'gaxala' qota'olec quena Israel llaalqaipi 'neetasa': Ỹim ñaqaterec qamiri na'le quiyi Egipto na' qamiri na'aqa. 9Ca' sqainaata na Egipto laseripi ñca'laxategue'sopa qamiri, qam qai'neeta ná'ogue ná'maq ỹahotaque na re'xoriguii. Ca na'maxare qai'neeta so'daauec, ca saanema qamiri na na'laua na'maxare. 10Ca' shinac na'le caqamiri, ỹim ná'maq ỹim ra'gaxalari qota'olec. Chaqai shinac quiyim se ro'chiỹa na lqolaquipi na amorreoipi, ná'maq na'laua ná'maq ñiitalec nagui, qam qamiri sqai viilec aỹim.
11Co'na'le, ca' novi'o' so lelaatec ñi qara'gaxala' piguim le'ec, ca' nqa'xanñi ne'tot aso qo'paq leenaxat encina, na'ñi yi Ofra. Yi'maxare lalamaxaret so Joás, so'maxare chicqaugui na lauo' so Abiezer. Ca' so Gedeón, llaalec so Joás, co'taxatetac na trigo, nañoxotetañi, hueete'e añi lo'o ana 'uva quena' qanelam na li'i, ca' qaỹo'uet na lataxa, ma' ỹahotaque se qaiuana quena Madián llaalqaipi.
12Ca' so lelaatec ñi qara'gaxala' nachaxan, ca 'naaco' queso'maxare:
—¡Ñi qara'gaxala' liỹaatac qami', qami' quesaxanaxaic ỹale chaqai 'ñaaxaic qavilli'!
13Ca' so Gedeón 'naaco' queso'maxare:
—Qouaquiric, qami' ỹa'gaxala', qam no'm ca qara'gaxala' liỹareta'pe qomi', ¿chi'negue ma' shinqatari' dajo? ¿Chi' táigue cá'ogue cá'maq se qaiuanapega ro'ueenataxanaxaqui' ỹa'xatetaiquen so 'auaxaic qareta'allipi quena' 'naac ñi qara'gaxala' naqata'alo qomi' quiyi Egipto? Peeta'a mashic qaralat ñi qara'gaxala', ca' ỹaandec qomi' quiyim ỹoiquenta'pe qomi' na Madián llaalqaipi.
14Ca' so qara'gaxala' ra'ỹo'ot, ca 'naaco' queso'maxare:
—Ỹaatqajam 'goxoñita da rquesaxanaxa'e', ca' qui', nca'laxachirec na Israel llaalqaipi queda lqa'viic na Madián llaalqaipi. Ỹim ná'maq sela' qami'.
15Qam so Gedeón lotqai 'naac:
—Qouaquiric, qami' ỹa'gaxala'. Qam ¿negue' quet cá'maq 'neeta quiyim ñca'laxatec na Israel? Ma' ná'maq sachicqaugui, na'maxare ỹaatqajam paguec 'xoraic quená'ogue na llaalqaipi so Manasés. Chaqai ỹim paguec qaica ca shinegue quena iuo' laseripi.
16Ca' ñi qara'gaxala' 'naaco' queso'maxare:
—Qami' shichi' 'viichi' dajo, ma' qami' iỹaatac ma'le. Ca' qadoxonqui' ma'le na Madián llaalqaipi 'ec ca 'oonoqui' qom nqai'ñi'.
17Co'na'le, ca 'naaco' so Gedeón:
—Ca no'm chaqaida da re'xorenataxanaxa'e' caỹim, ca 'maxaraic quiyim vite ca itanec quiyim ỹaatqajam qami' qara'gaxala' ná'maq taqaisa'pegue' aỹim. 18Qouaquiric, totaxan qui'o' quenajo, toco' ma' ñovirec, sedaanaque aca ỹachitaxanataxanqate sahotaque saañiraxarom.
Ca' so qara'gaxala' 'naaco':
—Hua', ỹim se sedaỹari' quenajo, ñauaanta'guit qami' ma' novichirec.
