Da lauanaqchec qataq da qaỹaỹaanaxanaxanec so Pablo
1Ỹataqta qaica ca naigui ca shiỹaxaua da maiche ño'oxoreetapeguela't. Qalaxaye nache 'ena'am so'ot damaye. Qaq nagui nache qami' sa'aqtaxanema nam ỹauanaqchecpi qataq dam aỹem ỹaỹaanaxanaxanec so Qarataxala' Jesucristo. 2-3Aỹem sauatton so ỹale maye ỹa'amaqten So Cristo, qaq somaye mashe ivi' nagui naua catorce vi'iye da qaỹauega yem piguem maye pa'atcheguem. Aỹem sa saỹaten da ima da lo'ocỹaxac co'ollaq qaỹauec, huo'otaq saishet. Qalaxaye chaqñeta Ñim Lo'onatac 'Enauacna maye ỹaỹaten. 4Nachaqrata da aỹem saỹaten da Somaye qaỹaueegue co'ollaxa da piguem dam lma' na qanca'alaxatec. Qaq co'ollaq hueta'a yemaye, nache hua'axaỹalo soua na'aqtaqa maye sa qaỹa'axaỹapiguilo qataq sa qaishetapec da detaxaiguilo ca choche shiỹaxaua. 5Aỹem ishettaxa da ña'amaqten da sauatton ca ỹale maye 'eeta'am somaye, qalaxaye aỹem saishet da maiche ña'amaqteela't. Nachaqrata da aỹem na'amaqchengui da qaica ca ỹa'añaxac. 6Aja' ỹataqta 'eesa de'era, da huo'otaq aỹem maiche ño'oxoreetapeguela't, damaye saishet da naigui da aỹem qaica ca saỹaanapec, cha'aye aỹem sa'axattac dam 'eesa. Qalaxaye saishet da sheetec de'era, cha'aye sa saỹamaxaren da huo'o ca aỹem ỹagaqnapeguec souaxat da imeteetac nam so'otpi huo'otaq nam ỹa'aqtacpi, 7huo'otaq nam ỹauanaqchecpi maye aỹem ỹachaxana Ñim Lo'onatac 'Enauacna. Qaq ỹoqo'oye da yaqto' saishet da aỹem taigui da ño'oxonnaxac, nache aỹem sevireguet da lta'araic ñequi'ic. 'Eeta'am da so pa'aguenataxanaxaic ỹa'ayigui da ỹo'ocỹaxac aca ỹaxat le da yaqto' ỹauo'o da lta'araic ñeque'eenaxac. 8Qaq ỹoqo'oye tres da she'eguelaxalec da seỹaxanot Ñim Lo'onatac 'Enauacna da yaqto' nqat de'era ñeque'eenaxac. 9Qalaxaye Ñimaye aỹem ỹasateguet, 'eeta': «Da iqouagaxanaqtaic mashe 'am hueto'ot, qaq saqca ca lỹa 'aueetac. Cha'aye da ỹa'añaxac yo'oq da nachattaigui ca shiỹaxaua qaica ca la'añaxac.» Qaq ỹoqo'oye ỹataqta samachiguiñi da saqca ca ỹa'añaxac yaqto' da la'añaxac So Cristo yo'oq da aỹem nachattaigui. 10Qaq ỹoqo'oye samachiguiñi da huo'otaq qaica ca ỹa'añaxac, huo'otaq da aỹem qaisheueetac, huo'otaq da huo'o da iuenaxanaxa, huo'otaq da aỹem qaicaatac, huo'otaq da souaigui ca lqalaic sasoilec So Cristo. Cha'aye dam ỹo'ot da ỹa'añaxac, nachera naxa da ivita da ñauattoola't da qaica ca ỹa'añaxac.
Saq maguiñi so Pablo souaxat so 'amqaanataxanaxaicpi maye netaña ye Corinto
11Aỹem saỹaten da maiche ño'oxoreetapeguela't, nache damaye ỹa'axat da qaica ca saỹaanapec, qalaxaye qami' aỹem qauamaqỹalec da so'ot damaye. Qamaq qami'ctaxa maye qavio'oxoyiñiitac aỹem, cha'aye sela'a da saishet da aỹem napacalec nam qoquiitague'pi maye 'eetega da nataỹaña nam Jesús lamaxashecpi, na'aictaxa da aỹem qaica ca shenec. 12Cha'aye da ñeualaxaunaxac co'ollaq qami' sootapegueto, qataq nam na'anecpi maye sa qaỹauanapigui, qataq nam ỹo'ot da na'aalaxa maye so'ot chegoqchigui da la'añaxac Ñim Lo'onatac 'Enauacna, nachena na ỹachaxan da ỹoqta 'eesa da aỹem lamaxashec So Jesús. 13Cha'aye da qoñiita 'oonolec dam no'on maye saxanaxa da qauo'oche, dam mashe ỹo'ottac na laỹepi 'amqaanataxanaxaicpi: ¡Qami' saishet da aỹem qautauñic aca qo'omi! ¡Qalaxaye choche aỹem qauchoxoyiñi! Cha'aye maiche ỹasouaxashet, souaxat da maiche aỹem saishet da qami' seỹaxanoiguilo.
