So David ỹahotaque nqo'naxat aso lahi' saua laqataxaco ñi qara'gaxala'
1Ca' so David lotqai lapoonta' sá'ogue so nalliripi nca'acseripi chicqaugui so llaalqaipi so Israel. Ca so'maxare ỹovi' treinta mil. 2Ca' eec, chicqochi'ñi yi Baala huaugui yi 'laua Judá, ca' liỹaatac sá'ogue so nalliripi. Ca' ỹahotaque nqo'naxat aso lahi' saua laqataxaco ñi qota'a, só'maq huaalec quiyim qanqouagaxaina da leenaxat ñi qara'gaxala' ñí'maq qaica lqalanec, yí'maq hua'ñi yi nqa'xanqa' quiyim nashi, yí'maq hueesa'ñi saua nadenqatqa piguim lase' 'vii naua laua'. 3-4Ca' aso lahi' saua naqataxaco qaillaañigui aso nahoglena dalaxaiỹole, qaỹachigoxochichi'ñi yi la'a' so Abinadab na'ñi aso quemaralec ladocai. Ca' so Uza chaqai so Ahío sauá'maq llaalqa so Abinadab, saua'maxare ỹo'deetalgoto saua lo'ol aso nahoglena hueetañigui aso lahite' saua laqataxaco ñi qota'a. Ca' so Ahío 'aueta caso'maxare. 5Qam so David chaqai sá'ogue so llaalqaipi so Israel imaqachintac ñi qota'olec ro'ueenaxantagui chaqai rasotetac ỹomatauec da lquesaxanaxa, nalo'chiguit da lelamaxa ana niviiguellipi chaqai na nasaquinatallipi chaqai na nouaxanallipi. 6Ca co'na' qaỹovita yi 'laua qaỹamata'gue lasoolaxanqa'o' na'le so Nacón, ca' so Uza ỹashilau'a aso lahi' saua naqataxaco ỹahotaque nolliitañi, ma' repoxolaxane' saua lo'ol nauegaxanaxalate'. 7Qam ñi qara'gaxala' ỹaatqajam ro'ỹa quedá'maq 'ne'tegue, ca' naqat da nachaalataxac so'maxare. Co'na'le, ca' so Uza chaqa'ma' huaañi ileu, hueeta'ñi na lahi aso lahite' saua laqataxaco ñi qota'a.
8Ca' so David se ỹa'maxaren, ma' ñi qara'gaxala' naqat da nachaalataxac so Uza. Vichiguiño' yi'maxare ỹanegue leenaxat Pérez-uza, ca' dajo leenaxat ñaqa 'ue nagui. 9Qam chaqaisoota sojo na'xa'a, ca' so David ỹaatqajam no'cha'a ñi qara'gaxala'. Ca 'naaco':
—¡Ỹaatqajam sqai huapigui iuel quiyim soda'a yi ỹa'a' añi lahi' naua laqataxaco ñi qara'gaxala'!
10Ca co'na' mashic totqai huapigui lauel quiyim ỹoda'a yi na'a' neeta'ñi, ca' relaataxanlec quiyim qaỹoda'a yi la'a' so Obed-edom, so ỹale na'ño' na'le yi Gat. 11Ca' aso lahite' saua naqataxaco ỹovi' tres shiriguiri neeta'ñi yi la'a' so Obed-edom. Ca' ñi qara'gaxala' ỹaatqajam nqouaguegue so'maxare chaqai sá'ogue so llaalqaipi.
So David nqo'naxata yi Jerusalén aso lahite' saua laqataxaco ñi qara'gaxala'
12Ca co'na' qara'qaataxana so nashi David quiyim sauaxat aso lahite' saua laqataxaco ñi qara'gaxala', ca' ỹaanem da lqouagaxa chaqai so llaalqaipi so Obed-edom. Ca' so David 'xoic da netoonaxac na' nqo'naxata yí'maq na'a' neeta'ñi aso lahite' saua laqataxaco ñi qota'olec. 13Ca co'na' sauá'maq i'xatete' aso lahi' saua laqataxaco ñi qara'gaxala', co'na' ỹovi' quiyim seis qauahi', ca' so David ỹalauat so tooro chaqai qagreta loua' 'uegaxasaq, ỹa'ue lachitaxanataxanaxat, ca ỹavigaxat.
14Ca' so David ỹansañi saua loho qaican ishite', chicqoraugui na lino, ca' ỹaatqajam rasot, ỹomatauec da lquesaxanaxa. 15Ca' so'maxare chaqai sá'ogue so llaalqaipi so Israel raỹaacotagui chaqai ỹaualqatagui, pe'taxantalec na' i'xat aso lahite' saua laqataxaco ñi qara'gaxala'.
16Ca' aso lahite' saua naqataxaco co'na' ỹovira'a yi na'a' neeta'ñi so David, ca' aso Mical só'maq llaale so Saúl ra'ỹauco' caso nqote so lauo'. Ca co'na' idaana'a so David nenotetashiguim chaqai rasotetacot ñi qara'gaxala', ca' aso'maxare ỹaatqajam ra'aguelec so'maxare.
17Ca' aso lahite' saua laqataxaco ñi qara'gaxala' qailla'ñi ca loma' queca 'imec na'daañi chi ỹa'yiño' so David ỹauaaque lahi'. Ca' so David chaqa'ma' ỹo'uet aso lachitaxanataxanqate ỹavigaxat, qaiyi qareuaguiguit quiñi qara'gaxala'. 18Ca co'na' ỹomat quiyim ỹo'uet aso lachitaxanataxanqate, ca quiichigui nqai'en da leenaxat ñi qara'gaxala' ñí'maq qaica lqalanec quiyim ỹaanem ca la'maxa ca llicyaxac so qomyipi. 19Ca sá'ogue só'maq ỹalequetaho queso llaalqaipi so Israel, na ỹale chaqai ana 'aalo, qoỹaanem 'óna pan quiñi 'óna, chaqai ana nashiviaqata la ana nanecse chaavic dátiles, chaqai ana nashiviaqata 'uva. Ca co'na' ime dá'ogue, ca' pilapego quenaua la'aate'.
20Ca' so David qai'neeta pilo queca la'a', ma' ỹahotaque ỹaanem da nqouagaxa so llaalqaipi. Qam aso Mical asó'maq llaale so Saúl, 'au ca'guit so David. Ca 'naaco':
—¡Ỹaatqajam chalego la'maxa da 'neetari' ná'maq lashi na llaalqaipi so Israel quiyim nachaxana na lelaataipi na lotauaripi nashillipi, 'neetari' ca qaica ca layiloxo!
21Ca' so David 'naaco':
—Ỹaatqajam llic quiyim yasotetac, qam yasotetacot ñi qara'gaxala' ñí'maq ỹim lca'acsec quiyim yilla'ñi da lo'ueenataxanaxac so qataa'i', chaqai quena rqaỹachi'ipi quiyim ỹim la'gaxala' na lalamaxaret llaalqaipi so Israel. Vichiguiño' ỹim yasotetacot ñi'maxare. 22Ca' ỹim nagui lama'xa qaica ca ñimaqajnaxac chaqai ñineequesen, ipaquichigui nqaishin dá'maq 'ñirac. Qam ỹaatqajam chicqochigui ma'le ca lemaqajnataxanaxa ná'maq nelaataipi 'quiisapega.
23Ca co'na'le, ca' aso Mical chi illivichiguiñi qaica ca llaalec.
