Isaías 11

₁Ca' sojo loỹo chaqaiso so Isaí chicqochigui ma'le aca llaxataxai;

ca dalaxai ñaxashiguim chicqochi'ñalo saua lpa'yii.

₂Ca' so ne'espíritu ñi qara'gaxala' hueetalec ma'le so'maxare,

ca' qoỹaanem da na'deenaxanaxa, nco'ỹaxaric,

'xaỹaxanqachic chaqai da nquesaxanaxa,

chaqai na'deenec quiyim se qanapacalec ñi qara'gaxala'.

₃So'maxare sqai 'nari'sa' quiyim imit ca nasauaxaset,

chaqai se ỹa'ue ca nouaxanaxaset queca chi la'xaỹaxac.

₄Ỹaqamaxateta da nimiitaxac na qaica ca yí

chaqai qoshiilec na 'xoraiquipi quena 'laua quiyim ỹahotaque ca la'maxa.

Naua la'qaatqa 'ec ca qo'paq nouaxanaxanaxat quiyim qaỹouaxan ca se ra'maqataxan,

chaqai ỹahote'e na lacat quiyim ỹouaxan ca hualoxonaq.

₅Sqaica lqodoc quiyim ỹo'ueetetac da ỹa'maqachiguiñi chaqai da lliqueta.

₆Ma'le, ca' ca isecỹac toxonaxai chaqai ca qagreta llaalec neuora' sqaicanqaida,

ca regat chaqai ca quetaq llaalec napaata'anta' quiyim nco'materec,

ca huaqui llaalec chaqai ca sauaxaic leta'a chi niỹisashiguim sqo ỹojchi,

chaqai quiichi'ñigui quiyim qoỹoiquentac queca noctoqui'.

₇Aca huaca chaqai aca layoraxai late'e neuojne'ejta',

ca llaalqaipi lapo'ojta' quiyim nco'matec.

Ca sauaxaic leta'a ỹa'ic na 'uaqapi, 'ec na ñii'lola.

₈Ca noctoqui' ishit quiyim reualaxaitac hueetaugui aca salaq late'e lauaquiaxaqui,

chaqai ishit ishito da lqai'laxat queca nanaic lpa'gue'.

₉Caná'ogue najo ñaqa' ladocai co'teeta qaica ca ỹo'uet ca se no'uen,

ma' 'ec na huaxaỹaq quena' no'xataxat ana huaaxai,

ca' chaqaida 'neeta quiyim qaỹa'den ñi qara'gaxala' no'xataxajlec ma'le ná'ogue na 'laua.

₁₀Ca' quecajo na'xa'a ma'le,

ca' cajo llaxataxai ca lpa'a' ma' chaqaiso so Isaí ne'laxashiguim,

ca' netanec quená'ogue na qomyipi quena 'laua;

ná'ogue na ỹoreta'oguit qomyipi quena 'laua eec idaanaque,

qam cá'maq ỹaatqajam hueeta'ñi ma'le ỹaatqajam 'xoic na lauaq.