14Qaq nagui mashe ñaỹamaxattac da qaltaq qami' ñamaqtegalo. Qaq damaye mashe ivi' da tres da she'eguelaxalec da qami' ñeqo'onalo, qalaxaye saishet da qami' seỹaxanoto da aỹem qautauñic aca qo'omi. Cha'aye saishet da nacheca cam ñalaqpi cam laỹona't aca alom da yaqto' itaua'n caua lta'al, maye nachecaua caua nta'al maye iuen da laỹona't aca alom, da yaqto' talec ca llalaqpi. Qaq qami' maye qami' ỹalaqpi. 15Qaq aỹem qaica ca shectega da sematteuo na aỹem hueto'ot, ivira'a da yo'oqchigui ñachaalataxac da saneuo da yaqto' qami' setaua'n. Da aỹem ỹataqta qami' sauoteque, qaq ¿ta'ainco' qami' ye saishet da aỹem qauauochec?
16Qami' qauaỹachiñiita da aỹem saishet da saỹamaxaren, da qanhuogoqoitapeguelec aỹem da yaqto' aỹem qaỹa'añim aca qo'omi. Qalaxaye nache 'ena'am huo'o na 'eetega da aỹem sa ñeqalat da qami' satenache't. 17Qalaxaye saishet da qami' satenache't da huo'otaq sachegoxotchigui cam 'oonolec soua shiỹaxau' maye qami' samaxalo. 18Co'ollaq seỹaxanot so Tito da yaqto' qami' namaqtegalo, qalaq samaxague so lỹa qarqaỹa. Qaq ¿peta'a qami' ỹatenache't co'ollaxa so Tito? Qataq ¿peta'a saq 'en da qomi' nache 'eeta'a't da qarataxac, qataq 'eeta'a't da qarhuennataxac?
19Qalqo' ¿qami' qaupi'itaxañiỹa peta'a da qomi' shenaqapec de'era, da choche qami' ñimanaqtacoto? 'A'i, saishet. Nachaqrata da qomi' ỹaỹateete' Ñim Lo'onatac 'Enauacna nagui da qomi' lalamaqa'ate So Cristo. Qaq 'enauac de'era so'otaq, qami' ỹaqaỹarolqa, damaye naigui da yaqto' ishet da qanquiquiitasheguem da ỹataqta qaupi'iỹa'ai So Cristo. 20Cha'aye aỹem huo'o da icolanaxa da huo'otaq ivita da qami' ñeqo'onalo, qaq saiuena'a, da huo'otaq qami' selaleguete da qampi'iñeeguet da tatapigui ye iuel qom qami' ñauaneto, qataq saiuena'a da qami' nataqa'en saishet da tachigui cam tatapigui ye qarvilli da aỹem qanauañi'. Cha'aye aỹem huo'o da icolanaxa da huo'otaq qami' ñatenaleguete da qancotaitega't, qanquiỹaita'a't huo'otaq ñi 'oonolec dalematatega ca lỹa souaxat da mataxalaic, ỹa'axat ca saq 'en, quetapeguelec ca lỹa, quetague' da ño'oxonnaxac, qataq huo'o na choche lliỹa't naqa'en na laỹepi. 21Qataq da seuennataxaatac, nache ỹataqta huo'o da icolanaxa da qom ivita da qami' ñamaqtegalo, nache Ñim Lo'onatac 'Enauacna ishet da ỹo'ot ca ỹa'aloxo cam ishet da aỹem nnoinaqchet, cha'aye qalota da qoñiita na saishet da ỹaxanec da lle'etaxaloxo qataq da ỹo'ottac da qauem, nachaqrata da ỹo'ottac dam sa qaishetapec, cha'aye huo'o na ñaq quetalec da ỹo'ottac da sa qaỹashen lataxac da qanayeetapeeguet aca sa nhua.