Cam qoỹan na'aqtac iuen da qaipaqueelec
1Da ivita da 'anqo'oneua'a añi atamnaxaqui maye lalamaqte Ñim Nataxala', qaq iuen da 'antelañi: saishet da 'aỹa'aneuo ca 'arachetaqtaxanaxat da 'aue'enaxat nam shiỹaxauapi maye qaica ca ỹaỹaanapec, da saq noma da saỹaỹamaxañi de'era ỹo'ottac, nacherata da 'anquicot Ñimaye, qataq 'am lhuotta da 'aualaq. 2Qataq saishet da 'auỹalapigui' da 'autaqa qataq ye 'arhuennataxa da 'aỹa'anot ca 'ara'aqtac Ñim Lo'onatac 'Enauacna, cha'aye Ñimaye neta'ague da piguem, qaq 'am qalaq qoueta'a ana 'alhua. Qaq ỹoqo'oye cara'acolec da 'analoqnapec ca 'artaxaỹaxac. 3Cha'aye da qalota na nhuennataxacpi, nache ỹo'ot da ñi'iỹaxa, qataq da ỹaguec da ntaxaỹaxac, nache ivira'a da qaica ca naigui nam qaỹa'axatpi.
4Da huo'o ca 'auachaxanapecot Ñim Lo'onatac 'Enauacna, qaq sa 'anaỹaloxon da 'aupaqueelec, cha'aye Ñimaye saỹaỹamaxaren nam qaica ca ỹaỹaanapec. Qaq 'aupaqueelec qome cam 'auachaxanapec, 5cha'aye ỹactec da ỹaỹamaqchiguiñi da qaica ca qaỹachaxanapec, qaq saq 'ena'am da huo'o ca qaỹachaxanapec qalaq sa qaipaguelec.
6Saishet da 'aua'aqta'a ñi 'arachaxat da ỹauo'o ca 'arasouaxashet, qaq ime nache 'aua'aqtaxanem cam lamaxashec Ñim Lo'onatac 'Enauacna da qonetega chochaq 'aulamaqalec cam 'ara'aqtac. ¿Ta'ainco' da 'auo'ot da dalemata Ñim Lo'onatac 'Enauacna souaxat cam 'ara'aqtac, nache nlaxaañi cam 'aro'onatac? 7Qaq ỹoqo'oye da qouetangui 'enauac na qalota maye ỹo'ot da ñi'iỹaxa, qataq na qalota na'aqtacpi, qataq nam qaica ca naigui, qalaq 'am iuen da 'auachaxana da huo'o naq 'enec 'anqa'en Ñim Lo'onatac 'Enauacna. 8Saishet qome da 'aue'elaxam da huo'o ca 'alhua da huaña da sa qaiyacnapec ca choxoraq, qataq da sa qairen da nalochiguiñi lataxac, qataq da sa qaipaguelec cam lapaqtañi lataxac, cha'aye cam nataxala' qalaq huo'o ca lỹa ỹaquitcheguem nataxala' da npaxattalec camaye, qaq caamaye, qaltaq huo'o cam laỹepi nataxala'pi maye ỹactec da la'amaqchec da npaxattaleguete. 9¡Qaq damaye qaỹamata'ac naxa da nquictasheguem da laỹamaxa ca qanayeeta'a 'alhua, qataq cam nta'a itauaatac naxa nam netauga na no'onaxa! 10Cha'aye cam ỹaguec da lauoche ana anom, qalaq nache queto'ot da huotaique da nquictasheguem ana alom, saishet da huo'o ca na'a'q da ỹa'amaqten da mashe qalota ana alom. Qaq damaye nataqa'en qaica ca naigui.
11Cha'aye da nquictasheguem da nsallaxa, nache nataqa'en nquictauec nam qaisheeten. Qaq ¿negue't cam naueguec, da chochaq qanlota'ai' nam huo'o nalamaxatpi? 12Qaq cam 'onataxanaxaic, qalaq na'aictaxa da saq 'amaqtaq da lquia'axac huo'otaq lta'araic da lquia'axac, qalaxaye ỹataqta amata na lo'ochaxa, qaq cam sallaxanec qalaq souaxat da lsallaxa nache saq ama na lo'ochaxa.
13Qataq huo'o da sela'a ỹataqta qauem maye huetalec ana 'ana 'alhua, qaq damaye, 'eeta': da qalaỹootasheguem da nsallaxa damaye na'aqchet ñim hueto'ot damaye, 14cha'aye da qauem ca nmenaxac camaye, nache ishet da deqat imauec de'era lsallaxa, qaq da huo'otaq huo'o ca llalec camaye, nache taỹa'a da qaica ca no'ona'aguet. 15Qaq dam 'eetec co'ollaq naỹa ana 'alhua, qaq nache 'eetec qom jec da ca'ai ana 'alhua: ỹataqta huetauec 'eeta'am co'ollaq cheta'ague da ñeguiñi, nache qaica ca ỹache 'enauac nam lalamaxatpi maye chegaqaigui dam lta'araic lo'onataxanaxac. 16Qaq damaye ỹataqta 'eesa da qauem, cha'aye dam 'eetec co'ollaq nvita ana 'alhua, qaq nache 'eetec nataqa'en qom jec. Qaq ¿negue't cam ỹachegoxotaigui dam lta'araic lo'onataxanaxac? 17Ye ivira'a da 'enauac da nachaalataxac da nauane' na napalaxa, qataq qalota nam saỹalemaxat lhuennataxacpi, qataq nam nqui'icpi, qataq da lalemataic. 18Qaq dam sela'a maye ỹoqta ỹaỹamaqchiguiñi da qaỹo'ot damaye, 'eeta': sequia'aqtac qataq ñeỹomaqtac, ñeque'etaxanaqchigui dam alaỹaxac dam qalota qaro'onataxanaxac ana'ana 'alhua, da ñaq huo'o dam saqaloc qanachaalataxac maye qomi' ỹanema Ñim Lo'onatac 'Enauacna, cha'aye nachera dam qomi' qoỹanema. 19Qaq nache 'ena'am, 'enauac nam shiỹaxauapi maye Ñim Lo'onatac 'Enauacna ỹanem na qalota logoxoshetpi qataq da lsallaxa, nataqa'en ỹanem namayepi da ishet da deque'etac, qataq ỹacootalec nam qoỹanem da lalamaxat, cha'aye da qantootapeguec nam qalota maye chegaqaigui da lta'araic no'onataxanaxac, damaye chegoqo'ot Ñim Lo'onatac 'Enauacna. 20Qaq cha'aye Ñim Lo'onatac 'Enauacna nlaxatchigui añi lquiyaqte da ntonaxac, nache saishet da deuennataxaateguelec dam taỹa'ague da nachaalataxac.