19Ca' so Gedeón eec, ca' ỹa'maxajñi so quetaq llaalec chaqai ỹaqaulachit so 'aríña, ca ỹo'uet so panyipi qaca lalequete cana pe'taxachigui. Ime, ca' so la'at illaañigui aso canasto, chaqai so li'i illaañigui aso 'ueena. Ca' sá'ogue ỹodouec quiyi na'ñi aso qo'paq leenaxat encina. 20Ca' so lelaatec ñi qota'olec 'naaco':
—Lli'ralec ada qa' na la'at chaqai na panyipi sqaca lalequete chaqai na li'i na'maxare cochirelec.
Ca co'na' so Gedeón ỹo'uet dá'ogue dá'maq qailarelec. 21Ca' so nelaatec piguim le'ec ỹa'deu'a quena lo'lo aso lashilete lo'qoota'a so la'at chaqai so pan qaca lalequete. Ca' so qa' chicqochigui so norec, ca' nasoochiguiñi nqai'en so la'at chaqai so pan. Co'na' ime, ca palac so nelaatec piguim le'ec. 22Ca' so Gedeón co'na' retan quiyim retaqata'pegue' so nelaatec piguim le'ec, ca 'naaco':
—¡'Xoraicolec aỹim, qami' ỹa'gaxala'! ¡Ỹaatqajam ñiuane'e' ya'i'tot so relaachiqui' piguim le'ec, qami' ỹa'gaxala'!
23Qam ñi qara'gaxala' 'naaco' queso'maxare:
—Totaxan ro'chi'i', ma' se rillivi'. 'A, coñichiguit da iuagaxa.
24Ca' so Gedeón no'xonshiguim aso ncopatoxonaxalate, ỹanalec yi'maxare quiyim imaqachin ñi qara'gaxala'. Ca' ỹamata'gue yi'maxare “Ñi qara'gaxala', ñi'maxare neuagaxa.” Ca' dajo ncopatoxonaxalate ñaqa 'ue nagui quiyi Ofra, yí'maq la'a' na lauo' laseripi so Abiezer.
25Ca' chaqaiso so pe ñi qara'gaxala' 'naaco' queso Gedeón:
—Coñira'a ñi 'oonoqui' ñii'lola, lalo ñi qataa'i'; nca'a'isau'o' ñi ỹovite' siete ñaxari. Ime, ca poxoỹaxachirigui añi lcopatoxonaxalate ñi qataa'i' quena' nqouagaxainot ñi nashiilec Baal, chaqai huaxañirelec ma'le ada qo'paq qaica ca ishit, ada sqoỹoqaque cada ncopatoxonaxalate quena' qanqouagaxainot ñi Baal. 26Ca ma' ime, ca no'xoñirishiguim aca ncopatoxonaxalate quiyim qanqouagaxainot na ra'gaxalachi' qota'olec ñi'ralec ana roto ada quemaralec ladocai. Ime, ca' coñira'a ma'le cá'maq tooro cá'maq shi'gue rca'acshiqui'. Ca' chaqaica cá'maq vigaxachi', ca 'ỹaañitot aỹim ca rachitaxanataxanaxachi', ca adá'maq qo'paq dá'maq sqaica ishit, ca' lonaxañita ana lasote só'maq huaxañirelec na'le.
27Co'na'le, ca' so Gedeón iconeu'alo saua diez lelaatqa, ca' ỹo'uet sá'ogue só'maq qailarelec quiñi qara'gaxala'. Qam qaidaata quiyim nepesenta, ma' no'cha'a so lauo' so leta'a chaqai so qomyipi na'ñi yi na'a'. 28Ca co'na' nete'etam queso nete'e, co'na' ne'laxatecshiguim so qomyipi, ca iuane'ta aso ncopatoxonaxalate queso nashiilec Baal ropoqochigui chaqai qaỹouaxanlec aso qo'paq 'xoic lichic huaqate'e' aso ncopatoxonaxalate, chaqai 'uo' so tooro shi'co' qoỹaano quiyim nachitaxanataxanaxat qaillaalco' aso dalaxai ncopatoxonaxalate. 29Ca' chi nenatetecta'o' so qomyipi, 'naaco' quen:
—¿Negue' cá'maq ỹo'ueeto' dajo?
