2 Samuel 7

₁Ca co'na' so David mashic neetaugui ñi lauo' lodegaxat, ca' ñi qara'gaxala' ỹaanem quiyim huaquichiguiñi nqai'en qaicanqaida quená'ogue na npa'guenaxauaripi quená'maq sqoỹoqaque, ₂ca 'naaco' na'le queso letaxaỹaxaqui ñi qota'a, leenaxat Natán:

—Qami' ya'ajñisac quiyim ỹim sentaugui ñi 'imec lodegaxat chicqaugui ana qo'paq leenaxat cedro, qam añí'maq lahite' naua laqataxaco ñi qota'a neetaugui ñi chi na'daañi 'imcoqui'.

₃Ca' so netaxaỹaxaqui Natán 'naaco':

—Qami' 'viichi' ná'ogue ná'maq hueetapigui na qavilli', ma' ñi qara'gaxala' rotauañi' ma'le.

₄Qam chaqaiso so pe, ca' ñi qara'gaxala' nachaxana so Natán, ca 'naaco':

₅—Quirepegue' ñi ilaatec David, ca' 'qaataxañita quiyim ỹim, ma' ỹim na'gaxala', shinac: Mesqai qami' ná'maq no'xoñirishiguim ca 'imec quiyim senaugui ca'maxare. ₆Chicqochigui so na'xa'a na' ñaqata'a so llaalqaipi so Israel quiyi Egipto, chi ỹovireta'a nagui, se ỹauanapega seuetaugui ca 'imec, ta'ta'a quiyim seuetapougui ca 'imec na'daañoqui'. ₇Quesaua'que saua ñaxari quiyim iỹaatac na qomyipi, qaica ma' 'ue quet ca sashiilo'ot queso nashillipi, quená'maq sano quiyim reloxoỹa'a na ỹalamaxareteripi quena Israel, quiyim ỹo'uet quet ca iuo' ỹachigoxotaugui na qo'paq cedro. ₈Ca' vichiguiño' nagui 'ñirapega ñi ilaatec David quiyim ỹim, ỹim na'gaxala' qaica lqalanec, shinacsa': Ỹim ñaqata'a qami' na'le, sachigoxotau'a aso nelo qagretaipi, chaqai sollaapeguem qami' quiyim loqoisa'a aso'maxare, ma' sahotaque quiyim qami' la'gaxala' ná'maq ỹalamaxareteripi llaalqaipi so Israel. ₉Ỹaatqajam scoỹaretegueñi qami' quecanchaqa 'itegue, ñomachichiguiñi sá'ogue so npa'guenaxaua'e'ipi quena' quiguit qami', chaqai so'uet quiyim qami' choxoraic, 'nejem nqaishin ná'maq ỹalliripi 'ue nqai 'negue quena 'laua. ₁₀Chaqai sa'maxatetañi ca loma' na lalamaxareteripi llaalqaipi so Israel, ca' chaqaiyi sana'ñi, qaiyi naalec cá'maq lalamaxaret, quiyí'maq hua'ñi quiyim qoỹaxantac chaqai na hualoxonyipi sqai ỹoiquentac, 'nejem cá'maq ñaqai 'avichiguiñi, ₁₁na' sanñi na nashillipi quiyim la'gaxala' na ỹalamaxareteripi llaalqaipi so Israel. Ỹim so'uet quiyim qaicanqaida ma'le quena npa'guenaxaua'e'. Chaqai sa'deenaxanaxanegue qami' quiyim sa'ue ma'le ca qachaalaxai'ipi. ₁₂Chaqai ma' ỹovita ca lqodoc aca rqauaxagui'i' ma' rillivi', ca' ỹim sano queda ro'ueenataxanaxaqui' ca 'óna quena qachaalaxai'ipi, ca' ca'maxare sano quiyim nashi. ₁₃Ca' ca'maxare chaqaica cá'maq no'xonshiguim ma'le ca iuo' ca huaugui quiyim qanqouagaxainot aỹim ma'le. Ca' ỹim se'taxajñi quiyim sqaica lqodoc nashi ca'maxare ma'le. ₁₄Ca' ỹim chaqai aỹim leta'a ma'le, chaqai ca'maxare ca ỹaatqajam ỹaalec. Ca no'm 'ue ca ỹo'maqajnac, ca' souaxan chaqai se'lec, shi'ntegue ná'ogue na neta'allipi 'neeta'gue ca llaalec. ₁₅Qam se lloỹoote'oga da ỹoqouagaxa ma'le queca'maxare, mesqai shine'tegue na'le queso Saúl na' ñaqat, ca' sanagui qami' da lo'ueenataxanaxac. ₁₆Ca' dajo ro'ueenataxanaxaqui' quiyim qami' nashi quena ra'aachi' chaqai 'neetari'. Chaqai se'taxajñi quiyim squepaqataxanlec chaqai sqaica lqodoc nqaishin ma' na qachaalaxai'ipi sanagui qai'neeta quiyim nashillipi.

