Jueces 2

₆Ca co'na' so Josué ỹahotaque la'xaỹaxac quiyim ca'e so llaalqaipi so Israel, quiñi 'óna queso'maxare quepegue' cá'maq chi na'laua qoỹaanem. ₇Ca co'na' ñaq nca'leetauec so Josué, ca' na llaalqaipi so Israel saqa' ỹaxanñi quiyim nqouagaxaintacot ñi qara'gaxala'; qai'neeta na' ñaqa 'ue so qo'xoiquipi só'maq iuanchiguio' na'le ná'ogue ná'maq chalego lecaic ỹo'uet ñi qara'gaxala' queso llaalqaipi so Israel. ₈Ca' so Josué ỹovite' yaua ciento diez ñaxari, ca' ileu. ₉Ca' qaishiñi'ñi yí'maq chi lalamaxaret la'a' Timnat-sera, pa'ỹa'gue da rapiguim caso quemaralec qa' ladocai leenaxat Gaas, huaugui yi 'xoic ana quemaralec qa' ladocai quiyi Efraín. ₁₀Ca' qai'neeta ileu so llaalqaipi so Israel só'maq naloxouaripi so Josué. Ca' chaqaida 'neeto' na'le quiyim so dalaxaic ne'qaañi qomyipi qaica ca ỹa'den ñi qara'gaxala' chaqai ná'maq lqouagaxa queso Israel llaalqaipi.

₁₁Qam co'na' so llaalqaipi so Israel ỹaatqajam se no'uen da ỹo'ueetetac iuanchigui ñi qara'gaxala'. Ma' queetalco' quiyim nqouagaxaintacot na ỹoreta'oguit lqui'illipi so Baal. ₁₂Ỹaxanñi ñi qara'gaxala' ñí'maq qota'olec, la'gaxala' so 'auaxaic leta'allipi, ñí'maq naqata'alo na'le quiyi Egipto. Ca' nañaañiguit quiyim nqouagaxainot na lqolaquipi na lauoraripi. Ca' chaqaida dá'maq chicqochigui quiyim ro'o ñi qara'gaxala'. ₁₃Ỹalat, ca'e ñi qara'gaxala', qaisoota so Baal qanqouagaxaintacot chaqai na ỹoreta'oguit lqui'illipi aso Astarté. ₁₄Vichiguiño' ñi qara'gaxala' ỹaatqajam ro'ỹa so Israel llaalqaipi, ca' ỹo'uet quiyim so cuataxairipi rocacha sá'ogue so louenqaipi, chaqai quiyim noxonqaipi queso lauoraripi npa'guenaxauaripi, chaqai quiyim qaica ca qaỹaho'te. ₁₅Ca co'quena' eec quiyim nalauat, ca' ñi qara'gaxala' pa'a'guit, ca' se no'uen nqai'en da llicyaxac, ma' chaqaiñi ñí'maq 'naaco' na'le.

Ca' ñi qara'gaxala' 'eno'm ỹo'uet da leuogoxo so'maxare, ₁₆qam qaiyiita ỹo'uet so nashillipi quiyim ishit imit ca nasauaxaset, ca na'maxare ishit reloqoguit ná'maq nouoretac so Israel llaalqaipi. ₁₇Qam so Israel llaalqaipi se na'xaỹaxana so na'gaxalateripi. Ta'ta'a quiyim se na'xaỹaxana ñi qara'gaxala' chaqai nqouagaxainot na nqolaquipi. So 'auaxaic leta'allipi ỹaatqajam na'xaỹaxane'ta da laqataxac ñi qara'gaxala', qam so'maxare sqai que'uegue da llicyaxac so 'auaxaic leta'allipi. ₁₈Ca co'quena' ñi qara'gaxala' ỹanashiguim ca nashi, ca' ỹaatqajam ỹotauan. Ca co'quena' ñaq nca'leetauec ca nashi, ca' ỹotauan so Israel llaalqaipi quena npa'guenaxauaripi, ma' i'xoreno' quen quena' 'xaỹa da nqui'ic queso'maxare. ₁₉Qam co'quena' ileu cajo na'gaxala', ca so'maxare lotqai ipaquichigui se no'uen da llicyaxac. Ca chi ỹovireto'o' quen quiyim paguec la'aaxa dá'maq 'neetari' queso 'auaxaic leta'allipi. Ca' lotqai quelec quiyim nqouagaxainot na ỹoreta'oguit nqolaquipi, chaqai ỹaatqajam sqai ỹaxanñi na ỹo'ueetetac se no'uen llicyaxac. ₂₀Vichiguiño' ñi qara'gaxala' ỹaatqajam ro'ỹa so Israel llaalqaipi, ca 'naaco':

—Najo qomyipi se ipaguigui nqai'en dá'maq 'au ña'maqataxac queso 'auaxaic leta'allipi chaqai tot na'xaỹaxañiua'. ₂₁Vichiguiño' nagui tot so'daauec na qomyipi quená'maq se ỹo'daauec na'le so Josué na' ñaq nca'leetauec.

₂₂Ca' quedajo, ca ñi qara'gaxala' ỹahotaque i'guen na Israel llaalqaipi quiyim quegue ñi qara'gaxala', dá'maq 'neetari'o' na'le so 'auaxaic leta'allipi, loqo'm 'e'. ₂₃Vichiguiño' ñi qara'gaxala' sqai chaqa'ma' ỹo'daauec na qomyipi quená'maq sqai loxonec nqai'en na'le so Josué, ta'ta'a quiyim lauoraripi nqai'en so'maxare.