Ca co'na' ime quiyim shi'gom qaimitetaque chaqai qarenataxantaque, ca qaỹa'deeno' quiyim so Gedeón só'maq ỹo'ueeto' dajo, llaalec so Joás. Ca' qoyicpegue' so Joás, ca' qohinapego':
30—Nelachirec ca qachaalqui', qaiyi salauataq. ¡Ma' ỹopoxoỹaxachigui ada ncopatoxonaxalate quiñi Baal chaqai aca qo'paq 'xoic lichic huaqate'e' yi'maxare!
31Ca' so Joás 'naaco' quesauá'maq reloqosaho:
—¿Qamiri viitaco' nco'uaxaguii vichilec so Baal? ¡'Maxaraic quiyim ileu ma' saqa' richiguiñi canchaqaica quecá'maq iuejlec so Baal! Ca' ñi Baal, no'm llic quiyim ỹoiquentac ná'ogue, ca' 'xañiỹac quiyim chaqaiñi ñí'maq ỹo'uet ca lovi', ma' ñi'maxare lalamaxarete asó'maq ncopatoxonaxalate qaỹosogui.
32Ca' chaqaiyi hua'ño' na'le, ca' qaỹamata'gue leenaxat nqohin Jerobaal so Gedeón. Ca' qohinaco': “Ñi Baal chi ỹa'ue ca lovi' ma'le queda'maxare,” ma' so Gedeón ỹamaxañi aso ncopatoxonaxalate queso Baal.
33Co'na'le, ca' sá'ogue so Madián llaalqaipi chaqai so Amalec llaalqaipi chaqai so qomyipi chicqa'gue da lqodoigue, lapoỹata' quiyim ỹapacta aso lachiugue Jordán. Ca' renojñi queso ca'megue quiyi Jezreel. 34Qam so ne'Espíritu ñi qara'gaxala' ỹa'ñaxat so Gedeón, ca so'maxare pi'chigui aso lpe'te qagreta loua' lasote, qaiyi lapoouo so lauo' laseripi so Abiezer. 35Chaqai qai'neeta roỹaxana so llaalqaipi so Manasés quiyim qai'neeta lapoouo. Chaqai qai'neeta roỹaxana so llaalqaipi so Aser, Zabulón chaqai so Neftalí quiyim lapoouo qai'neeta queso'maxare.
36Ca' so Gedeón 'naaco' quiñi qota'olec:
—No'm llic yoviñi' quiyim ñca'laxatec na Israel llaalqaipi, quedá'maq chaqai 'ñirac, 37ca' ỹim sella'ñi na hua'ñi quena' qano'ueenaxategue ana la na trigo ca qagreta loshicmaxa. Ca ma' nete'e ma' nete'eta, ca' ỹaatqajam pi'guiloxolta nqai'ñi' cana 'ỹa', qam ná'ogue na 'laua rashivita, qaiyi sa'den quiyim ỹaatqajam yoviñi' quiyim ñca'laxatec na Israel llaalqaipi, ma' chaqai 'ñirac.
38Ca dá'maq 'naac so Gedeón ỹaatqajam ipaquichigui. Ca co'na' ne'laxashiguim queso nete'eta, ca' nelam aso 'ỹa' queso qagreta loshicmaxa, ca' no'xataxateta so 'taxaqui caso 'ỹa'. 39Qam so Gedeón qaiyiita 'naaco':
—'Neeto' 'o'ita ỹim quiyim 'ue da ipagaxallic. Qam sahotaque quiyim so'uet ca 'oonoqui' liỹa i'guenec. Ca' nagui, ca' najo qagreta loshicmaxa rashivita nqai'ñi', qam quiyim ana 'ỹa' pi'guiloxolaxat ná'ogue na 'laua.
40Ca' queso pe ñi qota'olec ipaquichigui nqai'en da la'qaatec so Gedeón. Ca queso liỹa na'xa'a, ca' aso qagreta loshicmaxa rashivitam, qam ná'ogue na 'laua no'qajlec caso 'ỹa'.