₁₇Ca' so Natán ỹa'xatem dá'ogue dajo so David, ỹaatqajam ipacqajanchigui da leuanaxanaxac chaqai dá'maq 'qaachigui. ₁₈Co'na'le, ca' so nashi David inoxono, ma' ỹahotaque qara'qaachigui quiñi qara'gaxala' quiyim retaqa. Ca 'naaco':

—Qami' ỹa'gaxala', ¿negue' na' ỹim, chaqai negue' ná'maq ỹaalqaipi quiyim yoviraqchira'ñi najo? ₁₉Ca ¡'eco' cocho'qui' nqai'ñi' dajo, qami' ỹa'gaxala', vire'ta quiyim choxochisa'guit cá'maq ñaqai naata no'ueenataxanaxac quiyim nashi ma'le na ỹaalqaipi, ma' ỹim relaachiqui'! ¡Ỹaatqajam qaica ca qom ishit ỹo'uet dajo, 'nejem qami' ỹa'gaxala'! ₂₀¿Negue' queto' ca liỹa shinac, qami' ỹa'gaxala', ma' qami' ya'yiiñite' ma' ỹim relaachiqui'? ₂₁Ná'ogue ná'maq 'viichi' chalego loyac, ca' chaqaina ná'maq vi'saque chaxañi' qaiyi sa'den. ₂₂Ca' qami' ỹa'gaxala', ¡chalego dá'maq lecaic qami'! Ma' qaica cá'maq 'nejem qami', qaica ca liỹa ỹoiquentac ná'ogue, qaqamite'. Ma' chaqaida dá'maq qomá'ogue sa'xaiqachigui na'le. ₂₃Chaqai quena Israel ná'maq ralamaxarichi', ¡na'maxare qaica nqai 'nejem, ma' najo qomyipi ỹaatqajam qainaata quena 'laua! Qami' qota'olec, na'maxare naqachira'a na'le, ma' vi'saque ralamaxarichi'. Ca' 'viichi' da lichoxoric quedá'maq chalego lecaic 'viichi' quena'maxare. Qami' o'yirauec nanchaqaina quedá'maq taata'gue na ralamaxarichi'ipi ná'maq nca'laxachirec na'le quiyi Egipto, chaqai quená'ogue na liỹa qomyipi chaqai quena lashiilqaipi lqolaquipi. ₂₄Ma' qami' vi'saque quiyim na llaalqaipi so Israel ralamaxarichi' chaqai qaica lqodoc quiyim qami' la'gaxala' qota'olec.

₂₅Ca' vichiguiño', qami' ỹa'gaxala' qota'olec, pacqajñichirigui dá'maq chaxañisapeguem aỹim ma'le ma' ỹim relaachiqui' quiyim nashillipi ma'le na ỹaalqaipi, ca pacqajñichirigui da ra'qaachiqui'. ₂₆Ca' ¡da qadeenaxachi' chaqai 'neetari' da lecaic chaqai quiyim qara'xachi'sac quiyim qami' qara'gaxala' qaica ca rqalanqui', ma' qami' qota'olec quena llaalqaipi so Israel! ¡Chaqai da ỹo'ueenataxanaxac, ỹim relaachiqui' David, se neme quepaqataxañiseguelec! ₂₇Ca' qami' ỹa'gaxala' qaica ca rqalanqui', ya'deenaxanaxañitegue chaqai 'taxachiriñi da ỹo'ueenataxanaxac quiyim ỹim nashi chaqai quena ỹaalqaipi, vichiguiño' ỹim 'eno'm ỹim relaachiqui', qam saanot qami' da ñi'xoresenaxac. ₂₈Qami' ỹa'gaxala', ỹaatqajam qami' qota'olec chaqai naua ra'qaataxahi' ỹaatqajam lliquete' chaqai chalego da rqouagaxa'e' chaxañisapeguem najo relaachiqui'. ₂₉Ca' vichiguiño' nagui machiralec da rqouagaxa'e' da ỹo'ueenataxanaxac quiyim ỹim nashi chaqai na ỹaalqaipi, qaiyi se neme si'iitacot qami'. Qami' ỹa'gaxala' qota'olec, dá'maq chaqai chaxañi'sac chaqai da rqouagaxa'e' se neme hueetalec da ỹo'ueenataxanaxac quiyim ỹim nashi chaqai na ỹaalqaipi.