1Najo lere hueetalec da la'qaataxanaxac chaqai da lo'ueenataxanaxac so llaalec so Hilcías, leenaxat Jeremías. So'maxare chigoxougui na netaxaỹaxanqajanqaipi quena' qaretaxaỹa'pegue' ñi qota'olec neeta'ñi yi na'a' Anatot quiyi na'laua so llaalqaipi so Benjamín. 2Ñi qara'gaxala' netaxaỹa'ña so Jeremías na' so Josías, llaalec so Amón, mashic sham ỹovi' trece ñaxari quiyim nashi quiyi Judá. 3Qai'neeta retaqa na' neetaho quiyim nashi quiyi Judá so Joacim, llaalec so Josías, chi ỹovireta'a na' nashi so Sedequías, qai'neeta liỹa llaalec so Josías. Ca na' ỹovite' diez ñaxari chaqai cinco shiriguiri quiyim nashi quiyi Judá, ca' queca viichigui na' noxonec so qomyipi na'ñi yi Jerusalén, ca' qai'xat na'aquipi.
Ñi qara'gaxala' roỹaxana so Jeremías
4Ñi qara'gaxala' ỹalamaxachichigui aỹim, ca' 'naapiguiỹa':
5Na' saqa' saanem qami' da nachaalataxaqui', ca ica'acsec qami';
na' saqa' ne'qa'iriñi, chaqa'ma' soỹootec aqami';
sahotaque qami' itaxaỹaxanqajnec quená'ogue na ỹoreta'oguit qomyipi.
6Ca' ỹim shinac:
¡Qami' ỹa'gaxala', 'ajñi' ñaqaỹim ne'necoqui',
chaqai se sa'den cá'maq itaxaỹaxac!
7Qam ñi qara'gaxala' 'naac caỹim:
Totaxan 'ñirac quiyim qami' ne'necoqui'.
Qami' qui', 'itegue cá'maq selachitegue,
chaqai 'xachi' cá'maq selachirelec quiyim 'ñirac.
8Qaica ca ro'chiraque,
ma' ỹim seuetau'e ma'le na rahi'i',
squepaqataxanteguelec qami'.
Ỹim ná'maq ỹim ra'gaxalachi', saanec da ỹa'qaatec.
9Ca' queca na'le, ca ñi qara'gaxala' ipootau'alo naua ỹapi' queda lqai'laxat, ca 'naac caỹim:
10Sellaugui na qadapi' naua ỹa'qaatqa.
Nagui, ca' saañiraxarom da nquesaxanaxa
napacalec na nashillipi chaqai na ỹoreta'oguit qomyipi,
qaiyi pogoxoñi' chaqai maqairiñi,
poxoỹaxachirigui chaqai huagaxachirac,
chaqai qai'neeta quiyim no'xoñirishiguim chaqai danaxañi'.
11Ca' ñi qara'gaxala' ỹalamaxachichigui aỹim, ca 'naac:
Jeremías, ¿negue' ná'maq 'ajñisac?
Ca' shinac:
Sedaanta'a añi lasote ana qo'paq qaỹamata'gue neloxoỹaq.
12Ajá'a, ỹa'maqachiguiñi —'naac ñi qara'gaxala'—.
Ca' chaqaida shintari' ỹaatqajam seloqota'a
quiyim ipaquichigui nqaishin da ỹa'qaatec.
13Ca' ñi qara'gaxala' lotqai liỹa ỹalamaxachichigui aỹim, yinat:
¿Negue' ñí'maq daañisa'a?
Ca' shinac:
Sedaanta'a añi 'ueena ni'ỹaamtac queda rapiguim,
saqatañi, sham qalacqo'tegue da 'guiñi.
14Ca na'le, ca' ñi qara'gaxala' qota'olec 'naac caỹim:
Da rapiguim chicqo'tegue ma'le ca ỹo'uet ca le'xoric
ná'ogue na qomyipi neetalec najo 'laua.
15Ỹim na'gaxala' se'taxajñi quiyim llic nqaishin dajo:
quiyim soỹaxana ma'le ná'ogue na ỹoreta'oguit qomyipi na'gue da rapiguim.
Ca' nanac ma'le na lashillipi,
ca illa'ñi na nqa'xanaxaquiripi
ñi lasom ñigo quena Jerusalén,
hueeto'ot nqaishin yí'maq lquepaqataxanaxat ỹapootau'a
chaqai quenaua'que naua na'aate' quiyi 'laua Judá.
16Dajo dá'maq nouaxanaxaset so'uet ma'le
sauaxat da lasauaxaset, ma' yalat ca'e aỹim
na' copata'a na lichiinaxanaxat chaqai ỹa'dooto naua le'cootal
na 'naac qota'olqaipi, chi lo'ueenatec yi'maxare.
17Ca' nagui, ca' qami' na'ñaxachi',
ca 'ñirapega ná'ogue ná'maq sa'xat ma'le caqami'.
Totaxan ro'chita, ma' no'me',
ca' ỹim i'loxol nqaishin qami' ma'le ma' vichita yi'maxare.
18Ca' ỹim nagui sa'yiñi qami'
'ec ca na'a' lodegaxat pootau'a
nodaachiguiñi fierro na qaỹa'yiñi,
'ec qaỹapou'a quena bronce,
qaiyi loqoichiguit yá'ogue yi qomyipi na'ñi yi 'laua Judá:
na nashillipi, na'gaxalateripi chaqai na netaxaỹaxanqajanqaipi chaqai yá'ogue yi qomyipi quiyi'maxare.
19Yi'maxare nco'ỹa'e' qami' ma'le, qam sqaica lovi',
ma' ỹim seuetau'e rahi'i' ma'le, squepaqataxanlec qami' ma'le.
Ỹim na'gaxala' qota'olec, saanec da ỹa'qaatec.
