1Qaq ime, nache qaltaq semeteetac da saqaiyacnapec na shiỹaxauapi maye huetalec ana 'alhua, nache selota'a nam saqaiyaqnapecpi da nỹeetac qalaq qaica ca ishet da ỹa'añaqchet namayepi, nam saiyacnapec namayepi qalaq ỹataqta sairen, qalaxaye qaica ca chochaq ỹa'añaqchet namayepi. 2Qaq ỹoqo'oye aỹem sela'a da ỹataqta machiguiñi nam mashe ileupi, qaq saq 'ena'am nam ñaq nca'altauecpi. 3Qalaxaye sela'a da nam ỹataqta machiguiñi, nachena nam saxanaxa da ñeguiñi, cha'aye namayepi saxanaxa da ilogui nam qauemsat, maye qaỹo'ottac ana'ana 'alhua. 4Qaq nataqa'en sela'a da 'enauac nam no'onatacpi maye ỹataqta ỹaỹamaqchiguiñi, qataq ỹo'ot da ño'oxonnataguec ca shiỹaxaua, namaye ỹo'ot da nquiỹata'a't caua shiỹaxau'. Qaq nataqa'en damaye qaica ca naigui, 'eeta'am da 'eetec da huotaique qanllañi na la'at. 5Qaq nam shiỹaxauapi 'eeta': «cam qaica ca ỹaỹaanapec nsoqtrauo naua lhua'q, qaq ỹoqo'oye camaye taỹa'a da ilem na lqouaxa», 6qalaxaye aỹem shenapec: «na'aictoxo' da sa qaỹalec catai' mataxaqui, qaq saq 'ena'am da ỹaguec da no'onataxanaxac, cha'aye damaye 'eeta'am da huotaique qanllañi na la'at.»
7Qaq ime, qaltaq samata'ague da lỹa laỹe, nache sela'a da lỹa, maye qaica ca naigui huetalec ana 'alhua: 8ca ỹale 'oonolec, qaica ca nauochaxaua, qataq qaica ca llalaqpi qataq ca lqaỹañecpi, sanauane' da cara'acolec da nmatec, qataq saỹauano' da naloqten da huo'otaq ỹapacauec da lsallaxa, qataq saishet da nnatteguela't: «¿Negue't cam talec qome nam chegaqaigui dam ỹo'onataxanaxac? Qataq ¿ta'ainco' da sa sasheneguet da ñachaalataxac dam namaicỹaxac?» Damaye nataqa'en qaica ca naigui, qataq qapa'atta no'onataxanaxac.
9Qaq ỹactec da 'onaxaic da dos caua ntaueetega't shiỹaxau', cha'aye ishet da lta'araic cam ỹachegoxotraigui dam lo'onataxanaxa'c. 10Cha'aye da huañi ca 'oonolec caamaye, nache ca lỹa ishet da ỹanaxanaxaasheguem. ¡Qalaxaye choxoraxaso' cam 'oonolec, cha'aye da huañi nache qaica ca ỹanaxanaxaasheguem!
11Qataq nataqa'en da dos caua nauataña't, nache caamaye dapaxaỹa'a't, qalaxaye cam 'oonolec, qalaq ca ¿'eeteco' da ishet da dapaqa? 12Qataq ca 'oonolec ishet da saqalaq da qanauec, qalaxaye caua dos saishet da qanaue'c. Qataq cam nañec maye tres caua qaỹauaxaỹaxana't lo'ol, saishet da saqalaq da dachepi.
13Qataq ỹactec da 'onaxaic ca nsoqolec da choxoraq qalaxaye ỹaanaxanaxaic, qaq saq 'ena'am ca nta'a maye ỹa'axaiqui, qalaxaye qaica ca ỹaỹaanapec, cha'aye camaye mashe saishet da ỹaconeguet cam nqataxac. 14Qaq na'aictaxa da chegaqaigui aca ncoñetaxanaxaqui cam inoxoneuo da nta'a, huo'otaq da chegoqtoigui da lachoxoyec da inoxoneuo da nta'a. 15Qaq nataqa'en sauaachigui da nam shiỹaxauapi ỹataqta itauan camaye. 16Qaq na'aictaxa da ỹataqta qalota na shiỹaxauapi maye ilotague', qalaxaye namayepi qataq cam llalaqpi qome, saishet da machiguiñi naqa'en camaye. Qaq nataqa'en de'era qaica ca naigui, 'eeta'am da 'eetec da huotaique qanllañi na la'at.