So Pablo qataq som saq 'en maye 'eetega lamaxashecpi So Cristo
1Da iyaxa da qami' cara'ac da aỹem qana'añaxacheeguet, cha'aye sheeta'am ca qaica ca laỹaanataxanaxac. 2Cha'aye aỹem huo'o da 'eco' ica'alaxanaxac da qoñiita. Qalaxaye de'era ica'alaxanaxac, damaye chegoqtot Ñim Lo'onatac 'Enauacna. Cha'aye aỹem sauotaique da qami' saronaxanaxanegueta So Cristo, qataq sauotaique da qami' sachaxaneua'alo Somaye, da 'eeta'am ñaqa'en aca qa'añole maye saxanaxa da huaron, da huaroneguet ca 'oonolec ỹale. 3Cha'aye de'era 'eetec so na'araxanaq maye sa nqalaataxaic co'ollaq ỹatenachet aso Eva, nachera da ỹo'ot da icolanaxa da saiuena'a da nataqa'en ishet da qami' ỹatenache't. Nache da qarhuennataxaqui ishet da dasheueeguesop dam huesochiguiñi qara'amqaanataxanaxaqui So Cristo. 4Cha'aye qami' qana'añaxacheeguet nam qami' nvittapegueua'alo maye ỹa'axattac ca lỹa Jesús maye saq 'ena'am som sa'axataqtac, qataq da qami' qauacoñiiguet ca lỹa saqcha'a maye saq 'ena'am som Saqcha'a Na'añaxac Qui'itta maye mashe qauacoñiiguet, qataq ca lỹa na'aqtaxanaxac maye saq 'ena'am dam mashe sogote qauacoñiiguet. 5Cha'aye aỹem sela'a da saishet da aỹem napacalec nam qoquiitague'pi maye 'eetega da nataỹaña nam Jesús lamaxashecpi. 6Qaq na'aictaxa da saishet da ỹoqta saỹaten da itaxaỹaxac, qalaxaye saỹateeta da huo'o ye sa'axattac. Qaq damaye, nache 'eetai' naxa da qami' sachaxaategalo, chegoqchigui 'enauac nam qami' so'oteque.
7Qaq ¿negue't cam ỹasouaxashet? Ye nachaqrata da qami' sa'aqtaxanema da no'on na'axaỹaxac maye chegoqo'ot Ñim Lo'onatac 'Enauacna qataq saishet da qami' seỹaxaato'oto da aỹem qaushiichiñi. Qataq she'eguelaxa da qaica ca ỹa'amaqchec da yaqto' ishet da qami' qanauaxaỹaxaayishegue'm. 8Qaq aỹem 'eeta'am da seuotaxanec aso alom nam ỹa'amaqten So Jesús co'ollaq saconeguet aso lsheetenaxanaqte, da yaqto' qami' souapegueto. 9Qataq co'ollaq qami' sootaiguilo, qalaq huo'o da iuenaxanaxa, qalaq saishet da huo'otaq qami' seỹaxaataiguilo da aỹem qautauañi. Cha'aye nam ỹa'amaqten So Jesús maye lma' ye 'alhua Macedonia, aỹem nviraxata aso ltaunaxanaqte maye naigui nam seueetacpi. Qaq ỹataqta lta'araic da itelaxa da huo'otaq huo'o ca aỹem ime'eguet da qoñiita, qaq damaye nache 'eetai' da shecto'ot. 10Qaq ỹataqta aỹem 'eesa da sauattoota da 'eesa lataxac maye chegoqo'ot So Cristo, qaq ỹoqo'oye saỹateeta nataqa'en da saishet da huo'o ca nqat da ñetonaxac nam netaña ye 'alhua Acaya. 11Qalaxaye saishet da ỹa'aqtac de'era, souaxat da sa qami' sauoteque. ¡Ñim Lo'onatac 'Enauacna ỹaỹateeta da aỹem ỹataqta qami' sauoteque!
12Qalaxaye aỹem shecto'ot da so'ot dam so'ottac, yaqto' saishet da sauo'o ca ldaqa' nam choche ỹauotaique dam qaỹo'oxoreetac qataq qaisheeteta, da yaqto' huo'o ca ntonaxac da 'ena'ama qomi'. 13Cha'aye namayepi saq 'en da namaxashecpi, qataq datenataxaatac, choche ỹe'enaxat da lataxac nam ỹataqta 'eesa da lamaxashecpi So Cristo. 14Qaq damaye saishet da huo'otaq lleualqa'a, cha'aye saỹaanaq da so pa'aguenataxanaxaic ishet da choche ỹe'enaxat da lataxac cam 'oonolec na lamaxashecpi piguem le'ecpi Ñim Lo'onatac 'Enauacna maye huo'o na le'eraxa. 15Qaq ỹoqo'oye saishet da qalhuala'a da huo'otaq nam lo'onataxanaxanecpi somaye da ishet da choche ne'enaqchingui da 'eetega da no'on cam ỹo'ottac. Qalaxaye ca nhuaxanaguec namayepi ipacchigui qome 'enauac nam ỹo'ottacpi.
