(14.1-2 Rapil só'maq ỹoqa'a yi 'laua neetalec.)
Chi qai'neetac so nashi quiyi Babilonia
3Qamiri qomyipi quena Israel, ma' nco'mataxandec qamiri ñi qara'gaxala' quena re'xoriguii, da reueetaxanaxahi queda nqa'viiguii dá'maq viriỹau'a na' qamiri na'aqa, 4ca 'viiñi' ma'le dajo no'ueenec, ca 'ñi'sac ñi nashi quiyi Babilonia, ca 'ñirac:
¡'Ajñii dá'maq 'neetari' ñí'maq qa'uaic!
¡'Ajñii dá'maq 'neetari' ñí'maq nishitaxai!
5Ñi qara'gaxala' ỹaqaiguichigui da lquesaxanaxa ñi hualoxonaq,
ỹaqaguitetajlec aca lelaataxanqate ñi qa'uaic,
6ñí'maq ỹahotaque na nouaxanaxaset na ỹoreta'oguit qomyipi quena 'laua paguec da lauel,
ca' se nco'majñi ỹouaxantac,
pataxañi na qomyipi quena lauel
chaqai rocanaxantapigui se i'xoren.
7Ná'ogue na qom quena 'laua 'ue da lo'daxa chaqai i'maqajlem,
chaqai ỹaualqatagui queda netoonaxac.
8Vire'ta ana qo'paq leenaxat pino chaqai ana cedro huaalec yi Líbano
netoonegue da nanoxonaxaqui',
ca 'naac: Na' qami' noxonec,
ca chaqa'ma' taachi'ñi quiyim qaica ca ỹouaxangoto qomi'.
9Queda pa'ỹaañi quena 'laua ỹaatqajam 'xoic na naỹaac
chaqai nenoxonshiguim ca'guit qami'.
Na la'al na leuaxaiquipi nelouec,
ná'ogue na nashillipi quena 'laua na'le ca'guit qami';
ná'ogue na lashi na ỹoreta'oguit qomyipi na'le
ne'laxashiguim quiyi nqa'xanqa'.
10Ná'ogue na'maxare retaqa,
ca 'naac caqami':
Qami' qai'neeta na'laaño' ca rquesaxanaxa'e',
ca vichiro'o' quiyim 'ñiite'm qomi'.
11Ca' najo lqodoc nqohin ca nemaqajnaxaqui'
chaqai ca niviigaxanaxac cana niviigue caqami'.
Na romachi' nomaqatecshiguim na lichiguiraxa,
chaqai qapochi' na ñilo'.
12¡Nachiriño' quena piguim,
qami' huaqajñi nete'ese!
¡Qanenaxaño' qami' quena 'laua,
qami' qadoxonqui' quen ná'ogue na ỹoreta'oguit qomyipi!
13'Neetapigui quen qavilli':
Sovirashiguim ma'le quena piguim;
so'uet ma'le ca ñqa'xanqa' quiyim ỹim nashi,
sellaalec ana neuaqajñi ñi qota'olec;
sa'ue ñqa'xanqa' ma'le queda rapiguim
cada qa' ladocai lapooqo' na 'naac qota'olqaipi.
14Ñapacalec ma'le ná'maq paguec lishicshi'ma naueguelec;
shinta ma'le ñí'maq ỹapacauec quená'ogue.
15¡Qam ỹaatqajam llic quiyim vichira'ña yi nelauaxa loiquenatec,
quedá'maq pa'aañi quiyi nqui'i nouaxanqa'!
16Ná'maq iuana qami', ca chi ra'ajñisac,
ca ỹaatqajam na'ijne'tegue qami', ca 'naac:
¿Ñijo' ñí'maq ỹale i'loxol nqai'en quen na 'laua,
nalauajñi quen na'le na qomyipi,
17ñí'maq co'tejlem nqai'en na 'laua qaica ca qom nqai'en,
nomachichiguiñi quen na na'aateripi
chaqai qaica ca ỹaxanec quena ncoñiitecseripi?
18Ná'ogue na lashillipi na qomyipi quena 'laua queeta'ñi' da lemaqachic,
quiñi 'óna hueeta'ñigui acá'maq chi lahi';
19qam qami' qoỹoqo'tegue ca qarenaqaitegue cañi napal lahi',
'ec ca lete qanaqaica'a,
'ec ca leuaxaic qaico'ueetapigui,
ỹalequetaugui na nalauatqaipi, qaichaxauec na lqahic,
qainaxa'ña ca nouaxanqa' na nqui'i no'qaachigui quena qa'.
20Se qaishinñi qami' sqai 'ñiite' na liỹa nashillipi,
ma' na'laxachirañi ná'maq chi qauochi',
chaqai lauachi' ná'maq chi ralamaxarichi' qauochi'.
Ná'maq llaxataxai na hualoxonyipi sqai 'neetari'.
21Na'maxachiiñi quiyim lauachii na llaalqaipi
sauaxat ná'maq se no'uen ỹo'uet so leta'allipi,
qaiyi tot qaica ma' ỹoiquentaiquet na 'laua,
qaiyi se no'xataxajlec na 'laua quena la'aateripi.
(14.22-32 Qanomachichiguiñi ma'le yi Asiria laseripi. Da na'qaatec quiyim qanpa'guene'e' ma'le yi filisteoipi.)
(15.1—24.23 Qaỹa'xateta'guit quiyim ñi qota'olec ỹa'ue ca nouaxanaxaset ma'le ná'maq na'aateripi sqoỹoqaque quiyi Israel chaqai quiyi Judá.)
