Isaías 64

₁Saxanchi' cona'gue nqai'ñi' na piguim, ca' renochirec,

ca' quiyim novichiriñi, ca i'loxol nqai'ñi' ana qa' ladocaipi,

₂'nejem quena' na norec ỹavic nqai'en na 'uaqapi,

loqo'm quena' ni'ỹaamaxat na huaxaỹaq.

Ca queta'le na npa'guenaxaua'e'ipi ỹa'den queta'le da qadeenaxachi'

chaqai na ỹoreta'oguit qomyipi i'loxol queda lqolonaxa caqami'.

₃Qa'uequeto' sahoqotaque quiyim 'viichi' quet ca ỹo'uet ca qarqolonaxa,

ca i'loxol nqai'ñi' ana qa' ladocai, na' novichiriñi.

₄Se ỹauanapega quiyim 'ue quet ca qara'xaiguelec chaqai quiyim qaiuana quet

ca liỹa qota'olec

quiyim ỹo'uet quet dajo lqouagaxa

taỹaugui nqai'en ná'maq pi'ỹa'a ñi'maxare.

₅Qami' coñichiguit ca raỹaacotalec quiyim ỹo'ueetetac ca ỹa'maqachiguiñi

chaqai se ỹa'laxate quiyim ỹo'uet dá'maq vi'saque.

Qami' 'ohisari', ma' 'ue dá'maq qarasauaxaset;

chaqai mashic shi'gom so'maqajanqatac aqami'.

₆Qomá'ogue qomi' shinqatari' ca ỹale sauaqhuaic;

naua'que naua no'viiñi qaro'ueenataxanaxaco 'neesari' ca hualoq lahi napio'ota;

qomá'ogue sanataxañi 'ec qomi' aca qo'paq laue lasooxoi,

chaqai naua qaro'maxasete' se no'viiñi qaramaqate' 'ec na nonot.

₇Qaica quet cá'maq ỹaanot aqami' ca lashiilaxanaxac

chaqai se na'ñaxat quiyim i'guenot aqami';

vichiguiño' nañoxochitema qomi'

chaqai quira'ahi qomi' sauaxat dá'maq se no'uen so'ueetqatac.

₈Qam qami' ná'maq qami' qareta'a;

qomi' nauá'maq qomi' nishaaxa, ca' qami' ná'maq qami' no'xonaxanaq;

¡qomá'ogue qomi' ro'ueenataxahi'!

₉Qami' qara'gaxala', totaxan queeta da qavilli' coqomi',

chaqai totaxan se neme o'lliinchisapigui naua qaro'maxasete'.

¡'Anta, qomi' ralamaxarichichi'!

₁₀Na ralamaxarichi' na'aateripi ñigui co'tejlem, qaica ca qom,

na Jerusalén soochigom, qaỹopoxoỹaxateta.

₁₁Ñi qaro'ueenaxanaxaqui 'ue quen lauaq,

yí'maq hua'ñi quena' ro'ueenaxanta'pe saua qareta'al,

soochigui nqai'en so norec.

¡Ropoqota ná'ogue ná'maq paguec qarqo'ta!