Na nque'eenaxacpi so Pablo souaxat da lamaxashec So Jesús
16Qaltaq she'eguelaxaalec da ỹa'aqtac: da saishet da huo'o ca ipettega da aỹem huo'o ca ño'onataxac. Qaq da huo'o ca lhuennataxa de'era, qaq no'on da aỹem hua'aqta'a da setaqa da sheeta'am cam huo'o da no'onataxac, yaqto' nataqa'en aỹem cara'ac da huo'o da ña'amqaanaxac. 17Qaq de'era shenapec saishet da aỹem ỹamaxalec So Qarataxala'. Cha'aye da ña'amaqten, nache da setaqa, qalaq 'eeta'am da huo'o ca ño'onataxac. 18Cha'aye qalota na choche na'amaqchengui nam huetalec ana 'alhua, qaq ỹoqo'oye nataqa'en aỹem ỹataqta huo'o da ña'amqaanaxac. 19Cha'aye qami' qaupi'itaxañiitega da qami' ỹaanaxanaxaiqa, qalaq ¿ta'ainco' ye qana'axaỹaxañeeto'ot nam huo'o da aloic? 20Cha'aye qana'añaxacheeguet nam shiỹaxauapi maye qami' ỹamaqta'ape da choche qami' lo'onataxanaxanaqa, qataq qami' nhuottaleguete, qataq qami' ỹatenachetta'ape, qataq saishet da qami' iyacna'ape, qataq da iuaxaatapoiguilo naua qarashegolli'. 21Aỹem huo'o da ỹa'agaxa da sa'axat de'era, qalaxaye qomi' saishet da nache shenaqteque qami'.
Qalaxaye ye huo'o nam qami' ỹo'oteque de'era, nache nataqa'en aỹem so'ot damaye, na'aictaxa da sheeta'am ca huo'o da aloic. 22Namayepi da huo'otaq hebreo le'ecpi, nache nataqa'en aỹem. Qataq namayepi da Israel le'ecpi, nache nataqa'en aỹem. Qataq namayepi da chegoxoguet so Abraham, nache nataqa'en aỹem. 23¿Namayepi peta'a lamaxashecpi So Cristo? Qaq da nache 'eetec, nache aỹem ỹactec da ñapactelec namayepi, qaq na'aictaxa da 'eco' huo'o da aỹoic da shenapec de'era. Qalaxaye aỹem ỹactec da ỹo'onataxanaxac, saq 'ena'am namayepi. Ỹactec da ñeuaxanaguec, qataq ỹactec da ñecoñetaguec. Qalota da sootaigui da lchec da nleuaxa. 24Qataq ivi' cinco da ỹe'eguelaxalec da na lta'alpi na judiopi da aỹem damaxasoxoolec da aỹem qaỹalashen treinta y nueve da qaỹe'eguelaxaañi so nalashenaxanaxat. 25Tres da ỹe'eguelaxalec da nam lataxala'pi na Roma le'ecpi da aỹem irotega na 'epaq qataq 'oonolec da aỹem qairotega na coma'. Qataq tres da ñauane' da iyiiñi ana notaxaqui late'erai maye quiguingui na 'etaxat maye senottaua'a, qataq mashe ñauane' da 'oonolec pe qataq 'oonolec na'a'q da sootangui aso auaxai late'erai, choche ivitta'a da aỹem qanqatsheguem da aỹem qanca'alaxatec. 26Qataq ỹataqta qalota da sequeuotac, qataq ñauane' da sa'axasoxootapigui na talapi sa seren da ñachaalataxac, qataq nataqa'en sevira'a naxa da hua'c da aỹem qaicachiỹa da huo'o ca qoỹeetec da ñachaalataxac, nataqa'en da lchec da sootaigui na maiche ihuo' le'ecpi, nataqa'en da sootaigui na saishet da ihuo' le'ecpi. Qataq ñauane' nataqa'en da lchec da sootaigui na qalota nỹecpi, nache 'ena'am da hualec na no'onaxa, qataq ana auaxai. Qataq ñauane' da lchec nam 'eetega qarqaỹañicpi, qalaxaye tenataxanaxaicpi. 27Qataq ñeque'etaxangui da ỹo'onataxanaxac qataq da ñaqalaatapigui'. Qataq huo'oi naua pe' da saishet da so'oche. Qataq ñeque'etaxangui na iqouaxa qataq na ỹaquip, qataq souaxat da qaica ca ỹogoxot, nache ñeque'etaxangui na latomaxa.
28Qaq damaye, 'eeta'am da qaica ca la'amaqchec, da aỹem ñaq 'eetalec da shecto'ot da iuogoxo da setauaatac nam ỹa'amaqten So Cristo. 29Ỹataqta aỹem ỹalolaqchet da huo'o ñi selota'a da sa no'on, qataq ỹo'ot da icoxo qataq ỹalemataic da huo'o ñi selota'a da ỹaueeguet da huo'o ca lasouaxashet naqa'en ca lỹa. 30Qaq ỹoqo'oye da huo'o ca huaña da ño'oxonnapec, qalaq na'amaqchengui 'enauac nam lataxacpi maye ichoxot da qaica ca ỹa'añaxac naqa'en. 31Qaq Ñim Lo'onatac 'Enauacna maye Lta'a So Qarataxala' Jesús, som taiguet da chochaq tatec da ño'oxonnataguec, Ñimaye ỹaỹateeta da saishet da satenataxaatac. 32Co'ollaq soota'a ye nỹecpi ye Damasco, nache so nta'a maye ilotague' yemaye, maye do'onataxaatacot so lỹa nta'a le'enaxat Aretas, somaye ỹauo'o so nalleppi da nauan naqa'en so lasom ye nỹecpi da yaqto' aỹem qaỹaconeua'a da aỹem qaicoñe'. 33Qalaxaye huo'oi soua ñauochaxau' aỹem ỹacherangui aso no'oxona, nache sachiviigui qanqa'en so nalloxoc so lpaqtaxat ye nỹecpi. Qaq 'era da 'eetec co'ollaq ñaneltaxan.