Isaías 65

₁₆Ñi qara'gaxala' qota'olec 'naac:

Canchaqaica 'ue ca rashiilaxanaque quiyim qano'ueenaxat ca llicyaxac quenajo 'laua,

ca' yashiila, ỹim qamaxaraic qota'olec;

chaqai canchaqaica quenajo 'laua ỹaanec ca la'qaatec quiyim nallitalta',

ca ỹaañiỹot ca la'qaatec, ỹim qamaxaraic qota'olec.

Sauá'maq 'auaxaiqa ne'xoyaxaco mashic qaicoua'ahi,

ma' pale', tot seuanalo.

₁₇Ñaqai 'ajñii, ỹim so'uet ma'le

ca piguim dalaxaic chaqai ca 'laua dalaxaic.

Ná'maq shi'gue qaicoua'e ma'le,

ca' qaica ca qom ỹo'leentetaque ma'le na'maxare.

₁₈Ỹaatqajam se neme ma'le da raỹaaguii chaqai ca netoonaxaguii

quecá'maq dalaxaic so'uet,

ma' ỹim so'uet ma'le quena Jerusalén ca chalego neuagaxa,

chaqai 'xoic ca netoonaxac ná'maq qomyipi la'a' na'maxare.

₁₉Ỹim qai'neeta 'ue da iuagaxa ma'le quena Jerusalén,

ñauata'guit da ñitoonaxac quena ỹalamaxareteripi.

Ma' quena'maxare tot qara'xaỹaque ma'le ca oỹenaxac

chaqai ca ỹaualqatac queca lachitachic.

₂₀Ca' quiyí ma'le, ca' qaica ca ñaqai noctoqui', ca' ileu,

chaqai ca qo'xoic quiyim saqa' ỹovita ca laloqo'.

Cá'maq ileu quiyim ỹovite' caua cien ñaxari, ca ñaq ne'necoqui', ca' ileu;

chaqai cá'maq se ỹovite' caua cien ñaxari, ca' ileu, ca qaretan quiyim ỹim sa'ue ca nouaxanaxaset.

₂₁Na qomyipi no'xonshiguim ca lauo' 'imec, ca' naugui ca'maxare,

chaqai ỹa'ue ca lanaxanqa' 'uva loma', ca' ỹa'ic ana la.

₂₂Ca' tot qaica dá'maq quiyim 'ue ca no'xonshiguim ca lauo', ca ỹoqa'a ca naugui,

loqo'm 'ue ca danaxan, ca' ỹoqa'a cá'maq ỹa'maq.

Na ỹalamaxareteripi ỹaatqajam ladoc ma'le aca lqauaxaqui, 'ec ma'le ana qo'paq;

na ica'acseripi que'eetapigui ma'le dá'maq chi lo'ueenataxanaxac.

₂₃Ca' 'ue ca ñigui da lo'ueenataxanaxac

chaqai sqaica ca llaalec ileu quiyim saqa' ỹovita ca laloqo',

ma' na'maxare llaalqaipi só'maq 'auaxaic qano'ueenaxat da llicyaxac quiñi qara'gaxala',

ca' chaqaida 'neeta ma'le quena llaalqaipi na'maxare.

₂₄Ma' saqa' roỹaxanot aỹim quiyim yashiila,

qa' shi'gue sasaachiguit ma'le;

chaqai saqa' ime ca la'qaatec,

qa' mashic ña'xaỹaxana.

₂₅So isecỹac toxonaxai chaqai so qagreta llaalec que'eeta'pe, nouanta'ta',

na sauaxaic leta'a ỹa'ic na 'uaqapi 'ec na ñii'lola,

chaqai na nanaic ỹa'ic na 'laua.

Chaqai caná'ogue ana ñaqa' ladocai Sión

qaica cá'maq que'maqachit ca liỹa.

Ñi qara'gaxala' ỹaatqajam i'taxajñi da la'qaatec.